ഫോർവേഡ് മെസേജുകൾ നിയന്ത്രിക്കാൻ പുതിയ സംവിധാനവുമായി വാട്സ്ആപ്പ്

വ്യാജ വാർത്ത പ്രചരിക്കുന്നത് തടയാൻ പുതിയ നടപടിയുമായി വാട്സാപ്പ്. ഗ്രൂപ്പിലേക്ക് തുടർച്ചയായി ഫോർവേഡ് ചെയ്യപ്പെടുന്ന മെസേജുകൾ തടയാൻ ഗ്രൂപ്പ് അഡ്മിന് അധികാരം നൽകുന്ന പുതിയ സംവിധാനവുമായി വാട്സ്ആപ്പ്.

2.19.97 ബീറ്റ വേർഷനിലാണ് പുതിയ സൗകര്യമുള്ളത്. WAbetainfo ആണ് വാർത്ത റിപ്പോർട്ട് ചെയ്തിരിക്കുന്നത്.

ഈ ഫീച്ചർ ഇതുവരെ പ്രവർത്തനക്ഷമമായിട്ടില്ലെന്നും ഇത് നിർമാണഘട്ടത്തിലാണെന്നുമാണ് റിപ്പോർട്ടുകൾ പറയുന്നത്.

Abetainfo യുടെ റിപ്പോർട്ട് അനുസരിച്ച് 2.19.80 ബീറ്റ വേർഷനിൽ രണ്ട് പുതിയ ഫീച്ചറുകളാണ് വാട്സ് ആപ്പ് പരീക്ഷിച്ചിരിക്കുന്നത്.

ഒരു മെസേജ് എത്ര തവണ ഫോർവേഡ് ചെയ്യപ്പെട്ടു എന്ന് അറിയിക്കുന്ന ഫോർവേഡിംഗ് ഇൻഫോയും ഒരു നിശ്ചിത എണ്ണത്തിൽ കൂടുതൽ വാടാസ്ആപ്പിൽ ഷെയർ ചെയ്യപ്പെടുന്ന സന്ദേശങ്ങൾ തിരിച്ചറിയുന്ന ഫ്രീക്വൻ‌റ്ലി ഫോർവേഡഡ് മെസേജ് എന്ന സംവിധാനവുമാണ്.

ഒരിക്കൽ ആക്റ്റിവേറ്റ് ചെയ്യപ്പെട്ടാൽ ഗ്രൂപ്പ് സെറ്റിംഗ്സിൽ ഈ ഫീച്ചർ ലഭിക്കും. ഗ്രൂപ്പ് അഡ്മിൻമാർക്ക് മാത്രമെ ഇത് കാണാനും എഡിറ്റ് ചെയ്യാനും സാധിക്കുകയുള്ളു. ഇതിൽ ക്ലിക്ക് ചെയ്താൽ ഫ്രീക്വന്റ്ലി ഫോർവേഡഡ് മെസേജ് അനുവദിക്കണോ വേണ്ടയോ എന്ന് ചോദിക്കും.

അതേസമയം ഫോർവേഡ് ചെയ്യപ്പെടുന്ന സന്ദേശങ്ങൾ മാത്രമെ ഇത്തരത്തിൽ നിയന്ത്രിക്കാൻ സാധിക്കുകയുള്ളു. ഉപയോക്താക്കൾക്ക് ഏത് സന്ദേശവും കോപ്പി ചെയ്ത് പേസ്റ്റ് ചെയ്ത് ഏത് ഗ്രൂപ്പുകളിലേക്ക് വേണമെങ്കിലും ഇടാൻ കഴിയും. എന്നാൽ ഇത് അത്ര എളുപ്പമല്ലാത്തതിനാൽ സന്ദേശങ്ങൾ അനാവശ്യമായി ഫോർവേഡ് ചെയ്യപ്പെടില്ല.

ആൻഡ്രോയിഡ് സംവിധാനത്തിലാണ് ഈ ഫീച്ചർ പരീക്ഷിച്ചിരിക്കുന്നത്. ഐഒഎസിൽ വൈകാതെ എത്തും. ഉപയോക്താക്കളെ ഗ്രൂപ്പുകളിൽ അംഗങ്ങളാക്കണമെങ്കിൽ അവരുടെ അനുമതി വാങ്ങുന്നതിനുള്ള ഫീച്ചർ വാട്സ്ആപ്പ് അടുത്തിടെ ഉൾപ്പെടുത്തിയിരുന്നു.