Xiaomi | കുട്ടികൾക്കുള്ള ഫോണുമായി ഷവോമി ക്വിൻ Mi; പ്രത്യേകതകൾ അറിയാം

കുട്ടികൾ മുതിർന്നവരുടെ ഫോണെടുത്ത് കളിക്കുമ്പോൾ വഴക്കു പറയുന്നവരാണ് മാതാപിതാക്കളിലേറെയും. ആ പ്രശ്നത്തിന് പരിഹാരവുമായി ഷവോമി രംഗത്തെത്തിയിരിക്കുന്നു. കുട്ടികൾക്ക് മാത്രമായുള്ള ഫോൺ പുറത്തിറക്കിയിരിക്കുകയാണ് ഷവോമി. ക്വിൻ Mi എന്ന ബ്രാൻഡിലാണ് കുട്ടികളുടെ ഫോൺ വരുന്നത്. ക്രൗഡ് ഫണ്ടിംഗ് ലിസ്റ്റിംഗിന്റെ ഭാഗമായി വരുന്ന ഈ സ്മാര്‍ട്ട്ഫോണ്‍ പിങ്ക്, വൈറ്റ് നിറങ്ങളിൽ ലഭ്യമാകും.

ഒട്ടനവധി സവിശേഷതകളുമായാണ് ഷവോമി ക്വിൻ Mi വരുന്നത്. ആദ്യമായി പറയേണ്ടത് ഇതിന്‍റെ രൂപകൽപന തന്നെയാണ്. ഈ ഫോണ്‍ ഒരു പരമ്പരാഗത ഡിസൈനിൽ അല്ല വരുന്നത്. അതേസമയം സ്മാർട്ട് ഫോണിനുള്ള സവിശേഷകൾ ഇതിനുണ്ടാകും.

താരതമ്യേന കുറഞ്ഞ റെസൊല്യൂഷന്‍ വരുന്ന 240 × 240 പിക്‌സല്‍ സ്‌ക്വയര്‍ സ്‌ക്രീന്‍ ഡിസ്പ്ലേയാണുള്ളത്. ബ്ലൂടൂത്ത് 4.2 നൊപ്പം വൈ-ഫൈ കണക്റ്റിവിറ്റിയുമുണ്ടാകും. കണക്റ്റിവിറ്റിക്കായി 4 ജിയും 1,150 എംഎഎച്ച്‌ ബാറ്ററിയും ഷവോമി ക്വിൻ Mi-ക്ക് നൽകിയിരിക്കുന്നു.

4ജി ഇ-സിം കണക്ടിവിറ്റിയുള്ളതിനാൽ വോയിസ് കോൾ, ഡാറ്റ എന്നിവയും ഈ ഫോണിൽ ലഭ്യമാണ്. മറ്റൊരു പ്രത്യേകത മാതാപിതാക്കളുടെ ഫോണുമായി ബന്ധപ്പെട്ടായിരിക്കും ഇതിന്‍റെ പ്രവർത്തനം. അതായത് പൂർണമായും മാതാപിതാക്കളുടെ നിയന്ത്രണത്തിലായിരിക്കും ഷവോമി ക്വിൻ Mi.

ജിപിഎസ് അധിഷ്ഠിതമായതിനാൽ കുട്ടികൾ എവിടെയൊക്കെ പോകുന്നുവെന്ന് മാതാപിതാക്കൾക്ക് അറിയാനാകും. ഇതിനായി പ്രത്യേക സ്മാർട്ട് അസിസ്റ്റന്‍റ് ചേർത്താണ് ഈ ഫോൺ അവതരിപ്പിക്കുന്നതെന്ന് ഷവോമി വ്യക്താക്കുന്നു. കൂടാതെ ഷവോമിയുടെ ഷ്യാവോ വോയിസ് അസിസ്റ്റന്‍റും ഇതിൽ ഉണ്ടാകും.

ചൈനയിൽ ഏകദേശം 399 യുവാൻ ആണ് ഈ ഫോണിന്‍റെ വില. അതായത് ഇന്ത്യയിൽ 4200 രൂപ വിലവരും.