അബ്ദുള്ള- ഖദീജ ദമ്പതികളുടെ മകൾ രാജേശ്വരിക്ക് താലി ചാർത്തി വിഷ്ണു പ്രസാദ്; മതസൗഹാർദത്തിന് നല്ല മാതൃകയായി മന്യോട്ട് ക്ഷേത്രത്തിലെ വിവാഹം

കാഞ്ഞങ്ങാട്: മതസൗഹാർദത്തിന്റെ വലിയ മാതൃകയാണ് കാഞ്ഞങ്ങാട് മന്യോട്ട് ക്ഷേത്രത്തിൽ കഴിഞ്ഞ ദിവസം നടന്ന വിവാഹം.

ഭഗവതിയുടെ തിരുനടയിൽവെച്ച് കാഞ്ഞങ്ങാട് സ്വദേശി വിഷ്ണുപ്രസാദ് മേൽപ്പറമ്പ് ഷമീംമൻസിലിലെ രാജേശ്വരിയുടെ കഴുത്തിൽ താലി ചാർത്തുമ്പോൾ സാക്ഷികളായി രാജേശ്വരിയുടെ മാതാപിതാക്കളായ അബ്ദുള്ളയും ഖദീജയും മുസ്ലിംസഹോദരങ്ങളും ഉണ്ടായിരുന്നു. മാതൃഭൂമിയാണ് വാർത്ത റിപ്പോർട്ട് ചെയ്തിരിക്കുന്നത്.

അബ്ദുള്ള ഖദീജ ദമ്പതികളുടെ വളർത്തു മകളാണ് തഞ്ചാവൂരുകാരിയായ രാജേശ്വരി. ഏഴോ എട്ടോ വയസുള്ളപ്പോഴാണ് രാജേശ്വരി ഇവിടെ എത്തിയത്.

അച്ഛനും അമ്മയും മരിച്ച ശേഷം നാട്ടിലേക്ക് തിരികെ പോയിട്ടില്ല. ഇപ്പോൾ 22 വയസുകഴിഞ്ഞു. അബ്ദുള്ള ഖദീജ ദമ്പതിമാർ തന്നെയാണ് ഇപ്പോൾ വിവാഹവും നടത്തിക്കൊടുത്തത്.

രാജേശ്വരിയുടെ അച്ഛൻ ശരവണൻ കാസർകോട്ടും മേൽപ്പറമ്പിലും കൂലിപ്പണിയെടുത്താണ് ജീവിച്ചത്. ഏറെക്കാലം അബ്ദുള്ളയുടെ കുന്നരിയത്തെ വീട്ടുവളപ്പിലും കൃഷിയിടത്തിലും പണിയെടുത്തു.

അങ്ങനെയാണ് രാജേശ്വരി അബ്ദുള്ളയുടെ വീട്ടിലെത്തിയത്. മക്കൾ ഷമീമിനും നജീബിനും ഷെറീഫിനുമൊപ്പം അവരുടെ സഹോദരിയായി രാജേശ്വരിയും വളർന്നു.

വിഷ്ണുവിന്റെ വിവാഹാലോചന വന്നപ്പോൾ അബ്ദുള്ളയും വീട്ടുകാരും വിഷ്ണുവിന്റെ വീട്ടിലെത്തി കാര്യങ്ങൾ അന്വേഷിക്കുകയായിരുന്നു.

കല്യാണം ക്ഷേത്രത്തിൽ വേണമെന്ന് വിഷ്ണുവിന്റെ വീട്ടുകാർ ആവശ്യപ്പെട്ടു. അങ്ങനെയാണ് മുസ്‌ലിം സമുദായക്കാർക്കുകൂടി കയറാവുന്ന കാഞ്ഞങ്ങാട്ടെ മന്യോട്ട് ക്ഷേത്രത്തിൽ വിവാഹം നടത്താൻ തീരുമാനിച്ചത്.

ഞായറാഴ്ച രാവിലെ അബ്ദുള്ളയുടെ 84 വയസുള്ള സഫിയുമ്മയുൾപ്പെടെ എല്ലാ ബന്ധുക്കളും വിവാഹത്തിൽ പങ്കെടുക്കാനെത്തി.

വരന്റെ വീട്ടുകാർ ചേർന്ന് വധുവിന്റെ ബന്ധുക്കളെ നാലമ്പലത്തിലേക്ക് സ്വീകരിച്ചു. തുടർന്ന് എല്ലാവരെയും സാക്ഷിയാക്കി വിഷ്ണുപ്രസാദ് രാജോശ്വരിക്ക് താലി ചാർത്തി. മതസൗഹാർദത്തിന്റെ മനോഹര കാഴ്ചയായിരുന്നു അത്.