World Photography Day | മികച്ച ചിത്രങ്ങള്‍ ക്ലിക്ക് ചെയ്യാൻ മികച്ച സ്ഥലങ്ങള്‍

വാലി ഓഫ് ഫ്ലവേഴ്സ്: ഉത്തരാഖണ്ഡിലെ പൂക്കളുടെ താഴ്വര ഇന്ത്യയിലെ ഫോട്ടോഗ്രാഫര്‍മാര്‍ക്ക് ഏറെ പ്രിയപ്പെട്ട ഇടമാണ്. സഞ്ചാരികളുടെ സ്വപ്നഭൂമിയായ ഈ താഴ്വരയില്‍ നിന്ന് അനേകം മികച്ച ചിത്രങ്ങള്‍ ജന്മമെടുത്തിട്ടുണ്ട്. ഗോവിന്ദാഘട്ടില്‍ നിന്ന് താഴ്വരയിലേക്കുള്ള യാത്രയ്ക്കിടയില്‍ നയനമനോഹരമായ നിരവധി കാഴ്ചകള്‍ നിങ്ങളെ കാത്തിരിക്കുന്നുണ്ട്.

ജയ്പൂര്‍: പിങ്ക് സിറ്റി എന്നറിയപ്പെടുന്ന രാജസ്ഥാനിലെ ജയ്പൂര്‍ ഫോട്ടോഗ്രഫിക്ക് അനുയോജ്യമായ ഇന്ത്യയിലെ മറ്റൊരു ഇടമാണ്. ജയ്പൂരിലെ പൗരാണിക കെട്ടിടങ്ങളും കോട്ടകളും പ്രദേശത്തിന്‍റെ രാജകീയ പ്രൗഢി പ്രതിഫലിക്കുന്നവയാണ്.

വാസ്തുവിദ്യാ സമ്പന്നമായ ജയ്പൂരിലെ രാജകീയ കെട്ടിടങ്ങള്‍ നിരവധി മനോഹരമായ ചിത്രങ്ങള്‍ ഫോട്ടോഗ്രാഫര്‍ക്ക് സമ്മാനിക്കുമെന്നുറപ്പാണ്.

ഇന്ത്യയിലെ ആത്മീയ കേന്ദ്രങ്ങളില്‍ പ്രഥമ സ്ഥാനത്ത് ഇടം നേടിയ വാരണാസി ലോകത്തിലെ തന്നെ ഏറ്റവും പഴക്കം ചെന്ന നഗരം കൂടിയാണ്. ക്ഷേത്രങ്ങളാല്‍ സമ്പന്നമായ ഇവിടം ഫോട്ടോഗ്രാഫര്‍മാരുടെ പ്രിയ സങ്കേതമാണ്. സ്നാന ഘട്ടങ്ങള്‍, ബോട്ടിലൂടെയുള്ള ഗംഗാ നദിയിലെ യാത്രയും, സന്ധ്യാ സമയം നടക്കുന്ന ഗംഗാ ആരതിയും മികച്ച ചിത്രങ്ങള്‍ സമ്മാനിക്കും.

കൊളോണിയല്‍ ഭരണകാലത്തിന്‍റെ അവേശഷിപ്പുകള്‍ പേറുന്ന പോണ്ടിച്ചേരിയിലെ കാഴ്ചകള്‍ അത്രമേല്‍ മനോഹരമാണ്. ഫ്രഞ്ച് വാസ്തുവിദ്യാ ശൈലിയിലുള്ള കെട്ടിടങ്ങളും വൃത്തിയുള്ള പാതകളും പോണ്ടിച്ചേരിയുടെ മുഖമുദ്രയാണ്. ബീച്ച് കേന്ദ്രീകരിച്ചും ടൂറിസം നടക്കുന്ന ഇവിടെ ഡിസംബര്‍ മാസത്തില്‍ സന്ദര്‍ശനം നടത്തുന്നതാണ് ഉചിതം.

ആന്‍ഡമാന്‍ ദ്വീപുകളിലെ പ്രകൃതി രമണീയമായ കാഴ്ചകളും തെളിഞ്ഞ നീല വെള്ളവും പച്ചപ്പ് നിറഞ്ഞ സ്ഥലങ്ങളും ലോകത്തിലെ ഏതൊരു പ്രമുഖ ബീച്ചുമായും മത്സരിക്കാന്‍ പോന്നതാണ്. അത്രയധികം മനോഹര ചിത്രങ്ങളാണ് ഈ ദ്വീപില്‍ നിന്ന് പിറവിയെടുത്തിരിക്കുന്നത്. അതിനാല്‍ എല്ലാ ഫോട്ടോഗ്രാഫര്‍മാരും നിര്‍ബന്ധമായും പോകേണ്ട ഇടമാണ് ആന്‍ഡമാന്‍ ദ്വീപുകള്‍.

ചരിത്രപരമായ വാസ്തുവിദ്യയും ശിൽപങ്ങളും ഇഷ്ടപ്പെടുന്ന ഒരാളാണെങ്കിൽ, മഹാരാഷ്ട്രയിലെ ഔറംഗബാദിലെ അജന്ത, അല്ലോറ ഗുഹകൾ നിങ്ങൾ തീർച്ചയായും സന്ദർശിക്കേണ്ട സ്ഥലങ്ങളാണ്.

ഇവിടുത്തെ ശില്‍പ ചാരുതയാര്‍ന്ന പാറക്കെട്ടുകള്‍ നിങ്ങളിലെ ഫോട്ടോഗ്രാഫര്‍ക്ക് അവിസ്മരണീയമായ ഒരു അനുഭവമാകും സമ്മാനിക്കുക.

മഞ്ഞുപുതച്ച ലഡാക്ക് താഴ്വരകള്‍ സഞ്ചാരികളുടെ ഇഷ്ട സങ്കേതമാണ്. പർവതനിരകളുടെ മനോഹാരിതയും വൃത്തിയുള്ള അന്തരീക്ഷവും നിങ്ങളെ അത്ഭുതപ്പെടുത്തുമെന്ന് ഉറപ്പാണ്. വര്‍ണ്ണശബളമായ പശ്ചാത്തലത്തില്‍ നിരവധി മികച്ച സ്നാപുകള്‍ നിങ്ങള്‍ക്ക് ലഡാക്കില്‍ നിന്ന് ലഭിക്കും .