ലഹരിക്കെതിരെ പ്രചാരണ ചിത്രവുമായി രാജാജിനഗർ കരിമഠം കോളനികളിലെ ചെറുപ്പക്കാർ

തിരുവനന്തപുരം: ലഹരി ഉപയോഗത്തിനെതിരേ പ്രചാരണ ചിത്ര നിർമ്മാണവുമായി കരിമഠം, ചെങ്കൽ ചൂള കോളനികളിലെ ചെറുപ്പക്കാർ. ചിത്രത്തിന്റെ സ്വിച്ച് ഓൺ കർമം ബുധനാഴ്ച രാവിലെ കരിമഠം കോളനിയിൽ രാജ്യസഭാ എം പി എ എ റഹിം നിർവഹിക്കും.

സംസ്ഥാന യുവജനക്ഷേമ ബോർഡ് സംഘടിപ്പിച്ച ഒരാഴ്ച നീണ്ടുനില്‍ക്കുന്ന സിനിമാ നിർമ്മാണ ശില്പശാലയുടെ ഭാഗമായാണ് വീഡിയോ നിർമ്മാണം. കോളനിയിലെ ചെറുപ്പക്കാർ തന്നെയാണ് ചിത്രത്തിന്റെ സംവിധാനവും ഏകോപനവും നിർവഹിക്കുക.

ജനുവരി 20 ആരംഭിച്ച ശില്പശാല ജനുവരി 27 വരെ നീളും. ചലച്ചിത്ര സംവിധായകൻ ജിയോ ബേബിയാണ് ചലചിത്ര ക്യാമ്പ് ഉദ്ഘാടനം ചെയ്തത്. ക്യാമ്പ് ഇപ്പോൾ 5 ദിവസം പിന്നിട്ടു കഴിഞ്ഞു. സംവിധായിക വിധുവിൻസന്റാണ് ക്യാമ്പ് ഡയറക്ടർ.

ഭാഗ്യലക്ഷ്മി, തിരക്കഥാകൃത്തുക്കളായ ജി ആർ ഇന്ദുഗോപൻ, ഉമേഷ് ഓമനക്കുട്ടൻ, സംവിധായകൻ ബൈജു രാജ്, ആക്ടിംഗ് ട്രെയിനർ ശ്യാം രജി, മാൻഹോൾ ഫെയിം സുനി, സിനിമാട്ടോഗ്രാഫർ മനോജ് നാരായണൻ, ലൂയിസ് മാത്യു തുടങ്ങിയവരാണ് ക്യാമ്പിലെ വിവിധ ക്ലാസുകൾ നയിക്കുന്നത്. ഡി ക്ലൗഡ് ക്രിയേഷൻസും, ബ്ലൂ പോയിന്റുമായി ചേർന്നാണ് ക്യാമ്പ് സംഘടിപ്പിച്ചിരിക്കുന്നത്.