മാതൃകയായി സണ്ണി ലിയോൺ; വരുമാനത്തിന്റെ പത്ത് ശതമാനം തുർക്കി-സിറിയ ഭൂകമ്പ ബാധിതർക്ക്

തുർക്കി-സിറിയ ഭൂകമ്പ ബാധിതർക്ക് സഹായഹസ്തവുമായി സണ്ണി ലിയോണും ഭർത്താവ് ഡാനിയേൽ വെബ്ബറും. തങ്ങളുടെ വരുമാനത്തിന്റെ പത്ത് ശതമാനം ദുരിത ബാധിതർക്കു നൽകാനാണ് സണ്ണിയുടേയും ഭർത്താവിന്റേയും തീരുമാനം.

തുർക്കിയിലേയും സിറിയയിലേയും ദുരിത ബാധിതർക്ക് സഹായഹസ്തം പ്രഖ്യാപിക്കുന്ന ഇന്ത്യയിലെ ആദ്യത്തെ സെലിബ്രിറ്റിയാണ് സണ്ണി ലിയോൺ. സണ്ണിയുടെ മാതൃക ഇന്ത്യയിലെ കോടീശ്വരന്മാരായ സെലിബ്രിറ്റികൾ പിന്തുടരട്ടേയെന്നാണ് ആരാധകർ പറയുന്നത്.

40,000 ഓളം പേരാണ് തുർക്കിയിലും സിറിയയിലും ഭൂകമ്പത്തിൽ കൊല്ലപ്പെട്ടത്. ലക്ഷക്കണക്കിനു പേർ പാർപ്പിടവും ജീവിത മാർഗങ്ങളും ഇല്ലാതായി ദുരിതാശ്വാസ ക്യാമ്പിൽ കഴിയുന്നു.

സണ്ണി ലിയോണും ഡാനിയേൽ വെബ്ബറും ചേർന്ന് നടത്തുന്ന കോസ്മറ്റിക് ബ്രാൻഡായ സ്റ്റാർസ്ട്രക്കിന്റെ വരുമാനത്തിന്റെ പത്ത് ശതമാനമാണ് ദുരിതാശ്വാസത്തിനായി നൽകുക. ലോകത്തിന്റെ കരുതലും സഹാനുഭൂതിയും തുർക്കിയിലേയും സിറിയയിലേയും ജനങ്ങൾ അർഹിക്കുന്നുണ്ടെന്നാണ് തങ്ങളുടെ പ്രഖ്യാപനത്തിലൂടെ ദമ്പതികൾ നൽകുന്ന സന്ദേശം.

ഭൂകമ്പത്തിനു ശേഷം തകർന്നടിഞ്ഞ ജനങ്ങൾക്ക് പ്രതീക്ഷയേകാൻ എല്ലാവരും ഒന്നിച്ചു നിൽക്കണമെന്ന് സണ്ണി ലിയോൺ പറയുന്നു. ദുരിതബാധിതർക്ക് ജീവിതം പുനരാരംഭിക്കാൻ എല്ലാവരും സഹായിക്കണമെന്നും നടി ആവശ്യപ്പെടുന്നു.

തുർക്കിയിലേയും സിറിയയിലേയും ജനങ്ങൾ നേരിട്ടുകൊണ്ടിരിക്കുന്നത് കാണേണ്ടി വരുന്നത് ഏറെ അസ്വസ്ഥപ്പെടുത്തുന്നതാണ്. സഹജീവികളോട് സഹാനുഭൂതി കാണിക്കേണ്ട അവസരമാണിതെന്ന് സണ്ണിയുടെ ഭർത്താവ് ഡാനിയേൽ ചൂണ്ടിക്കാട്ടി.

സ്റ്റാർസ്ട്രക്കിന്റെ ഫെബ്രുവരി മാസത്തെ വരുമാനത്തിന്റെ പത്ത് ശതമാനാണ് ദുരിതാശ്വാസ പ്രവർത്തനങ്ങൾക്കായി സണ്ണി ലിയോണും ഭർത്താവും നൽകുക.