കല്യാണം കൂടാൻ വന്നവർ മടങ്ങിയത് പച്ചക്കറി തൈകളുമായി; വേറിട്ടൊരു വിവാഹം നിലമ്പൂരിൽ

മലപ്പുറം: വിവാഹ മണ്ഡപത്തിൽ സർക്കാരിന്റെ വിഷ രഹിത പച്ചക്കറി പദ്ധതിയുടെ ബാനർ, കല്യാണം കൂടാൻ വന്നവർക്ക് എല്ലാം ഓരോ പച്ചക്കറി തൈ... വേറിട്ടതായിരുന്നു രാഹുൽ - മഞ്ജുഷ ദമ്പതികളുടെ വിവാഹം.

നിലമ്പൂർ കൃഷി അസി.ഡയറക്ടർ ഓഫീസിലെ ജൂനിയർ ക്ലർക്കായ രാഹുൽ കൃഷ്ണന്റെ വിവാഹവേദി വിഷ രഹിത പച്ചക്കറി കൃഷിയുടെ പ്രചരണ വേദി കൂടിയായി. വരനും വധുവിനും ആശംസ നേർന്നു കൈ കൊടുക്കുമ്പോൾ തിരികെ ആ കൈകളിലേക്ക് ഒരു പച്ചക്കറി തൈ. അതിഥികൾക്ക് ആദ്യം അമ്പരപ്പ്, പിന്നെ സന്തോഷം.

നിലമ്പൂർ ബ്ലോക്കിലെ കൃഷി വകുപ്പ് ജീവനക്കാരാണ് വിവാഹ വേദിയിൽ വിഷരഹിത ജീവിത പ്രചരണവുമായി രംഗത്തിറങ്ങിയത്. കൃഷി അസി. ഡയറക്ടർ എമിപോളിന്റെ നേതൃത്വത്തിൽ ബെന്നി സെബാസ്റ്റ്യൻ, ഉമ്മർകോയ ടി, രജനി എം.കെ,അനു ആർ., നിഷാദ്, മിൻസി, ശ്രീജിത്ത് ,സതീഷ് പി.വി, ജയപ്രകാശ് .പി എന്നിവർ നേതൃത്വം നൽകി.

നമ്മുടെ കൃഷി നമ്മുടെ ആരോഗ്യം എന്ന മുദ്രവാക്യവുമായി കൃഷി വകുപ്പ് നടപ്പാക്കുന്ന ജീവനി പരിപാടിയുടെ ഭാഗമായാണ് പച്ചക്കറിതൈ വിതരണം രാഹുലിന്റെ വിവാഹ ചടങ്ങിൽ സംഘടിപ്പിച്ചത്.