ഹൂവേയുമായുള്ള ബന്ധം അവസാനിപ്പിച്ച ഗൂഗിൾ; ഹോണർ ഫോണുകൾക്ക് ആൻഡ്രോയ്ഡ് അപ്ഡേറ്റ് ലഭിക്കില്ല

ന്യൂയോർക്ക്: ചൈനീസ് മൊബൈൽ നിർമാതാക്കളായ ഹൂവേയുമായുള്ള ബന്ധം അവസാനിപ്പിച്ച് ഗൂഗിൾ. ഇതോടെ ഹുവേ-ഹോണർ ഫോണുകളിൽ നിലവിലുള്ള ആൻഡ്രോയ്ഡ് ഒ.എസ് അപ്ഡേറ്റ് ചെയ്യാനാകാത്ത സ്ഥിതിയായിട്ടുണ്ട്. ഡോണൾഡ് ട്രംപ് ഭരണകൂടം ചൈനീസ് കമ്പനിയെ കരിമ്പട്ടികയിൽപ്പെടുത്തിയതോടെയാണ് ബന്ധം ഉപേക്ഷിക്കാൻ ഗൂഗിൾ തയ്യാറായത്.

ഇനിമുതൽ ഹൂവേയ്ക്ക് ഹാർഡ് വെയർ-സോഫ്റ്റ് വെയർ പിന്തുണ നൽകില്ലെന്ന് ഗൂഗിൾ വ്യക്തമാക്കിയിട്ടുണ്ട്. നിലവിൽ ആൻഡ്രോയ്ഡ് ഒ.എസ് ഉപയോഗിക്കുന്ന ഹൂവേ ഫോണുകളിൽ സെക്യൂരിറ്റി ഫീച്ചർ ഉൾപ്പടെ ഒരു അപേഡറ്റ് ലഭിക്കില്ല. ഗൂഗിളിൽനിന്നുള്ള സാങ്കേതികസഹായങ്ങൾ നിൽക്കുന്നതിനൊപ്പം പ്ലേ സ്റ്റോർ, മാപ്പ്, യൂട്യൂബ് ഉൾപ്പടെ ഗൂഗിൾ പ്ലേ സർവീസുകളെല്ലാം ഹൂവേ-ഹോണർ ഫോണിൽനിന്ന് വൈകാതെ അപ്രത്യക്ഷമാകുമെന്നാണ് റിപ്പോർട്ട്.

അതേസമയം ആൻഡ്രോയ്ഡ് ഓപ്പൺ സോഴ്സ് പ്രോജക്ടിലൂടെ ആൻഡ്രോയ്ഡ് പതിപ്പുകൾ അപ്ഡേറ്റ് ചെയ്യാനാകുമെന്ന സാധ്യത മാത്രമാണ് ഇനി ഹൂവേയ്ക്ക് മുന്നിലുള്ളത്. എന്നാൽ ഇത്തരത്തിൽ ആൻഡ്രോയ്ഡ് സേവനം സ്വീകരിക്കുമ്പോൾ വളരെ പരിമിതമായ സൌകര്യങ്ങൾ മാത്രാമണ് ലഭ്യമാകുക.

കഴിഞ്ഞ ആഴ്ചയാണ് അമേരിക്കൻ സർക്കാർ ഹൂവേയെ കരിമ്പട്ടികയിൽ പെടുത്തിയത്. അമേരിക്ക ശക്തമായ നിലപാട് സ്വീകരിച്ചതോടെ മറ്റ് രാജ്യങ്ങളും ഹൂവേയ്ക്കെതിരെ നീങ്ങുമെന്ന് ഉറപ്പായി കഴിഞ്ഞു. ഇതോടെ ഇന്ത്യ ഉൾപ്പടെയുള്ള സ്മാർട്ട് ഫോൺ വിപണിയിൽ ഹൂവേ നിലനിൽപ്പ് ഭീഷണി നേരിടുമെന്നാണ് വിവരം.