Usain Bolt | ഉസൈൻ ബോൾട്ടിന്റെ വീട്ടിലെ 'ഇടിയും മിന്നലും'; ഇരട്ടക്കുട്ടികളുടെ അച്ഛനായി ഉസൈൻ ബോൾട്ട്

ട്രാക്കിൽ മിന്നൽ പിണർ വേഗത്തിൽ ഇടിവെട്ട് റെക്കോർഡ് സൃഷ്ടിച്ച വേഗ രാജാവ് ഉസൈൻ ബോൾട്ടിന്റെ വീട്ടിൽ ഇനി ആ പേരുകൾ വിളിച്ചാൽ വിളികേൾക്കാൻ രണ്ടു പേരുണ്ട്. ഫാദേഴ്സ് ഡേയ്ക്ക് ഉസൈൻ ബോൾട്ട് പങ്കുവെച്ച സന്തോഷ വാർത്ത ആരാധകരിൽ കൗതുകം സൃഷ്ടിച്ചിരിക്കുകയാണ്.

ഇരട്ടക്കുട്ടികളുടെ മാതാപിതാക്കളായതിന്റെ സന്തോഷമാണ് ജീവിതപങ്കാളി കാസി ബെന്നെറ്റിനൊപ്പം ഫാദേഴ്സ് ഡേയിൽ ഉസൈൻ ബോൾട്ട് അറിയിച്ചത്. ഒപ്പം രണ്ട് ഓമനകളുടെ ചിത്രവും.

മക്കൾക്ക് ബോൾട്ട് നൽകിയ പേരാണ് ആരാധകരെ അത്ഭുതപ്പെടുത്തിയത്. വേഗരാജാവായ ബോൾട്ട് മക്കൾക്ക് നൽകിയിരിക്കുന്നതും തന്റെ പേര് അന്വർത്ഥമാക്കുന്നതാണ്. രണ്ട് ആൺകുട്ടികളാണ് ബോൾട്ടിന് പിറന്നത്.

ഇരട്ടക്കുട്ടികൾക്ക് തണ്ടർ ബോൾട്ട്, സെയിന്റ് ലിയോ ബോൾട്ട് എന്നിങ്ങനെയാണ് പേര് നല്കിയിരിക്കുന്നത്. മൂത്ത മകള‍ുടെ പേരാകട്ടെ ഒളിമ്പ്യ ലൈറ്റനിങ് ബോൾട്ട് എന്നും. ഉസൈൻ ബോൾട്ടിന്റെ മിഡിൽ നെയിം ആണ് സെയിന്റ് ലിയോ എന്നത്. ഇരട്ടക്കുട്ടികൾ എന്നാണ് ജനിച്ചതെന്ന കാര്യം ഉസൈൻ ബോൾട്ട് വ്യക്തമാക്കിയിട്ടില്ല.

2020 മെയ് മാസത്തിലാണ് ലൈറ്റനിങ് ബോൾട്ട് ജനിച്ചത്. ആദ്യ മകൾ ജനിച്ച് രണ്ട് മാസം കഴിഞ്ഞായിരുന്നു ഉസൈൻ ബോൾട്ടും ഭാര്യയും കുഞ്ഞിന്റെ ചിത്രം ആദ്യമായി പുറത്തു വിട്ടത്.

പതിനൊന്ന് തവണ ലോക ചാമ്പ്യനായ വേഗതയേറിയ താരമാണ് ഉസൈൻ ബോൾട്ട്. 2008 മുതൽ 2016 വരെയുള്ള തുടർച്ചയായ മൂന്ന് വർഷങ്ങളിൽ ഒളിമ്പിക്സിൽ 100 മീറ്ററിലും 200 മീറ്ററിലും സ്വർണം നേടിയ താരമെന്ന റെക്കോർഡും ഈ ജമയ്ക്കൻ താരത്തിന്റെ പേരിലാണ്.

100 മീറ്റർ ലോക റെക്കോർഡും (9.58 സെക്കന്റ്), 200 മീറ്റർ ലോകറെക്കോർഡും (19.19 സെക്കന്റ്) ഇദ്ദേഹത്തിന്റെ പേരിലാണ്.

1977നു ശേഷം 100 മീറ്ററിലേയും 200 മീറ്ററിലേയും ലോകറെക്കോർഡുകൾക്ക് ഉടമയായ ആദ്യ കായികതാരമാണ് ബോൾട്ട്.