പുതുച്ചേരിയിൽ ഇനി ശില്പങ്ങൾ കഥ പറയും; ശില്പ സൗന്ദര്യത്തിന്റെ പുതിയ സങ്കേതമൊരുങ്ങുന്നത് അരക്കൻമേട്ടിൽ

പോണ്ടിച്ചേരിയിൽ കാഴ്ചകൾ അനവധിയാണ്. കോളനി വാഴ്ചക്കാലത്തെ ഫ്രഞ്ച് നിർമിതികൾ നിറഞ്ഞ വൈറ്റ് സ്ട്രീറ്റ്, ഔരോവില്ല വിശ്വശാന്തി കേന്ദ്രം, 1753 ൽ നിർമിതമായ സേക്രട്ട് ഹാർട്ട് ചർച്ച് തുടങ്ങി വിനോദ സഞ്ചാരികളെ ആകർഷിക്കുന്ന നിരവധി ഇടങ്ങളാണ് ഇവിടെയുള്ളത്.

 എന്നാൽ കാഴ്ചയുടെ പുതിയൊരു കേന്ദ്രം ഉദയം ചെയ്യുകയാണ് കേന്ദ്ര ഭരണ പ്രദേശമായ പുതുച്ചേരിയെന്ന പഴയ പോണ്ടിച്ചേരിയിൽ. നഗരത്തിൽ നിന്ന് 15 കിലോമീറ്റർ മാറി അരക്കൻമേട്ടിലാണ് ശില്പ സൗന്ദര്യത്തിന്റെ പുതിയ സങ്കേതമൊരുങ്ങുന്നത്.

അരക്കൻമേട്ടിന്റെ ചരിത്രം പറയുന്നതാണ് രൂപം കൊള്ളുന്ന ഓരോ ശില്പവും. രാജ രാജ ചോളന്റെ ഭരണകാലത്ത് സൃഷ്ടിക്കപ്പെട്ട ജനതഥിയാണ്  അരക്കൻ മേട്ടിലെ ആദ്യകാലക്കാർ എന്നാണ് ചരിത്ര രേഖ.

മുതുങ്കപ്പാക്കത്തുനിന്ന് കണ്ടൽക്കാടു നിറഞ്ഞ തടാകത്തിലൂടെ രണ്ടു കിലോമീറ്റർ സഞ്ചരിച്ചു വേണം അരക്കൻമേട്ടിലെത്താൻ. തകർന്ന കൽ കെട്ടിടത്തിന്റെ ഒരു ഭാഗം മാത്രമാണ് ഇവിടെ ആകെയുള്ള അവശേഷിപ്പ്.

രാജഭരണത്തിന്റെ കേന്ദ്രമായിരുന്ന സെഞ്ചിക്കോട്ടൈയിലേക്ക് എത്തിച്ചിരുന്നത് അരക്കൻമേട്ടിൽ നിർമിച്ചിരുന്ന വീഞ്ഞായിരുന്നുവെന്ന് പറയപ്പെടുന്നു. വിശിഷ്ടമായ വീഞ്ഞ് നിർമാണത്തിൽ നിപുണമായിരുന്നു അരക്കൻമേട്. ചാരായത്തിന്റെ ഇംഗ്ലീഷ് പദമായ അരാക്കിനോടും അരക്കൻമേട് എന്ന സ്ഥലപ്പേര് ചേർന്നു നിൽക്കുന്നുണ്ട്. 

അരക്കൻ മേട്ടിൽ പുരാതന കാലത്ത് തുറമുഖം നിലനിന്നിരുന്നു. റോമാ സാമ്രാജ്യത്തിൽ നിന്നുൾപ്പെടെ വിവിധ തരം വീഞ്ഞുകൾ  ഇവിടേക്ക് എത്തിയതായും ചരിത്രകാരൻമാർ പറയുന്നു. ഏതായാലും വീഞ്ഞുമായും ചുറ്റിപ്പറ്റിയാണ് അക്കൻമേടിന്റെ ചരിത്രം.

ജനവാസ കേന്ദ്രം പിന്നീട് പ്രകൃതിക്ഷോഭത്തിൽ തകർന്നു. നിലവിൽ അരക്കൻമേട്ടിൽ അൾത്താമസമില്ല.  മുതുങ്കപ്പാക്കത്ത് ഒന്നര വർഷം മുൻപ് പുതുച്ചേരി ടൂറിസം വകുപ്പ് സ്ഥാപിച്ച ആർട് ആൻഡ് ക്രാഫ്റ്റ് വില്ലേജിലാണ് മൺ ശില്പങ്ങൾ ഒരുങ്ങുന്നത്.

മൺപാണ്ടം വിഭാഗത്തിലെ 15 ഓളം ശില്പികളാണ് മനോഹര ബിംബങ്ങളുടെ സ്രഷ്ടാക്കൾ.  വീഞ്ഞ് പാത്രത്തിന്റെ വലിയ രൂപം  മ്യൂസിയത്തിന്റെ മുന്നിൽ സ്ഥാപിക്കും. കളിമണ്ണ്, ചെമ്മണ്ണ്, എക്കൽ എന്നിവയാലാണ് നിർമാണം. കുട്ടികൾക്കായി വൈൽഡ് ലൈഫ് മ്യൂസിയവും പ്രത്യേകം തയ്യാറാകുന്നുണ്ട്.