ലോക്ക് ഡൗണിൽ പഠനം മുടങ്ങുമെന്ന പേടിവേണ്ട; വാട്സ്ആപ്പ് ഗ്രൂപ്പ് ക്ളാസ് മുറിയാക്കി നെടുവേലി സ്കൂൾ

തിരുവനന്തപുരം: ലോക്ക് ഡൗണിൽ കുടുങ്ങി പഠനം മുടങ്ങിപ്പോകാതെ വീടു തന്നെ ക്ലാസ് മുറിയാക്കിയിരിക്കുകയാണ് നെടുവേലി ഗവൺമെന്റ് സ്കൂളിലെ വിദ്യാര്‍ഥികൾ. ലോക്ക്ഡൗണിൽ പെട്ടുപോയതിന്റെ വിഷമമില്ലാതെ ഇനി നടക്കാനുള്ള പരീക്ഷകൾക്കായുള്ള തയ്യാറെടുപ്പിലാണ് ഇവർ. വാട്സ് ആപ്പ് ഗ്രൂപ്പ് വഴിയാണ് പഠനം.

എസ്എസ്എൽസി പരീക്ഷയ്ക്കുള്ള പഠന പ്രവർത്തനങ്ങളാണ് നടക്കുന്നത്. കഴിഞ്ഞ എട്ടു വർഷവും തുടർച്ചയായി എസ്എസ്എൽസി പരീക്ഷയ്ക്ക് നൂറു ശതമാനം വിജയം നേടിയ സ്കൂളാണ് നെടുവേലി ഗവ. സ്കൂൾ.

പത്താംക്ലാസിൽ ഇനി നടക്കേണ്ട ഗണിതം, ഫിസിക്സ്, കെമിസ്ട്രി പരീക്ഷകൾക്കായി വിദ്യാർഥികളെ ഒരുക്കുകയാണ് അധ്യാപകർ. എല്ലാ ദിവസവും 11 മണിക്ക് അധ്യാപകർ തയ്യാറാക്കുന്ന വീഡിയോ വാട്സ്ആപ്പ് ഗ്രൂപ്പിലൂടെ അധ്യാപകർ നൽകും. കുട്ടികളും ഈ സമയം ഓൺലൈനിൽ ഹാജരായിരിക്കും.

കുട്ടികള്‍ക്ക് ചെയ്തു നോക്കുന്നതിനും ഉത്തരങ്ങൾകണ്ടെത്തുന്നതിനുമായി വർക്ക് ഷീറ്റുകളും നൽകും. ഉത്തരങ്ങൾ കുട്ടികൾ അധ്യാപകർക്ക് അപ്ലോഡ് ചെയ്യണം. അധ്യാപകർ അവ മൂല്യ നിർണയം നടത്തി ഗ്രൂപ്പിൽ ഇടും.

പത്താംക്ലാസിലെ 134 കുട്ടികളെയും ഡിവിഷൻ അടിസ്ഥാനത്തിൽ പ്രത്യേകം വാട്സ്ആപ്പ് ക്ലാസ് ഗ്രൂപ്പിൽ ചേർത്തിട്ടുണ്ട്. ഓൺലൈൻ ക്ലാസ് ഉദ്ഘാടനം തിരുവനന്തപുരം ജില്ലാ വിദ്യാഭ്യാസ ഡെപ്യൂട്ടി ഡയറക്ടർ സി മനോജ് കുമാർ നിർവഹിച്ചു.

നിശ്ചിത വിഷയങ്ങളിൽവിദഗ്ധ ഫാക്കൽറ്റി അംഗങ്ങളുടെ ക്ലാസുകളും തുടർ ദിവസങ്ങളിൽ ക്രമീകരിച്ചിട്ടുണ്ട്. സംസ്ഥാനത്തെ മുഴുവൻ വിദ്യാലയങ്ങൾക്കും മാതൃകയായി തീർന്നിരിക്കുകയാണ് നെടുവേലി സർക്കാർ സ്കൂൾ.