വർക്കല തീരം ഉണരുന്നു; ഇനി ആറുമാസക്കാലം സഞ്ചാരികളുടെ ഒഴുക്ക്

തീരത്തിന്റെ പ്രത്യേകതകൾ- ഇടവ വെറ്റക്കട മുതൽ ചിലക്കൂർ വരെ കടലിനെ പൊതിഞ്ഞു നിൽക്കുന്ന അഞ്ചര കിലോമീറ്റർ ദൈർഘ്യത്തിലുള്ള മലമടക്കുകളാണ് വർക്കല ടൂറിസത്തിന്റെ ആകർഷണം. കടലിനഭിമുഖമായി നിൽക്കുന്ന ചെങ്കൽ കുന്നുകൾ സഞ്ചാരികൾക്ക് കാഴ്ചയുടെ വിരുന്നൊരുക്കും.

വിശാലമായ തീരവും തീരത്തെ മനോഹരമായ പച്ചപ്പും മറ്റൊരു ഘടകമാണ്. കുന്നുകൾക്ക് കീഴിലെ നീരുറവകളിൽ നിന്നും അരിച്ചിറങ്ങുന്ന വെളളം ഔഷധമൂല്യമുള്ളതാണെന്നും പറയപ്പെടുന്നു.

ഓരോ വർഷവും ലോക വിനോദസഞ്ചാരികളുടെ വർക്കലയിലേക്കുള്ള ഒഴുക്ക് കൂടുകയാണ്. സീസൺ കാലത്ത് പൊതുവെ ശക്തി കുറഞ്ഞ തിരമാലയാണ് വർക്കലയിലേത്. ഇതാണ് സഞ്ചാരികളെ ആകർഷിക്കുന്ന ഒരു കാര്യം. എല്ലാ രാജ്യങ്ങളിൽ നിന്നും പാപനാശത്തേക്ക് സഞ്ചാരികളെത്തും.

ആത്മീയ ടൂറിസം -എല്ലാവർഷവും വർക്കലയിൽ മുടങ്ങാതെ എത്തുന്നവരും ചുരുക്കമല്ല. ആത്മീയ ടൂറിസം സാധ്യതകളും ഏറെയാണ്. ഇവിടുത്തെ കടലില്‍ മുങ്ങിനിവരുമ്പോള്‍ പാപങ്ങള്‍ ഇല്ലാതാകുന്നു എന്നാണ് വിശ്വാസം. പാപങ്ങളെ നശിപ്പിക്കുന്നതിനാല്‍ ഇവിടം 'പാപനാശം' എന്നറിയപ്പെടുന്നു. ജനാർദ്ദന സ്വാമി ക്ഷേത്രം, ശിവഗിരി, നടരാജ ഗുരുകുലം എന്നിവിടങ്ങളിലും സഞ്ചാരികളെത്തും.

പാപനാശത്തോട് ചേ‌ന്നുള്ള ക്ലിഫിൽ ആണ് റിസോർട്ടുകളും ഹോംസ്റ്റേകളും ഏറെയുള്ളത് . നവംബർ മുതൽ ഏപ്രിൽ വരെയാണ് ടൂറിസം സീസൺ എങ്കിലും വർഷത്തിൽ മുഴുവൻ സമയവും ഇവിടെ വിനോദസഞ്ചിരാകളുണ്ടാകും.

വൈവിധ്യമാർന്ന സീഫുഡുകൾ കിട്ടുന്ന റെസ്റ്റോറന്റുകളാണ് മറ്റൊരു പ്രത്യേകത. ക്ലിഫിൽകൂടിയുള്ള നടപ്പാത ഏകദേശം 7 കി.മി പിന്നിട്ടാൽ കടലും കായലും കൂടിച്ചേരുന്ന കാപ്പിലിൽ എത്തും.

സീസൺ ആകുന്നതോടെ രാജ്യത്തെ എല്ലാ സംസ്ഥാനങ്ങളിൽ നിന്നുള്ള കച്ചവടക്കാരും വർക്കലയെത്തും. തുണിത്തരങ്ങൾ, കരകൗശലം തുടങ്ങി നൂറിലേറെ കടകളാണ് ഇവിടെ പ്രവർത്തിക്കുന്നത്.

സർഫിങ്, പാരാഗ്ലൈഡിങ് എന്നിവയ്ക്കും സൗകാര്യമുണ്ടിവിടെ. കടലിലെ വൈവിധ്യമാർന്ന മത്സ്യസമ്പത്തുകളെ തിരിച്ചറിയാൻ വലിയ ഒരു അക്വേറിയം തിരുവമ്പാടി ബീച്ചിനോട് ചേർന്നുണ്ട്.