Vinayaka Chathuthi 2021| ഗണേശോത്സവം; പ്രിയപ്പെട്ടവർക്ക് പങ്കുവയ്ക്കാൻ സന്ദേശങ്ങളും ആശംസകളും

ഹിന്ദുമത വിശ്വാസികള്‍ ഏറെ ആഹ്ലാദത്തോടെ കൊണ്ടാടുന്ന ഒരു ഉത്സവമാണ് ഗണേശ ചതുര്‍ത്ഥി. രാജ്യത്തെ മിക്കവാറും എല്ലാ സംസ്ഥാനങ്ങളിലും ഗണേശ ചതുര്‍ത്ഥി ഉത്സവം വളരെ ആവേശത്തോടെ ആഘോഷിക്കുന്നു. 11 ദിവസം നീണ്ടുനിൽക്കുന്നതാണ് വിനായക ചതുർത്ഥി ആഘോഷം അഥവാ ഗണേശോത്സവം. ഗണേശ വിഗ്രഹമുണ്ടാക്കുന്നത് മുതൽ തുടങ്ങുന്ന ഈ ഉത്സവം വിഗ്രഹം നിമജ്ജനം ചെയ്യുന്നതോടെയാണ് അവസാനിക്കുന്നത്.

ചിങ്ങ മാസത്തിലെ വെളുത്തപക്ഷ ചതുര്‍ത്ഥിയാണ് ഗണപതിയുടെ ജന്മദിനമായ വിനായക ചതുര്‍ത്ഥി. ഗണേശ ചതുര്‍ത്ഥി എന്നും അത്തം ചതുര്‍ത്ഥി എന്നും ഈ ദിവസം അറിയപ്പെടുന്നു. മറ്റ് പല ഐതിഹ്യങ്ങളും ചതുർത്ഥി ദിനവുമായി ബന്ധപ്പെട്ടു നിലനിൽക്കുന്നുണ്ട്. ഈ വർഷം സെപ്റ്റംബർ പത്തിനാണ് ചതുർത്ഥി ദിനം.

ഹിന്ദു വിശ്വാസമനുസരിച്ച് ഏതൊരു പ്രധാന കാര്യവും ആരംഭിക്കുമ്പോൾ അത് വിജയകരമായി പൂർത്തിയാക്കാൻ ഭക്തർ വിശ്വാസത്തോടെ വിളിക്കാറുള്ളത് ഗണപതി ഭഗവാനെയാണ്. അദ്ദേഹത്തെ മനസ്സിൽ ധ്യാനിച്ച് തുടങ്ങുന്ന പ്രവർത്തികൾ തടസങ്ങൾ ഇല്ലാതെ പൂർത്തിയാക്കാൻ കഴിയും എന്നാണ് വിശ്വാസം. തടസങ്ങൾ അഥവാ വിഘ്നങ്ങൾ അകറ്റുന്നതിനാലാണ് അദ്ദേഹത്തെ നാം വിഘ്നേശ്വരൻ എന്ന് കൂടി വിളിക്കുന്നത്.

ജീവിതത്തിലെ തടസങ്ങൾ നീക്കി സമ്പത്തും സമൃദ്ധിയും നൽകുന്ന ഗണപതി ഭഗവാന്റെ ജന്മദിനത്തിൽ പരിധികൾക്കുള്ളിൽ നിന്ന് കൊണ്ടാകാം ആഘോഷങ്ങൾ. കൂടാതെ വിനായക ചതുർഥി ആശംസകൾ നൽകി നിങ്ങളുടെ പ്രിയപ്പെട്ടവർക്കൊപ്പം ഈ ദിനം വിശിഷ്ടമാക്കൂ.

ഗണപതി ഭഗവാൻ എപ്പോഴും നിങ്ങളുടെയും കുടുംബത്തിന്റെയും വഴികാട്ടിയും സംരക്ഷകനുമായി കൂടെയുണ്ടാകട്ടെ, ജീവിതത്തിലെ എല്ലാ തടസങ്ങളും നീക്കി മുന്നേറാൻ നിങ്ങൾക്ക് സാധിക്കട്ടെ നിങ്ങൾക്കും കുടുംബത്തിനും എല്ലാവിധ ഐശ്വര്യങ്ങളും പ്രദാനം ചെയ്യട്ടെ എന്നാശിക്കുന്നു. വിനായക ചതുർത്ഥി ആശംസകൾ