തൽക്കാലം എച്ച്ഡിയും അൾട്രാ എച്ച്ഡിയുമില്ല; യൂട്യൂബിലും ഫേസ്ബുക്കിലും വീഡിയോ ക്വാളിറ്റി കുറഞ്ഞതിന് കാരണം

ഇന്ത്യയിൽ വിവിധ ഡിജിറ്റൽ പ്ലാറ്റ്ഫോമുകളിലെ വീഡിയോ നിലവാരം കുറയും. ഉന്നത നിലവാരത്തിലുള്ള എച്ച്.ഡി, അൾട്രാ എച്ച്.ഡി വീഡിയോകൾ തൽക്കാലത്തേക്ക് ഉണ്ടാകില്ല. ഫേസ്ബുക്ക്, യൂട്യൂബ്, വൂട്ട്, നെറ്റ്ഫ്ലിക്സ്, ആമസോൺ പ്രൈം, ഹോട്ട് സ്റ്റാർ തുടങ്ങിയവയിലെ വീഡിയോ ക്വാളിറ്റിയാണ് കുറയ്ക്കുന്നത്.

രാജ്യത്ത് മാർച്ച് 24 അർധരാത്രിമുതൽ ലോക്ക് ഡൌൺ പ്രഖ്യാപിച്ചതോടെ കൂടുതൽ ആളുകളും ജോലിക്ക് പോകാതെ വീട്ടിൽ ഇരിപ്പായി. ഇവർ മൊബൈലിൽ ഡാറ്റ ഉപയോഗിച്ച് തുടങ്ങിയതോടെ രാജ്യത്തെ ഇന്‍റർനെറ്റ് വേഗത വൻതോതിൽ ഇടിഞ്ഞു.

ഈ സാഹചര്യത്തിലാണ് രാജ്യത്തെ പ്രമുഖ ഡിജിറ്റൽ പ്ലാറ്റ്ഫോമുകളുടെ പ്രതിനിധികൾ യോഗം ചേർന്ന് പ്രതിസന്ധി പരിഹരിക്കാനുള്ള ഇടപെടൽ നടത്താൻ ധാരണയയാത്. ഇതിന്‍റെ ഭാഗമായാണ് വീഡിയോ സ്ട്രീമിങ് ക്വാളിറ്റി കുറയ്ക്കാൻ തീരുമാനിച്ചത്.

രാജ്യത്തെ ഇന്‍റർനെറ്റ് ഉപഭോഗം കൂടുതലായതിനാൽ അതിന് തടസമുണ്ടാകരുതെന്ന് കേന്ദ്രസർക്കാർ ടെലികോം സേവനദാതാക്കളോട് ആവശ്യപ്പെട്ടിരുന്നു. ഈ സാഹചര്യത്തിലാണ് അടിയന്തര യോഗം ചേർന്ന് ഡിജിറ്റൽ പ്ലാറ്റ്ഫോമുകൾ തടസമില്ലാതെ ലഭ്യമാകുന്നതിനുള്ള നടപടി സ്വീകരിക്കുന്നത്.

സെല്ലുലാർ നെറ്റ്‌വർക്കുകളിൽ 480 പിയിൽ കൂടാത്ത ബിട്രേറ്റുകളിൽ, എച്ച്ഡി, അൾട്രാ എച്ച്ഡി സ്ട്രീമിംഗ് എന്നിവ തൽക്കാലത്തേക്ക് നിർത്തിവെച്ചു.

അതേസമയം നിലവാരം കുറഞ്ഞ എസ്.ഡി വീഡിയോ കണ്ടന്‍റുകൾ തടസമില്ലാതെ ലഭിക്കുന്നതിനുള്ള എല്ലാ നടപടികളും ഉടനടി സ്വീകരിക്കാമെന്നാണ് ഡിജിറ്റൽ കമ്പനികളുടെ യോഗം തീരുമാനിച്ചത്. ഇപ്പോൾ സ്വീകരിച്ച നടപടികൾ ഏപ്രിൽ 14 വരെ തുടരും.

സ്റ്റാർ & ഡിസ്നി ഇന്ത്യ ചെയർമാൻ ഉദയ് ശങ്കറിന്‍റെ നേതൃത്വത്തിൽ നടന്ന യോഗത്തിൽ എൻ‌പി സിംഗ് (സോണി), സഞ്ജയ് ഗുപ്ത (ഗൂഗിൾ), അജിത് മോഹൻ (ഫേസ്ബുക്ക്), സുധാൻഷു വാട്സ് (വിയാകോം 18), ഗൌരവ് ഗാന്ധി (ആമസോൺ പ്രൈം വീഡിയോ), പുനിത് ഗോയങ്ക (സീ), നിഖിൽ ഗാന്ധി ( ടിക്ടോക്ക്), അംബിക ഖുറാന (നെറ്റ്ഫ്ലിക്സ്), കരൺ ബേഡി (എംഎക്സ് പ്ലെയർ), വരുൺ നാരംഗ് (ഹോട്ട്സ്റ്റാർ) എന്നിവർ പങ്കെടുത്തു.