കേരളത്തിന് എന്തൊക്കെ ലഭിക്കും? രണ്ടാം മോദി സർക്കാരിന്‍റെ ആദ്യ ബജറ്റ് ഇന്ന്

ന്യൂഡൽഹി: രണ്ടാം മോദി സർക്കാരിന്റെ പ്രഥമ ബജറ്റ് ഇന്ന്. സാമ്പത്തിക പ്രതുസന്ധി മറികടക്കുകയെന്ന വെല്ലുവിളിക്കിടെയാണ് ധനമന്ത്രി നിർമ്മല സീതാരാമൻ കന്നി ബജറ്റ് അവതരിപ്പിക്കുന്നത്. കാർഷിക മേഖലയ്ക്ക് ഊന്നൽ നൽകുന്ന പ്രഖ്യാപനങ്ങൾ ഉണ്ടാകുമെന്നാണ് പ്രതീക്ഷ. കൂടുതൽ ആദായ നികുതി ആനുകൂല്യങ്ങൾ ഉണ്ടാകുമോയെന്നതും ശ്രദ്ധേയമാകും. പ്രളയ പുനർ നിർമ്മാണത്തിന് പാക്കേജ്, AIIMS എന്നിവയാണ് കേരളത്തിന്റെ പ്രതീക്ഷ.

ജിഡിപി കണക്കുകൾ, ഉൽപ്പന്ന നിർമ്മാണ മേഖലയിലെ കണക്കുകൾ, തൊഴിൽ വളർച്ചാ കണക്കുകൾ എന്നിവ സർക്കാരിന് ശുഭകരമല്ല. ഇന്നലെ സഭയിൽ വച്ച സാമ്പത്തിക സർവേയിൽ ലക്ഷ്യമിടുന്നത് 7 ശതമാനം വളർച്ചാ നിരക്ക്. ധനക്കമ്മി 6.4 ശതമാനത്തിൽ നിന്ന് 5.8 ശതമാനമായി കുറയ്ക്കുകയെന്ന ലക്ഷ്യം.

ഈ പശ്ചാത്തലത്തിൽ രണ്ടാം മോഡി സർക്കാരിന്റെ ആദ്യ ബജറ്റിൽ എന്തൊക്കെ ജനപ്രിയ പ്രഖ്യാപനങ്ങൾ, എന്തൊക്കെ കടുത്ത നടപടികൾ എന്നാണ് അറിയേണ്ടത്. നികുതി സ്ളാബുകളും ആനുകൂല്യങ്ങളും പുനഃപരിശോധിക്കുമെന്നാണ് ബിജെപി പ്രകടന പത്രികയിലെ വാഗ്‌ദാനം.

അതുകൊണ്ട് കൂടുതൽ ആദായ നികുതി ഇളവുകൾ ഉണ്ടാകുമോ എന്നതിലാണ് മധ്യവർഗത്തിന്റെ നോട്ടം. അഞ്ചു ലക്ഷം വരെ നികുതി വിധേയ വരുമാനം ഉള്ളവരെ ആദായ നികുതി പരിധിയിൽ നിന്ന് ഒഴിവാകുമെന്നായിരുന്നു ഇടക്കാല ബജറ്റിലെ പ്രഖ്യാപനം. ആദായനികുതി ഇളവിനുള്ള വരുമാനപരിധിയായ നിലവിലെ 2.5 ലക്ഷം രൂപ 3 ലക്ഷം രൂപയായി ഉയർത്തിയേക്കാം. 80 ഡിയിൽ മെഡിക്കൽ ഇൻഷുറൻസിന് നൽകുന്ന ഇളവ് 10,000 രൂപ കൂടി ഉയർത്തിയേക്കാം.

നാഷനൽ പെൻഷൻ സ്കീമിന് പൂർണ ഇളവനുവദിച്ച് പിപിഎഫ്, ഇപിഎഫ് എന്നിവയ്ക്കു തുല്യമാക്കുന്നതും പരിഗണനയിൽ. കർഷകർക്ക് 6000 രൂപ വാർഷിക സഹായമെന്ന ഇടക്കാല ബജറ്റിലെ പ്രഖ്യാപനത്തിന്റെ തുടർച്ചയായി കാർഷിക മേഖലയ്ക്ക് ആനുകൂല്യങ്ങൾ പ്രതീക്ഷിക്കാം. എല്ലാവർക്കും

വീട് പദ്ധതി, സ്റ്റാർട്ട് അപ്പ്‌ ഇന്ത്യ എന്നിവയ്ക്കും ബജറ്റിൽ മുൻഗണന ലഭിക്കാനാണ് സാധ്യത. AIIMS, പ്രളയ പുനര്നിര്മ്മാണ പാക്കേജ് തുടങ്ങിയ ആവശ്യങ്ങൾ മുന്നോട്ട് വച്ച കേരളവും പ്രതീക്ഷയിലാണ്.