പിൻസീറ്റിൽ ഹെൽമെറ്റില്ലാ യാത്ര; ബൈക്ക് ഉടമകൾക്ക് 'പണി' വീട്ടിലെത്തി തുടങ്ങി

കോട്ടയം: പിൻസീറ്റിൽ ഹെൽമെറ്റ് ധരിക്കാതെ യാത്ര ചെയ്ത സംഭവത്തിൽ ബൈക്ക് ഉടമകൾക്ക് പിഴ ഈടാക്കിക്കൊണ്ടുള്ള നോട്ടീസ് അയച്ച് മോട്ടോർ വാഹന വകുപ്പ്. കേന്ദ്ര മോട്ടോർ വാഹന നിയമത്തിലെ വകുപ്പ് 129ന് വിരുദ്ധമായി ഹെൽമെറ്റ് ധരിക്കാതെ യാത്ര ചെയ്തതായി കണ്ടെത്തിയിട്ടുണ്ടെന്നും ഇത് കേന്ദ്ര മോട്ടോർ വാഹന നിയമ വകുപ്പ് 194ഡി പ്രകാരം ശിക്ഷാർഹമാണെന്നും നോട്ടീസിൽ പറയുന്നു.

500 രൂപ പിഴ ഈടാക്കാനും നിർദേശിക്കുന്നു. കൂടാതെ പിൻസീറ്റിൽ ഹെൽമെറ്റ് ധരിക്കാതെ യാത്ര ചെയ്ത ദിവസം വാഹനമോടിച്ച ഡ്രൈവറെ ലൈസൻസ് സഹിതം ആർ.ടി. ഓഫീസിൽ ഹാജരാക്കി വിശദീകരണം നൽകാനും നോട്ടീസിൽ നിർദേശിക്കുന്നു.

അല്ലാത്തപക്ഷം ബൈക്ക് ഉടമയ്ക്കെതിരെ പ്രോസിക്യൂഷൻ നടപടി സ്വീകരിക്കുമെന്നും മുന്നറിയിപ്പ് നൽകുന്നുണ്ട്.