ആചാരപ്പെരുമയില്‍ തിരുവട്ടാറില്‍ മഹാകുംഭാഭിഷേകം നാലുനൂറ്റാണ്ടിനു ശേഷം

വഞ്ചിരാജപരമ്പര കുലദൈവമായി ആരാധിക്കുന്ന പ്രസിദ്ധമായ തിരുവട്ടാർ ആദികേശവ ക്ഷേത്രത്തിൽ നാല് നൂറ്റാണ്ടിന് ശേഷം  മഹാകുംഭാഭിഷേകം നടന്നു. ജൂലൈ 6ന് രാവിലെ 5.10നും 5.50നും മദ്ധ്യേയുള്ള മുഹൂർത്തത്തിലാണ് കുംഭാഭിഷേക ചടങ്ങുകൾ നടന്നത്. തിരുവനന്തപുരത്തു നിന്ന് 51 കിലോമീറ്റർ അകലെ തെക്ക് ഭാഗത്ത് സ്ഥിതിചെയ്യുന്ന ക്ഷേത്രത്തിലേക്ക് നിരവധി ഭക്തരാണ് കുംഭാഭിഷേകം ദര്‍ശിക്കാനെത്തിയത്.

ശ്രീപദ്മനാഭസ്വാമി ക്ഷേത്രത്തിനു തുല്യം പഴക്കവും ആചാരപ്പെരുമയുമുള്ള ക്ഷേത്രമാണ് തിരുവട്ടാറിലേത്. തിരുവനന്തപുരത്ത് ശ്രീപദ്മനാഭൻ കിഴക്ക് ദർശനത്തിലാണെങ്കിൽ തിരുവട്ടാറിൽ ആദികേശവൻ അഭിമുഖമായാണ് പള്ളികൊള്ളുന്നത്. ഇവിടെ നാഭിയിൽ പദ്മമില്ല. യോഗനിദ്രയിൽ വിരാട് രൂപമാണ് പ്രതിഷ്ഠ.

കുളച്ചൽ യുദ്ധത്തിനു പോകുംമുൻപ് മാർത്താണ്ഡവർമ മഹാരാജാവ് വാൾവെച്ച് വണങ്ങിയ പാരമ്പര്യം തിരുവട്ടാറിനുണ്ട്. 418 വർഷത്തിനുശേഷമാണ് ക്ഷേത്രത്തിൽ കുംഭാഭിഷേകം നടക്കുന്നത്. തമിഴ്നാട് ദേവസ്വത്തിന്റെ കീഴിലാണ് ക്ഷേത്രമുള്ളത്. 2014ൽ ആരംഭിച്ച നവീകരണജോലികൾ ഡി.എംകെ സർക്കാർ അധികാരത്തിലെത്തിയ ശേഷമാണ് പൂർത്തിയാക്കിയത്. 7 കോടി രൂപ ചെലവഴിച്ചാണ് നവീകരണ പ്രവര്‍ത്തികള്‍ പൂര്‍ത്തിയാക്കിയത്.

പഴന്തമിഴ് സാഹിത്യത്തിലും ആദികേശവപ്പെരുമാളിനെ കുറിച്ചുള്ള പരാമര്‍ശങ്ങള്‍ കാണാം. ആദികേശവ ഭക്തനായ വലിയ ദിവാൻജി കേശവപിള്ള ഇവിടെ കേശവദാസനായി മാറി. ശ്രീപദ്മനാഭസ്വാമി ക്ഷേത്രത്തിനു സമാനമായി കൽമണ്ഡപങ്ങളിൽ നിർമിച്ച തിരുവട്ടാറിലെ ശീവേലിപ്പുരയും ചുറ്റമ്പലത്തിലെ ചുമർചിത്രശേഖരവും പ്രസിദ്ധമാണ്.

തിരുവനന്തപുരം പത്മനാഭ ക്ഷേത്രത്തുലെതിന് സമാനമായി പൈങ്കുനിയിലും അല്പശിയിലും ഉത്സവം പതിവുള്ള തിരുവട്ടാറിൽ 18 ദിവസം കഥകളിയുമുണ്ടാകും. തിരുവനന്തപുരത്ത് ആറാട്ടിന് രാജാവ് ഉടവാളേന്തി അകമ്പടി പോകുമ്പോൾ തിരുവട്ടാറിൽ രാജപ്രതിനിധിയായി ആറ്റിങ്ങൽ അമന്തിരത്തു പോറ്റി അകമ്പടി പോകും.

തമിഴ്നാട് ദേവസ്വം മന്ത്രി  ശേഖർ ബാബു, IT മന്ത്രി മനോ തങ്കരാജ് എന്നിവർ കുംഭാഭിഷേക ചടങ്ങുകളില്‍ പങ്കെടുക്കാനെത്തിയിരുന്നു. നവീകരണ പ്രവര്‍ത്തനങ്ങള്‍ പൂര്‍ത്തിയായ ശേഷമാണ് കുംഭാഭിഷേകം നടത്താനുള്ള നടപടി അധികൃതർ സ്വീകരിച്ചത്.

രണ്ടുതവണ ആവർത്തിച്ചുണ്ടായ കവർച്ചയിൽ ക്ഷേത്രത്തിലെ സ്വർണശേഖരത്തില്‍ ഭൂരിഭാഗവും നഷ്ടപ്പെട്ടു.  തിരുവട്ടാർ ക്ഷേത്രത്തിൽ വർഷങ്ങൾ നീണ്ട സ്വർണമോഷണം 1991-ൽ പുറംലോകമറിഞ്ഞു. വിഗ്രഹത്തിനു മുകളിൽ വിരിച്ച പട്ടുവസ്ത്രങ്ങൾ മറയാക്കിയാണ് കവർച്ച നടത്തിയത്. 1994-ൽ വീണ്ടും ക്ഷേത്രം കുത്തിത്തുറന്ന് കവർച്ച നടത്തി. നഷ്ടപ്പെട്ട സ്വർണത്തിന്റെ കണക്ക് മോഷ്ടാവിനേ അറിയൂവെന്നായിരുന്നു ദേവസ്വം ബോർഡിന്റെ നിലപാട്.

രണ്ടാമത്തെ കവർച്ചയിൽ രണ്ടുകോടിയോളം രൂപയുടെ സ്വർണവും രത്നവും നഷ്ടപ്പെട്ടെന്നാണ് ഏകദേശ കണക്ക്. കവർച്ചയെത്തുടർന്ന് നിത്യശ്രീബലി മുടങ്ങിയ ക്ഷേത്രത്തിൽ മൂന്ന് ഉത്സവങ്ങളും അന്ന് തടസ്സപ്പെട്ടു