യെസ് ബാങ്കിന്റെ നിയന്ത്രണം ആർബിഐ ഏറ്റെടുത്തു; നടപടി നിക്ഷേപകരുടെ താൽപര്യം സംരക്ഷിക്കാൻ

ന്യൂഡൽഹി: യെസ് ബാങ്കിന്റെ നിയന്ത്രണം റിസർവ് ബാങ്ക് ഓഫ് ഇന്ത്യ (ആർബിഐ) ഏറ്റെടുത്തത് നിക്ഷേപകരുടെ താൽപര്യം സംരക്ഷിക്കാൻ. മോറട്ടോറിയം പ്രഖ്യാപിച്ച ആർബിഐ, അക്കൗണ്ട് ഉടമകൾക്ക് പ്രതിമാസം പിൻവലിക്കാവുന്ന തുകയുടെ പരിധി 50,000 രൂപയായി നിജപ്പെടുത്തി.

ബാങ്കിന്റെ ബോർഡ് ഓഫ് ഡയറക്ടേഴ്സിനെ സസ്പെൻഡ് ചെയ്യ്ത് എസ്ബിഐ മുൻ സിഎഫ്ഒ പ്രശാന്ത് കുമാറിനെ അഡ്മിനിസ്ട്രേറ്ററായി ആർബിഐ നിയമിച്ചു. നിക്ഷേപകരുടെ താൽപര്യം സംരക്ഷിക്കാൻ സർക്കാരുമായി ആലോചിച്ചാണ് ഇത്തരമൊരു നടപടി എടുത്തതെന്ന് ആർബിഐ വ്യക്തമാക്കി.

മറ്റ് ധനകാര്യ സ്ഥാപനങ്ങളെക്കൂടി ഉൾപ്പെടുത്തി കൂട്ടായ്മ രൂപീകരിച്ച ശേഷം നിശ്ചിത ഓഹരികൾ വാങ്ങാനുള്ള നടപടികളുമായി മുന്നോട്ടു പോകാൻ എസ്ബിഐക്ക് സർക്കാർ അനുമതി നൽകി.

ഇന്നലെ എസ്ബിഐ പ്രത്യേക ബോർഡ് യോഗം ചേർന്നു. 10,000 കോടി രൂപയുടെ കിട്ടാക്കടം മൂലം പ്രതിസന്ധി നേരിടുന്ന യെസ് ബാങ്ക്, മൂലധനം ഉയർത്താനുള്ള തീവ്ര ശ്രമത്തിലാണ്.

ധനസ്ഥാപനങ്ങളെ തെരഞ്ഞെടുക്കാനുള്ള അവകാശം എൽഐസിക്കും എസ്ബിഐക്കുമാണ്.

സാമ്പത്തിക വർഷം 200 കോടി ഡോളർ നടപ്പു മൂലധനമായി സമാഹരിക്കാനാണ് യെസ് ബാങ്ക് ലക്ഷ്യമിടുന്നത്.

 2019 ജൂണിലെ കണക്ക് പ്രകാരം ആസ്തി 2,71,160 കോടി രൂപയാണ്.

എസ്ബിഐ യും എൽഐസിയും യെസ് ബാങ്കിന്റെ 49% ഓഹരി വാങ്ങാനും നീക്കമുണ്ട്.

ഇതിനായി 490 കോടി രൂപ ചെലവഴിക്കേണ്ടിവരും.