രാജ്യത്ത് ആറുമാസത്തിനുള്ളിൽ നടന്നത് 1,13,000 കോടിയുടെ ബാങ്ക് തട്ടിപ്പ്; 4,412 തട്ടിപ്പ് കേസുകൾ

മുംബൈ: ഈ സാമ്പത്തികവർഷത്തിലെ(2019-20) ആദ്യ ആറുമാസത്തിനുള്ളിൽ രാജ്യത്ത് 1,13,000 കോടി രൂപയുടെ തട്ടിപ്പ് നടന്നതായി റിസർവ് ബാങ്കിന്‍റെ സാമ്പത്തിക സുസ്ഥിരതാ റിപ്പോർട്ട്. തട്ടിപ്പുകളിലേറെയും ബാങ്കുകൾ കണ്ടെത്താൻ വൈകിയെന്നും റിപ്പോർട്ട് പറയുന്നു. കഴിഞ്ഞ സാമ്പത്തിക വർഷത്തിൽ(2018-19) 6801 കേസുകളിലായി 71,543 കോടി രൂപയുടെ തട്ടിപ്പാണ് നടന്നത്.

ഒരു ലക്ഷത്തിന് മുകളിൽ തട്ടിപ്പ് നടത്തിയതുമായി ബന്ധപ്പെട്ട് 4412 കേസുകൾ രജിസ്റ്റർ ചെയ്തു. 50 കോടി രൂപയിലേറെ തട്ടിപ്പ് നടത്തിയ 398 കേസുകൾ രജിസ്റ്റർ ചെയ്തിട്ടുണ്ട്. ഇതുമാത്രം 1.05 ലക്ഷം കോടി രൂപയുടെ തട്ടിപ്പാണ്. വായ്പയുമായി ബന്ധപ്പെട്ട തട്ടിപ്പുകളാണ് കൂടുതൽ നടന്നത്.

കഴിഞ്ഞ സാമ്പത്തികവർഷത്തിൽ നടന്ന തട്ടിപ്പുകളിൽ 90.6 ശതമാനവും 2001-18 കാലയളവിൽ നടന്നതാണെങ്കിൽ ഈ സാമ്പത്തകിവർഷത്തിലെ തട്ടിപ്പുകളിൽ 97.3 ശതമാനവും ഒരു വർഷത്തിന് മുകളിൽ നടന്നതാണ്.