ന്യൂയോർക്ക്: 22 വർഷം മുമ്പ് കാണാതായ ആളുടെ മൃതദേഹം ഗൂഗിൾ മാപ്പിന്‍റെ സഹായത്തോടെ കണ്ടെത്തി. ഗൂഗിൾ എർത്ത് ആപ്പ് ഉപയോഗിച്ച് നടത്തിയ പരിശോധനയിലാണ് ഫ്ലോറിഡയ്ക്ക് സമീപത്തുള്ള തടാകത്തിൽ ഒരു കാർ മുങ്ങിക്കിടക്കുന്നതെന്ന് കണ്ടെത്തിയത്.
1997 നവംബർ ഏഴിന് രാത്രി കാണാതായ വില്യം മോൾഡ് എന്നയാളാണ് കാറിനുള്ളിൽ ഉണ്ടായിരുന്നതെന്ന് പരിശോധനയിൽ വ്യക്തമായി.
കാണാതായ ദിവസം രാത്രി ക്ലബ്ബിൽ പോയ വില്യം തിരിച്ചെത്തിയില്ല. കാണാതായപ്പോൾ വില്യമിന് 40 വയസ്സായിരുന്നു.
വില്യമിനെ കാണാതായ വിവരം പൊലീസിൽ അറിയിച്ചിരുന്നു. എന്നാൽ വിശദമായ അന്വേഷണത്തിൽ വില്യമിനെക്കുറിച്ച് ഒരു വിവരവും കണ്ടെത്താൻ പൊലീസിന് സാധിച്ചിരുന്നില്ല.
വില്യമിനെ കാണാതായി 22 വർഷത്തിനുശേഷം പോലീസിന് ലഭിച്ച ഒരു ഫോൺ കോളാണ് നിർണായകമായത്. ഗൂഗിൾ മാപ്പ് വഴി തടാകത്തിൽ കണ്ട ഒരു കാറിനെക്കുറിച്ചാണ് വിളിച്ചയാൾ പൊലീസിന് സൂചന നൽകിയത്.
പ്രോപ്പർട്ടി സർവേയറായ ഇയാൾ തന്‍റെ പ്രദേശത്തെക്കുറിച്ച് ഗൂഗിൾ എർത്ത് ഉപയോഗിച്ച് നടത്തിയ പരിശോധനയിലാണ് തടാകത്തിൽ കാർ കണ്ടെത്തിയത്. ഇക്കാര്യം ഉടൻ തന്നെ പൊലീസിനെ വിളിച്ച് അറിയിക്കുകയായിരുന്നു.
2007 മുതൽ ഗൂഗിൾ എർത്ത് ഇമേജറിയിൽ കാർ കണ്ടിട്ടുണ്ടെങ്കിലും ആരും ശ്രദ്ധിച്ചിരുന്നില്ലെന്ന് ബിബിസി റിപ്പോർട്ടിൽ പറയുന്നു.
വില്യം ഓടിച്ച കാർ നിയന്ത്രണം വിട്ട് തടാകത്തിലേക്ക് മറിഞ്ഞതാകാമെന്നാണ് പൊലീസ് പറയുന്നത്. ഇദ്ദേഹത്തിനായി വിപുലമായ പരിശോധന നടത്തിയെങ്കിലും ഈ തടാകത്തിന്‍റെ കാര്യം പൊലീസ് പരിഗണിച്ചിരുന്നില്ല. ഇതുവഴി വില്യം പോകാൻ സാധ്യതയില്ലാത്തതിനാലാണ് പൊലീസ് ഇവിടെ പരിശോധന നടത്താതിരുന്നത്.
