ശീലമാക്കേണ്ടതും ഒഴിവാക്കേണ്ടതും; പ്രതിരോധ ശേഷി കൂട്ടാം, രോഗങ്ങളെ തടയാം

ആരോഗ്യമുള്ള ശരീരത്തിൽ രോഗാണുക്കൾക്ക് സ്ഥാനമില്ല, ഈ കൊറോണ കാലം വീണ്ടും ഓർമിപ്പിക്കുന്നത് ഇതു തന്നെ. ജീവിത രീതിയിൽ അൽപ്പമൊന്ന് ശ്രദ്ധിച്ചാൽ മതി. രോഗാണുക്കളെ തടയാം. സ്വന്തം ശരീരത്തെ കൂടുതൽ സ്നേഹിക്കാം, മറ്റെന്തിനേക്കാൾ വലുത് ആരോഗ്യമാണെന്ന് കാലം വീണ്ടും തെളിയിക്കുകയാണ്.

രോഗങ്ങളെ തടയാൻ ഏറ്റവും നല്ല വഴി രോഗാണുക്കൾക്ക് വഴി തുറക്കുന്ന ശീലങ്ങൾ ഒഴിവാക്കുക എന്നത് തന്നെയാണ്. താഴെ പറയുന്ന കാര്യങ്ങൾ ഒന്ന് ശ്രദ്ധിക്കൂ,

പുകവലി ആരോഗ്യത്തിന് ഹാനീകരം. ഒരു സാധാരണ മലയാളിയുടെ ജീവിതത്തിൽ നിത്യേന കേൾക്കുന്ന വാക്കുകളാണിത്. പുകവലി ആരോഗ്യത്തിന് ഹാനീകരം തന്നെ. നിങ്ങളെ വലിയൊരു രോഗിയാക്കാൻ ഈ പുകച്ചുരുളുകൾക്ക് സാധിക്കും. കഴിവതും ഈ മോശം ശീലം ഒഴിവാക്കൂ.

ഭക്ഷണത്തിൽ പഴങ്ങളും പച്ചക്കറികളും കൂടുതൽ ഉൾപ്പെടുത്താം. ഇവയിലടങ്ങിയിരിക്കുന്ന വിറ്റാമിനുകൾ ശരീരത്തിന്റെ പ്രതിരോധശേഷി കൂട്ടുന്നതാണ്. പച്ചക്കറികൾ കൂടുതൽ കഴിക്കുക എന്നതിനർത്ഥം മാംസം പൂർണമായും ഒഴിവാക്കുക എന്നല്ല, സ്വന്തം ശരീരത്തിന്റെ സ്വഭാവം അനുസരിച്ചുള്ള ഡയറ്റുകൾ തിരഞ്ഞെടുത്ത് പഴങ്ങളും പച്ചക്കറികളും മീനും ഇറച്ചിയും ആവശ്യം പോലെ കഴിക്കുക. മാംസാഹാരങ്ങൾ പാകം ചെയ്യുമ്പോൾ നന്നായി വേവിച്ച് വേണം കഴിക്കാൻ.

വ്യായാമം മുഖ്യം. അടുത്തകാലത്തായി ഫിറ്റ്നസിൽ മലയാളികളും ശ്രദ്ധിച്ചു തുടങ്ങിയിട്ടുണ്ട്. രാവിലെയുള്ള നടത്തം നമ്മുടെ ഒരു ദിവസം മാത്രമല്ല, ജീവിത കാലം തന്നെ പോസിറ്റീവാക്കും.

ശരീര ഭാരം അമിതമായി കൂടാതെയും കുറയാതേയും ശ്രദ്ധിക്കുക. ഉയരത്തിനനുസരിച്ചുള്ള ഭാരം ഉണ്ടെന്ന് കൃത്യമായ ഇടവേളകളിൽ ഉറപ്പ് വരുത്തുക.

മദ്യപിക്കുന്നയാളാണോ നിങ്ങൾ? എങ്കിൽ അതിൽ അൽപ്പം നിയന്ത്രണങ്ങളൊക്കെയാകാം. കുപ്പി കണ്ടാൽ കരളിനെ മറക്കരുത്. മറന്നാൾ കരൾ തിരിച്ചു പണി തരും. ആവശ്യത്തിന് മാത്രം മദ്യപിക്കുക. ആ ശീലമില്ലാത്തവർ തുടങ്ങാതിരിക്കുക.

ഉറക്കം വളരെ പ്രധാനപ്പെട്ടതാണ്. ആരോഗ്യമുള്ള മനുഷ്യം ഒരു ദിവസം 8 മണിക്കൂറെങ്കിലും ഉറങ്ങിയേ പറ്റൂ. വൈകി കിടക്കുന്നത് ഒഴിവാക്കുക. കൃത്യ സമയത്ത് ഉറങ്ങി നേരത്തേ ഉണർന്ന് വ്യായാമം ചെയ്യുക. വൈകിയുള്ള ഉറക്കം ഗുരുതരമായ ആരോഗ്യ പ്രശ്നങ്ങൾ സൃഷ്ടിക്കും.

വ്യക്തി ശുചിത്വം പാലിക്കുക. കൈകൾ ഇടക്കിടെ സോപ്പിട്ട് കഴുകുന്നത് ശീലമാക്കുക. ഇത് കൊറോണ കാലത്ത് മാത്രമല്ല, തുടർന്നും ശീലമാക്കുക.

സമ്മർദ്ദം കുറക്കുകയാണ് മറ്റൊരു പ്രധാന കാര്യം. പുതിയ കാലത്തെ ജീവിത ശൈലിയിൽ ഒപ്പം കൂടിയ ഒന്നാണ് മാനസിക സമ്മർദ്ദം. ഇത് മാനസികാരോഗ്യവും ശാരീരികാരോഗ്യവും ഒരുപോലെ തകർക്കും. പോസിറ്റീവായി ഇരിക്കാൻ ശ്രമിക്കുക. സമ്മർദ്ദമുണ്ടാക്കുന്ന കാര്യങ്ങളെ മനപൂർവം അവഗണിക്കാൻ ശ്രമിക്കുക.