Facebook Privacy പ്രൊഫൈൽ ലോക്ക് ചെയ്ത് സ്വകാര്യത സംരക്ഷിക്കാം; സ്ത്രീകൾക്കായി ഫേസ്ബുക്കിന്റെ പുതിയ ഫീച്ചർ

പുതിയ സുരക്ഷാ ഫീച്ചറുമായി ഫേസ്ബുക്ക്. പ്രൊഫൈൽ ലോക്ക് ചെയ്തുകൊണ്ട് സ്വകാര്യത സംരക്ഷിക്കാൻ കഴിയുന്ന ഫീച്ചർ ഫേസ്ബുക്ക് ഇന്ത്യയിലെ ഉപയോക്താക്കൾക്കായി ഫേസ്ബുക്ക് അവതരിപ്പിച്ചിരിക്കുകയാണ്.

പ്രൊഫൈൽ പൂർണമായി ലോക്ക് ചെയ്യുന്നതിലൂടെ ഒരാളുടെ ഫേസ്ബുക്ക് പോസ്റ്റുകളും ഫോട്ടോകളും വീഡിയോകളുമൊക്കെ അവരവരുടെ ഫ്രെണ്ട്സ് ലിസ്റ്റിലുള്ളവർക്ക് മാത്രമേ കാണാൻ കഴിയുകയുള്ളൂ.

ഫേസ് ബുക്ക് ഉപയോഗിക്കുന്നവരുടെ, പ്രത്യേകിച്ച് സ്ത്രീ ഉപയോക്താക്കളുടെ സ്വകാര്യത സംരക്ഷിക്കുന്നതിനാണ് പുതിയ ഫീച്ചർ ഫേസ്ബുക്ക് അവതരിപ്പിച്ചിരിക്കുന്നത്.

ഫേസ് ബുക്ക് ഉപയോഗിക്കുന്ന സ്ത്രീകളുടെ ആശങ്കകളെ കുറിച്ച് ഞങ്ങൾക്കറിയാം. വളരെ എളുപ്പത്തിൽ ഓൺലൈനിൽ സ്വകാര്യതയും സുരക്ഷയും ഉറപ്പു വരുത്തുന്ന ഒരു ഫീച്ചർ അവതരിപ്പിച്ചിരിക്കുകയാണ്- ഫേസ്ബുക്ക് ഇന്ത്യയുടെ പോളിസി ഡയറക്ടർ ആംഘി ദാസ് പറഞ്ഞു.

സ്വകാര്യത സംരക്ഷിക്കുന്നതിനായി മുമ്പ് ഫേസ് ബുക്ക് അവതരിപ്പിച്ചിട്ടുള്ള സുരക്ഷാ ക്രമീകരണങ്ങളുടെ പിൻഗാമിയാണ് പ്രൊഫൈൽ ലോക്ക്. പ്രൊഫൈല്‍ ലോക്ക് ചെയ്ത് കഴിഞ്ഞാല്‍ സുഹൃത്തുക്കൾ അല്ലാത്ത ആളുകൾക്ക് അയാളുടെ പ്രൊഫൈല്‍ ചിത്രം മാത്രമേ കാണാന്‍ സാധിക്കൂ. പ്രൊഫൈല്‍ ലോക്ക് ചെയ്യപ്പെട്ടിട്ടുണ്ടെന്ന നീല ബാഡ്ജും ഇതിൽ ഉണ്ടായിരിക്കും.

പ്രൊഫൈൽ പേജില്‍ പേരിനു ചുവട്ടിലുള്ള മോർ ഓപ്ഷനിൽ ക്ലിക്ക് ചെയ്യുക.ലോക്ക് പ്രൊഫൈൽ എന്ന ഓപ്ഷൻ അവിടെയാണുള്ളത്. ഇതിൽ ക്ലിക്ക് ചെയ്ത് പ്രൊഫൈൽ ലോക്ക് ചെയ്യാം.