Kerala Gold Price Today, 25 April| സ്വർണവില വീണ്ടും മുകളിലേക്ക്; ഇന്നത്തെ നിരക്കുകൾ അറിയാം

തിരുവനന്തപുരം: സംസ്ഥാനത്ത് ഇടവേളയ്ക്ക് ശേഷം സ്വർണവില വീണ്ടും ഉയർന്നു. ഇന്ന് ഗ്രാമിന് 20 രൂപയും പവന് 160 രൂപയുമാണ് കൂടിയത്. ഇതോടെ ഒരു ഗ്രാം സ്വർണത്തിന് 5585 രൂപയും പവന് 44,680 രൂപയുമായി.

അക്ഷയ തൃതീയക്ക് പിന്നാലെ ഇന്നലെ (തിങ്കളാഴ്ച) സംസ്ഥാനത്ത് സ്വര്‍ണവില കുറഞ്ഞിരുന്നു. പവന് 80 രൂപ കുറഞ്ഞ് 44520 രൂപയിലാണ് ഇന്നലെ വ്യാപാരം നടന്നത്. ഗ്രാമിന് 5565 രൂപയായിരുന്നു ഇന്നലെ.

അക്ഷയതൃതീയ ദിനമായ ഏപ്രില്‍ 22 ന് 44600 രൂപയായിരുന്നു ഒരു പവന്‍ സ്വര്‍ണത്തിന്‍റെ വില. പിന്നീടുള്ള ദിവസങ്ങളില്‍ മാറ്റമില്ലാതെ തുടര്‍ന്നശേഷമാണ് ഇന്നലെ സ്വര്‍ണവില കുറഞ്ഞത്.

വിഷുവിന് തലേന്ന് ഏപ്രില്‍ 14നായിരുന്നു സ്വര്‍ണവിപണി ഈ മാസത്തേ ഏറ്റവും ഉയര്‍ന്ന നിലയിലെത്തിയത്. 45320 രൂപ. പിന്നീടുള്ള ദിവസങ്ങളില്‍ കൃത്യമായ ഏറ്റക്കുറച്ചിലുകള്‍ക്ക് ശേഷം അക്ഷയ തൃതീയയോട് അടുത്ത ദിവസങ്ങളില്‍ 44600 എന്ന വിലയിലേക്ക് സ്വര്‍ണമെത്തി.

അതേസമയം സംസ്ഥാനത്ത് ഇന്ന് വെള്ളിയുടെ വിലയും ഉയർന്നു. ഇന്നലെ കുറഞ്ഞ വെള്ളിവിലയാണ് ഇന്ന് ഉയർന്നത്. ഒരു ഗ്രാം സാധാരണ വെള്ളിക്ക് ഒരു രൂപ ഉയർന്ന് 81 രൂപയായി

അക്ഷയ തൃതിയ ദിവസം സ്വർണവിലയിൽ ഉണ്ടായ ഇടിവ് വ്യാപാരമേഖലയിൽ ഉണർവ് സൃഷ്ടിച്ചിരുന്നു. അക്ഷയ തൃതീയ സ്വർണോൽസവം കേരളമെമ്പാടുമുള്ള ജുവലറികളിൽ ആഘോഷ പൂർവ്വം നടന്നു. ഈദ് ആഘോഷം കൂടിയായതോടെ ഉപഭോക്താക്കളുടെ എണ്ണം വർദ്ധിച്ചു.ഏകദേശം 7 ലക്ഷത്തോളം ഉപഭോക്താക്കളാണ് കേരളത്തിലെ 12000 ഓളം സ്വർണ വ്യാപാരശാലകളിലേക്കെത്തിച്ചേർന്നത് എന്നാണ് കണക്ക്.

ലൈറ്റ് വെയിറ്റ് ആഭരണങ്ങളുടെ വിൽപനയാണ് കൂടുതൽ നടന്നത്. നാണയങ്ങൾ, ഡയമണ്ട്, വെള്ളി, പ്ലാറ്റിനം ആഭരണങ്ങൾക്കും വൻ ഡിമാൻഡ് ആയിരുന്നു.

കഴിഞ്ഞ വർഷത്തെക്കാൾ 18% വർദ്ധനവാണ് വിലയിലെങ്കിലും അതൊന്നും സ്വർണവിൽപനയിൽ പ്രതിഫലിച്ചില്ല. വില കുറഞ്ഞതും വ്യാപാരത്തോത് ഉയർത്തി.കഴിഞ്ഞ വർഷത്തെക്കാൾ 20 ശതമാനത്തിലധികം വ്യാപാരം ശനിയാഴ്ച മാത്രം നടന്നതായിട്ടാണ് റിപ്പോർട്ടുകൾ.