നിലമ്പൂരിലെ പുലരികൾ കാണണോ? ഇനി രാജ്യറാണിയിലെത്താം; ജനുവരി 20 ന് രാത്രിയാത്രാ നിരോധനം നീക്കും

ഇനി മുതൽ ഷൊറണൂർ-നിലമ്പൂർ റെയിൽ പാതയിലൂടെ രാത്രിയും തീവണ്ടികൾ ഓടും. ഈ മാസം 20 മുതൽ രാത്രി 10 മുതൽ രാവിലെ 6 വരെ അടച്ചിടുന്നത് അവസാനിപ്പിക്കാൻ റെയിൽവേ ഉത്തരവ് പുറത്തിറങ്ങി.

ഷൊറണൂര്‍ -നിലമ്പൂര്‍ റെയില്‍വേ പാത രാത്രി ഗതാഗതത്തിന് 2020 ജനുവരി 20 മുതല്‍ തുറക്കാന്‍ ദക്ഷിണ റെയില്‍വേ പാലക്കാട് ഡിവിഷന്‍ ആസ്ഥാനത്ത് നിന്ന്  ഓപ്പറേഷന്‍സ് മാനേജര്‍ ശ്രീ.അശോക് കുമാര്‍ ആണ് ഉത്തരവിറക്കിയത്. ഗേറ്റ് കീപ്പർ, സ്റ്റേഷൻ മാസ്റ്റർമാർ, സുരക്ഷാ ജീവനക്കാർ തുടങ്ങി വിവിധ തലത്തിലുള്ള ഉദ്യോഗസ്ഥരെ രാത്രികാല സേവനത്തിനായി നിയോഗിച്ച് വരികയാണ്.

പാതയിലൂടെ രാത്രികാല ഗതാഗതം സാധ്യമാക്കുന്നതോടെ കൊച്ചുവേളി-നിലമ്പൂർ റോഡ് രാജ്യറാണി എക്സ്പ്രസ് സമയക്രമം മാറി പുലർച്ചെ 5 മണിയോടെ നിലമ്പൂർ എത്തുന്ന വിധം പുനക്രമീകരിക്കും എന്നാണ് എല്ലാവരും പ്രതീക്ഷിക്കുന്നത്. 

നിലവിൽ ട്രെയിൻ രണ്ട് മണിക്കൂറോളം ഷൊറണൂർ സ്റ്റേഷനിൽ നിർത്തി രാവിലെ 6 മണിക്ക് ആണ് പുറപ്പെടുന്നത്. ജനുവരി 20 മുതൽ അല്ലെങ്കിലും ഏറെ വൈകാതെ രാജ്യറാണിയുടെസമയമാറ്റം ഉണ്ടാകും എന്ന് തന്നെ ആണ് പ്രതീക്ഷ.

പാത രാത്രി ഗതാഗതത്തിന് തുറന്ന് കൊടുക്കുന്നതോടെ ആദ്യം ചരക്ക് വണ്ടികൾ ആകും ഓടിത്തുടങ്ങുക. നിലമ്പൂരിൽ ഗുഡ്സ് യാർഡ് തയ്യാർ ആണ്. പകൽ ഗുഡ്സ് വണ്ടിക്ക് സമയം നൽകാൻ പറ്റാത്തത് കൊണ്ടാണ് ഇപ്പോൾ ഇവിടേക്ക് ചരക്ക് ഗതാഗതം നടക്കാത്തത്. പുതിയ സാഹചര്യത്തിൽ ചരക്ക് വണ്ടികൾ രാത്രി ഇവിടേക്ക് സർവീസ് നടത്തിയേക്കും.

രാത്രി പുതിയ ട്രെയിൻ സർവീസുകൾ വേണമെന്ന് നിലമ്പൂർ-മൈസൂർ റെയിൽവേ ആക്ഷൻ കൗൺസിലും, പാസഞ്ചർ അസോസിയേഷനും ആവശ്യം ഉയർത്തുന്നുണ്ട്.

ഇപ്പൊൾ രാത്രി 8.10ന്‌ പാലക്കാട് യാത്ര അവസാനിപ്പിക്കുന്ന ട്രിച്ചി- പാലക്കാട് പാസഞ്ചർ നിലമ്പൂരിലേക്ക് നീട്ടണം എന്നാണ് ഒരു നിർദേശം. ഈ ട്രെയിൻ  പുലർച്ചെ പാലക്കാട്ടേക്ക് പോകുന്ന വിധം ക്രമീകരിച്ചാൽ അത് മേഖലയിലെ ജനങ്ങൾക്ക് വലിയ സൗകര്യം ആകും. 

എന്തായാലും ഷൊറണൂർ നിലമ്പൂർ പാതയിൽ രാത്രി പച്ച വെളിച്ചം തെളിയുന്നതോടെ പ്രകാശിക്കുന്നത് ഒരു പാട് വികസന പ്രതീക്ഷകൾ കൂടി ആണ്.