ഏഴിമലയുടെ കാറ്റേറ്റ്, പച്ചത്തുരുത്തുകൾ കണ്ട് ഓളപ്പരപ്പിലൂടൊരു സാഹസിക യാത്ര; കയാക്കിങിനൊരുങ്ങി കവ്വായിക്കായൽ

ലോകസഞ്ചാര ഭൂപടത്തിലിടം പിടിച്ച കവ്വായിക്കായൽ കയാക്കിങ് സാഹസിക യാത്രക്ക് ഒരുങ്ങിക്കഴിഞ്ഞു. കണ്ണൂർ അന്താരാഷ്ട്ര വിമാനത്താവളത്തിന്റെ ഒന്നാം വാർഷികാഘോഷങ്ങളുടെ ഭാഗമായാണ് കയാക്കിങ് സംഘടിപ്പിക്കുന്നത് .

കായലും കടലും മലകളും തുരുത്തുകളുമൊക്കെ ചേർന്ന കവ്വായിക്കായൽ ഉത്തര കേരളത്തിലെ ഏറ്റവും വലിയ ജല സംഭരണിയാണ് . വടക്ക് നീലേശ്വരം മുതൽ തെക്ക് ചെമ്പല്ലിക്കുണ്ട് വരെ നീണ്ടു കിടക്കുന്ന കായലിന്റെ ജല ജൈവിക സമ്പന്നത ഏറെ പ്രസിദ്ധമാണ്.

സംസ്ഥാനത്തെ ഏറ്റവും കൂടുതൽ കണ്ടൽക്കാടുകളുള്ള കുഞ്ഞിമംഗലത്തെ നീർത്തടങ്ങളും ചെമ്പല്ലിക്കുണ്ട്, കുണിയൻ തുടങ്ങിയ പക്ഷിസങ്കേതങ്ങളും ശ്രദ്ധേയം. കണ്ണൂർ അന്താരാഷ്ട്ര വിമാനത്താവളം യാഥാർഥ്യമായതോടെ കായലിനെ അറിയാനും ആസ്വദിക്കാനുമായി നിരവധി വിനോദസഞ്ചാരികളാണ് ഇവിടെയെത്തുന്നത്.

ഉത്തര മലബാറിന്റെ ആലപ്പുഴയെന്ന് വിശേഷിക്കപ്പെടുന്ന കവ്വായിക്കായലിലേക്ക് പയ്യന്നൂർ റെയിൽവെ സ്റ്റേഷനിൽ നിന്നും വെറും 3 കി.മീ മാത്രം ദൂരമേയുള്ളൂ.

അറബിക്കടലിനു സമാന്തരമായി 21 കി മീ നീണ്ടു കിടക്കുന്ന കവ്വായിക്കായൽ ലോക തണ്ണീർത്തട പദവിയായ രാം സർസൈറ്റ് പട്ടികയിലിടം പിടിച്ചിട്ടുണ്ട്.

പ്രകൃതി സൗന്ദര്യത്തിനുമപ്പുറം ജലവിഭവങ്ങളുടെ സമൃദ്ധിയും, ദേശാടനക്കിളികളുടെ അപൂർവതയും ശുദ്ധജല കയാക്കിങിന് ഏറെ അനുയോജ്യമായ കവ്വായിക്കായലിന്റെ പ്ലസ് പോയിന്റുകളാണ്.

പയ്യന്നൂരിന്റ ചരിത്രവും കായലിന്റെ ജൈവസമ്പന്നതയും അറിഞ്ഞ് പച്ചോളങ്ങളിൽ തെന്നിയൊഴുകാൻ സഞ്ചാരികളെ മാടി വിളിക്കുകയാണ് കവ്വായിക്കായൽ. ഡിസംബർ 5 രാവിലെ എട്ട് മണിക്ക് സി കൃഷ്ണൻ എം എൽ എ സാഹസിക യാത്ര ഉദ്ഘാടനം ചെയ്യും.കിയാൽ മാനേജിംഗ് ഡയറക്ടർ വി തുളസീദാസ് ഫ്ലാഗ് ഓഫ് ചെയ്യും