വളർച്ചാനിരക്ക് 4.5% മാത്രം; ഇപ്പോഴും അഞ്ച് ട്രില്യൺ ഡോളർ പ്രതീക്ഷ കാത്ത് ധനമന്ത്രി നിർമല സീതാരാമൻ

ന്യൂഡൽഹി: രാജ്യത്തെ സാമ്പത്തിക വളർച്ച 4.5 ശതമാനത്തിലെത്തി. ആറര വർഷത്തിനുശേഷമുള്ള ഏറ്റവും കുറഞ്ഞ വളർച്ചാ നിരക്കാണിത്. വളർച്ചാനിരക്ക് കുത്തനെ താഴേക്ക് വന്നെങ്കിലും അഞ്ച് ട്രില്യൺ ഡോളർ സമ്പദ്‌വ്യവസ്ഥ എന്ന പ്രതീക്ഷ ഇപ്പോഴുമുണ്ടെന്ന് കേന്ദ്ര ധനമന്ത്രി നിർമല സീതാരാമൻ പറഞ്ഞു.

സാമ്പത്തിക മാന്ദ്യത്തിനിടയിൽ കോർപ്പറേറ്റ് നികുതി നിരക്ക് കുറയ്ക്കാൻ മോദി സർക്കാർ സ്വീകരിച്ച നടപടി ചരിത്രപരമായ നീക്കമാണെന്ന് നിർമ്മല സീതാരാമൻ പറഞ്ഞു. 5 ട്രില്യൺ ഡോളർ സമ്പദ്‌വ്യവസ്ഥ എന്ന ലക്ഷ്യത്തിലേക്ക് എത്താൻ നിക്ഷേപവും വ്യാവസായിക വളർച്ചയും പ്രോത്സാഹിപ്പിക്കേണ്ടതുണ്ട്. ഇതിന് ഉതകുന്ന ചരിത്രപരമായ നീക്കമാണ് മോദി സർക്കാർ നടത്തിയത്. രാജ്യത്തെ ഇപ്പോഴത്തെ കോർപറേറ്റ് നികുതി നിരക്ക് ലോകത്തിലെതന്നെ ഏറ്റവും കുറഞ്ഞതാണെന്നും ട്വിറ്ററിലൂടെ ധനമന്ത്രി പറഞ്ഞു.

സെപ്റ്റംബർ 30ന് അവസാനിച്ച സാമ്പത്തികവർഷത്തിലെ രണ്ടാം പാദത്തിലെ കണക്ക് പ്രകാരമാണ് മൊത്ത ആഭ്യന്തര ഉത്പാദനം(ജിഡിപി) 4.5 ശതമാനത്തിലേക്ക് താഴ്ന്നത്. കഴിഞ്ഞ വർഷം ഇതേ സമയം ഏഴ് ശതമാനമായിരുന്നു ജിഡിപി. നടപ്പു സാമ്പത്തികവർഷത്തിലെ ആദ്യ പാദത്തിൽ(ഏപ്രിൽ-ജൂൺ) അഞ്ച് ശതമാനമായിരുന്നു ജിഡിപി. ആദ്യ പാദത്തിൽ തന്നെ ഇന്ത്യ ചൈനയ്ക്ക് പിന്നിലായിരുന്നു. ചൈനയിൽ വളർച്ചാ നിരക്ക് ആറ് ശതമാനമാണ്.

2013 ജനുവരി മാസത്തിനുശേഷമുള്ള ഏറ്റവും കുറഞ്ഞ വളർച്ചാനിരക്കിലാണ് ഇപ്പോൾ ഇന്ത്യൻ സമ്പദ് രംഗം. 2012-13 ജനുവരി-മാർച്ച് കാലഘട്ടത്തിൽ 4.3 ശതമാനമായിരുന്നു ഇവിടുത്തെ സാമ്പത്തിക വളർച്ച.