#StayHome: Reliance Jio offer | വീട്ടിലിരുന്ന് ജോലി ചെയ്യുന്നവർക്കായി ജിയോയുടെ പുതിയ പ്ലാൻ

നോവൽ കൊറോണ വൈറസ് വ്യാപിക്കാൻ തുടങ്ങിയതോടെയാണ് വിവിധ സർക്കാർ-സ്വകാര്യ സ്ഥാപനങ്ങളും കമ്പനികളും അടച്ചിടാൻ സർക്കാർ നിർദേശിക്കുന്നത്. ഇതോടെ ജീവനക്കാർക്ക് വർക്ക് ഫ്രം ഹോം എന്ന നിലയിൽ ജോലി ചെയ്യാനുള്ള അനുമതി സ്ഥാപനങ്ങളും കമ്പനികളും നൽകി. മിക്ക സ്വകാര്യ, പൊതുമേഖല സ്ഥാപന മേധാവികളും തങ്ങളുടെ മിക്ക ജീവനക്കാർക്കും ഇതിനകം തന്നെ വീട്ടിൽ നിന്ന് ജോലി ചെയ്യാൻ അനുമതി നൽകി കഴിഞ്ഞു. പൂർണ്ണമായ ലോക്ക്ഡൌൺ പ്രഖ്യാപിച്ച സ്ഥലങ്ങളിലും ജീവനക്കാർക്ക് വീട്ടിൽനിന്നുള്ള ജോലി നിർബന്ധമാക്കി. ഇതോടെ ജോലിക്കുവേണ്ടിയുള്ള ഡാറ്റ ഉപഭോഗം വർദ്ധിച്ചുകഴിഞ്ഞു. ഈ സാഹചര്യത്തിൽ വീട്ടിൽനിന്നു ജോലി ചെയ്യുന്നവർക്ക് ഉപകാരപ്രദമായ പുതിയ പ്ലാനുമായി റിലയൻസ് ജിയോ രംഗത്തെത്തി.

വർക്ക് ഫ്രം ഹോം എന്ന പേരിൽ 251 രൂപയുടെ പ്ലാൻ ആണ് ജിയോ അവതരിപ്പിക്കുന്നത്. റിലയൻസ് ജിയോ വർക്ക് ഫ്രം ഹോം പ്ലാൻ എല്ലാ ദിവസവും 2 ജിബി ഡാറ്റ ഓഫർ ചെയ്യുന്നു. കൂടാതെ 51 ദിവസത്തെ വാലിഡിറ്റിയാണ് പ്ലാനിന് ഉള്ളത്.

എന്നാൽ ഈ പ്ലാനിൽ ഡാറ്റ ഓഫർ മാത്രമാണ് പ്രത്യേകമായിട്ടുള്ളത്. ഫോൺ വിളിക്കുന്നതിനോ എസ്എംഎസ് അയയ്ക്കുന്നതിനോ പ്രത്യേക ആനുകൂല്യങ്ങളൊന്നുമില്ല.

ദൈനംദിന ഡാറ്റ ഉപഭോഗം 2 ജിബി പരിധി കഴിഞ്ഞാൽ ഉപഭോക്താവിന് 64 കെബിപിഎസ് വേഗതയിൽ ഇന്റർനെറ്റ് തുടർന്നും ഉപയോഗിക്കാനാകും. ഈ വേഗതകുറഞ്ഞ ഡാറ്റയ്ക്ക് പരിധിയുണ്ടാകില്ല.

ഇതിനൊപ്പം കമ്പനി നിലവിലുള്ള 4 ജി ഡാറ്റാ എക്സ്റ്റൻഷൻ ഓഫറുകളിലും മാറ്റങ്ങൾ വരുത്തിയിട്ടുണ്ട്. 11 രൂപ, 21 രൂപ, 51 രൂപ, 101 രൂപ പ്രീപെയ്ഡ് പ്ലാനുകളാണ് ഇപ്പോൾ നൽകുന്നത്. ഇതിൽ ഇരട്ടി ഡാറ്റയാണ് ഇപ്പോൾ ഓഫർ ആയി ലഭിക്കുക.

നേരത്തെ 11 രൂപയ്ക്ക് 400 എം‌ബി ഡാറ്റയാണ് ലഭിച്ചിരുന്നതെങ്കിൽ ഇപ്പോൾ 800 എം‌ബി ഡാറ്റയായി ഉയർത്തിയിട്ടുണ്ട്. കൂടാതെ 75 മിനിറ്റ് ഫോൺ വിളിക്കുന്നതിനുള്ള സമയവും ലഭിക്കും.

21 രൂപയുടെ എക്സ്റ്റൻഷൻ പ്ലാനിൽ ഇപ്പോൾ 2 ജിബി ഡാറ്റയും 200 മിനിറ്റ് കോളും ലഭിക്കും. അതേസമയം, 51 രൂപ ഡാറ്റാ ബൂസ്റ്റർ പായ്ക്ക് 6 ജിബി ഡാറ്റയും 500 മിനിറ്റ് ഫോൺ വിളിക്കുന്നതിനുള്ള ആനുകൂല്യങ്ങളും ഓഫർ ചെയ്യുന്നു.

101 രൂപ പ്ലാൻ 12 ജിബി ഡാറ്റയും 1000 മിനിറ്റ് ഫോൺ വിളിക്കുന്നതിനുള്ള ഓഫറും നൽകും.

നോൺ ജിയോ നെറ്റ്വർക്കുകളിലേക്ക് ഈ ഓഫർ ഉപയോഗിച്ച് വിളിക്കാം. അതേസമയം ജിയോ ടു ജിയോ കോളുകൾ സൌജന്യമാണ്. ഈ പ്ലാനുകളുടെ വാലിഡിറ്റി ഉപഭോക്താവിന്റെ ഉപയോഗത്തെ ആശ്രയിച്ചായിരിക്കും.