കഞ്ചാവു നിയമവിധേയമാക്കുന്നത് സെക്സിനെ എങ്ങനെ ബാധിക്കും? ഞെട്ടിക്കുന്ന കണ്ടെത്തലുമായി പഠന റിപ്പോർട്ട്

കഞ്ചാവ് ഉപയോഗിക്കുന്നതും സെക്സും തമ്മിൽ ബന്ധമുണ്ടോ ? നിരവധി പേരെ കുഴയ്ക്കുന്ന ചോദ്യമാണിത്. എന്നാൽ ഇതിനുള്ള ഉത്തരം കണ്ടെത്തിയിരിക്കുകയാണ് ഒരു കൂട്ടം ഗവേഷകർ. കഞ്ചാവ് ഉപയോഗം നിയമവിധേയമായ പ്രദേശങ്ങളിൽ  20നും 30നും ഇടയ്ക്ക് പ്രായമുള്ള യുവാക്കൾ കൂടുതൽ തവണ സെക്സിലേർപ്പെടുന്നുവെന്നാണ് കണ്ടെത്തൽ.

കഞ്ചാവ് ഉപയോഗവും വർധിച്ച ലൈംഗികതയും തമ്മിൽ ബന്ധമുണ്ടെന്ന് മുൻപ് പല പഠനങ്ങളിലും കണ്ടെത്തിയിരുന്നു.  ഒരിക്കലും കഞ്ചാവ് ഉപയോഗിക്കാത്തവരെ അപേക്ഷിച്ച് കഞ്ചാവ് ഉപയോഗിക്കുന്നവർ 20 ശതമാനം സെക്സ് അധികം ആസ്വദിക്കുന്നുവെന്നാണ് പുതിയ കണ്ടെത്തൽ.

കഞ്ചാവ് നിയമവിധേയമാക്കുന്നതും അത് ജനങ്ങളിലുണ്ടാക്കുന്ന സ്വാധീനവും സംബന്ധിച്ച് ഹെൽത്ത് ഇക്കണോമിക്സ് ജേണൽ പ്രസിദ്ധീകരിച്ച പഠനറിപ്പോർട്ടിലാണ് ഈ വിവരങ്ങളുള്ളതെന്ന് വാർത്താ ഏജൻസിയായ ഐഎഎൻഎസ് പറയുന്നു. യുഎസിലെ കണക്ടികട്ട് സർവകലാശാലയിലെ ഗവേഷകരാണ് പഠനം നടത്തിയത്. 2005നും 2014 നും ഇടയിൽ മെഡിക്കൽ കഞ്ചാവ് നിയമവിധേയമാക്കിയ പ്രദേശങ്ങളിലാണ് ഗവേഷണം നടത്തിയത്. ഇത് ഇരുപതുകളിലും മുപ്പതുകളിലും ഉള്ള യുവാക്കളുടെ ലൈംഗികതയെയും പ്രത്യുൽപാദനക്ഷമതയെയും എങ്ങനെ ബാധിച്ചുവെന്നാണ് അവർ വിശകലനം ചെയ്തത്.

ലൈംഗിക പ്രവർത്തനങ്ങൾ, ഗർഭനിരോധന മാർഗ്ഗങ്ങൾ, ജനനനിരക്ക് എന്നിവയിൽ കഞ്ചാവിന്റെ ഉപയോഗം ഉപയോഗം മൂലം ഉണ്ടാകുന്ന പെരുമാറ്റ വ്യതിയാനങ്ങളെക്കുറിച്ച് ഗവേഷണ സംഘം പഠിച്ചു. കഞ്ചാവിന്റെ ഉപയോഗം ലൈംഗിക പ്രവർത്തനങ്ങളിൽ വർധനവുണ്ടാക്കുന്നുവെന്നും ഗർഭ നിരോധന മാർഗങ്ങളുടെ ഉപയോഗം കുറയുന്നതോടെ ജനന നിരക്ക് വർധിക്കുന്നതായും പഠനത്തിൽ കണ്ടെത്തി.

അതേസമയം ലൈംഗിക രോഗമായ ഗൊണേറിയ ബാധിക്കുന്നവരുടെ നിരക്കിലും വർധനവുണ്ടായെന്ന് ഗവേഷകർ കണ്ടെത്തി. ലൈംഗിക പ്രതികരണത്തിന്റെ പെട്ടെന്നുള്ള സുഖാനുഭൂതികൾ, ലൈംഗിക ആവൃത്തി വർധിപ്പിക്കൽ, ലൈംഗികതയുമായി ബന്ധപ്പെട്ട ഭാവി ചെലവുകൾ അവഗണിക്കുക ഉൾപ്പെടെയുള്ള പെരുമാറ്റ പ്രതികരണങ്ങളാണ് ഈ മാറ്റങ്ങൾക്ക് കാരണം. പ്രത്യുൽപാദനക്ഷമത കുറയ്ക്കുന്ന പ്രവണതയാണ് കഞ്ചാവ് ഉൾപ്പെടെയുള്ള ലഹരി പദാർത്ഥങ്ങൾക്കുള്ളത് എങ്കിലും ഇത്തരം ശാരീരിക വ്യതിയാനങ്ങളെ പെരുമാറ്റ ഘടകങ്ങൾ പ്രതിരോധിക്കുമെന്ന് ജനനനിരക്ക് വർധിച്ചതു ചൂണ്ടിക്കാട്ടി ഗവേഷകർ പറയുന്നു.