സൊമാറ്റോ വെളിപ്പെടുത്തിയ രഹസ്യങ്ങൾ; 2020ൽ സൊമാറ്റോയ്ക്ക് 1380 ഓർഡറുകൾ നൽകി ബംഗളൂരു സ്വദേശി

കഴിഞ്ഞുപോയ 2020 തങ്ങൾക്ക് എങ്ങനെ ആയിരുന്നെന്ന് ട്രോളുകളിലൂടെ അവതരിപ്പിക്കുകയാണ് സൊമാറ്റോ തങ്ങളുടെ ഏറ്റവും പുതിയ സോഷ്യൽ മീഡിയ പോസ്റ്റിൽ. ഏറ്റവും വിലകൂടിയ ഓർഡർ, ഏറ്റവും ചെറിയ ഓർഡർ, വെജ് ബിരിയാണി എത്ര തവണ ആവശ്യപ്പെട്ടു എന്ന് തുടങ്ങിയ കാര്യങ്ങളെല്ലാം മീമുകളിലൂടെയാണ് പുറത്തു വിട്ടിരിക്കുന്നത്.

1,988,044 പ്ലേറ്റ് വെജ് ബിരിയാണിയും ഈ വർഷം വിതരണം ചെയ്തതിൽ ഉൾപ്പെടുന്നു.

2020ൽ സൊമാറ്റോയിൽ ഏറ്റവും കൂടുതൽ ഓർഡർ നൽകിയത് ബംഗളൂരു സ്വദേശിയായ യാഷ് ആണ്. 1380 ഓർഡറുകളാണ് ഇയാൾ സൊമാറ്റോയ്ക്ക് നൽകിയത്. അതായത്, ദിവസം നാലു നേരമെങ്കിലും യാഷ് സൊമാറ്റോയിൽ ഓർഡർ ചെയ്തിട്ടുണ്ടാകണം.

വവ്വാലിനെയും വെറുതെ വിട്ടില്ല. 414 തവണയാണ് 'ബാറ്റ് സൂപ്പ്' അന്വേഷിച്ച് സൊമാറ്റോയിൽ ആളെത്തിയത്.

ഡൽഹി, മുംബൈ, ബംഗളൂരു, പുനെ എന്നിവിടങ്ങളിലായി 2.5 മില്യൺ മൊമോസ് ആണ് ഓർഡർ ചെയ്തത്

ഏകദേശം രണ്ടു ലക്ഷം രൂപയ്ക്കടുത്ത് ഒരു ഓർഡർ വന്നതാണ് ഏറ്റവും വില കൂടിയ ഓർഡർ. 1,99,950 രൂപയ്ക്ക് ആയിരുന്നു ഈ ഓർഡർ. ഈ ഓർഡർ നൽകിയ ആൾക്ക് 66,650 രൂപ ഡിസ്ക്കൗണ്ട് ലഭിക്കുകയും ചെയ്തിരുന്നു. 10.01 രൂപയുടേതാണ് സൊമാറ്റോയ്ക്ക് ഈ വർഷം ലഭിച്ച ഏറ്റവും ചെറിയ ഓർഡർ. 39.99 രൂപ ഡിസ്കൗണ്ട് നൽകിയതിനു ശേഷമായിരുന്നു ഇത്.

മെയ് മാസത്തിൽ 4.5 ലക്ഷം പിസ ഓർഡറുകളാണ് സൊമാറ്റോയ്ക്ക് ലഭിച്ചത്. ജൂലൈ മാസത്തോടെ ഇത് ഒമ്പതു ലക്ഷമാകുകയും സെപ്റ്റംബറിൽ 12 ലക്ഷമാകുകയും നവംബറിൽ 17 ലക്ഷമാകുകയും ചെയ്തു.

മഹാരാഷ്ട്രയിലെ ജാൽഗാവോനിലെ ഒരു താമസക്കാരൻ 2020ൽ 369 പിസയാണ് ഓർഡർ ചെയ്തത്.

ഇന്ത്യയിൽ കഴിഞ്ഞവർഷം ഏറ്റവും കൂടുതൽ ഓർഡർ ചെയ്യപ്പെട്ടത് ബിരിയാണിയാണ്. 2020ലെ ട്രൻഡ് അനുസരിച്ച് ഓരോ മിനിറ്റിലും 22 ബിരിയാണി ഓർഡറുകളാണ് സൊമാറ്റോ വിതരണം ചെയ്തത്.