TIKTOK‌|ചൈനയിൽ നിന്ന് അകലാൻ ടിക്ടോക്; ലണ്ടനിൽ ആസ്ഥാനം കണ്ടെത്താൻ ചർച്ച

ലണ്ടൻ: ചൈനീസ് മൊബൈൽ ആപ്ലിക്കേഷന്‍ എന്ന പേരു മാറ്റുന്നതിനായി ചൈനയിൽ നിന്നകലാൻ ടിക്ടോക് തയ്യാറെടുക്കുന്നു. ആസ്ഥാനം ലണ്ടനിലേക്ക് മാറ്റുന്നതിനായുള്ള ചർച്ചകൾ യുകെ സർക്കാരുമായി നടക്കുന്നതായാണ് വിവരം

ലണ്ടനോ അനുയോജ്യമായ മറ്റേതെങ്കിലും സ്ഥലമോ ആസ്ഥാനമായി കണ്ടെത്തുന്നതിനാണ് ചർച്ചകൾ. ഇക്കാര്യത്തിൽ അന്തിമ തീരുമാനം കൈക്കൊണ്ടിട്ടില്ല.

ചൈനീസ് ആസ്ഥാനമായ ബൈറ്റ്ഡാൻസിന്റെ ഉടമസ്ഥതയിലാണ് ടിക്ടോക് ഇപ്പോൾ. ഈ വർഷം ആദ്യമാണ് ടിക്ടോക് കലിഫോർണിയയിലെ ലൊസാഞ്ചലസിലേക്കു മാറിയത്.

വാൾട്ട് ഡിസ്നിയുടെ കോ എക്സിക്യൂട്ടീവായ കെവിൻ മേയറെ ചീഫ് എക്സിക്യൂട്ടീവായി നിയമിച്ച് വൻ വിപുലീകരണത്തിന് ടിക്ടോക് ശ്രമിച്ചുവരുന്നതിനിടെയാണ് ഇന്ത്യ 59 ചൈനീസ് ആപ്ലിക്കേഷനുകളെ നിരോധിച്ചത്.

യുഎസ് ഉൾപ്പെടെയുള്ള മറ്റ് രാജ്യങ്ങൾ നിരോധനത്തിനു തയാറെടുക്കുകയാണ്. യുഎസിൽനിന്നു തിരിച്ചടി കിട്ടിയാൽപെട്ടെന്നു മാറേണ്ട അവസ്ഥയിലാണ് ടിക്ടോക്.

ചൈനയ്ക്കു പുറത്ത് ലണ്ടനിലും മറ്റു ഓഫിസുകളിലും കൂടുതൽ ജീവനക്കാരെ നിയമിച്ച് പ്രവർത്തനം വിപുലപ്പെടുത്താനാണ് കമ്പനി ഒരുങ്ങുന്നത്.

ലോകത്തിലെ ഏറ്റവും ജനപ്രിയമായ ആപ്ലിക്കേഷനുകളിലൊന്നായ ടിക് ടോക്കിന്റെ വേരുകൾ ചൈനയിലായതിനാല്‍ നിരന്തരം തിരിച്ചടികൾ ലഭിക്കുകയാണ്. ഈ സാഹചര്യത്തിലാണ് ആസ്ഥാനം മാറാൻ തീരുമാനിച്ചിരിക്കുന്നത്.(photo:money control)

അതേസമയം ബ്രിട്ടനിൽ ആസ്ഥാനം തുറക്കുന്നതിനായി യുകെ സർക്കാരുമായുള്ള ചർച്ച ടിക്ടോക്ക് അവസാനിപ്പിച്ചതായി സൺഡേ ടൈംസ് റിപ്പോർട്ട് ചെയ്തു. ടിക്ടോക്ക് ഇപ്പോഴും ബ്രിട്ടൻ സർക്കാരുമായി ചർച്ച നടത്തിവരികയാണെന്നാണ് ചില റിപ്പോട്ടുകൾ. എന്നാൽ ഇക്കാര്യത്തിൽ ടിക് ടോക് ഇതുവരെ പ്രതികരിച്ചിട്ടില്ല.(photo:money control)