Sania Mirza | 'ഇത് എന്റെ അവസാന സീസൺ'; വിരമിക്കൽ പ്രഖ്യാപിച്ച് സാനിയ മിർസ

ഈ വർഷത്തെ സീസണോടെ ടെന്നീസിൽ നിന്ന് വിരമിക്കുമെന്ന് ഇന്ത്യയുടെ ടെന്നീസ് ഇതിഹാസം സാനിയ മിർസ (Sania Mirza).

2022 ഓസ്ട്രേലിയൻ ഓപ്പൺ (Australian Open)വനിതാ ഡബിൾസിൽ ആദ്യ റൗണ്ടിലെ പരാജയത്തിന് പിന്നാലെയാണ് സാനിയ വിരമിക്കൽ തീരുമാനം പ്രഖ്യാപിച്ചത്.

ഇത് തന്റെ അവസാന സീസൺ ആയിരിക്കും. സീസൺ പൂർത്തിയാക്കാൻ കഴിയുമോ എന്ന കാര്യത്തിൽ ഉറപ്പില്ല. സീസൺ മുഴുവനാക്കി കരിയർ അവസാനിപ്പിക്കാനാണ് ആഗ്രഹം. സാനിയ മിർസ പറയുന്നു.

സ്ലൊവേനിയൻ താരങ്ങളായ കാജ യുവാൻ, തമാര സിഡൻസെക് എന്നിവരോടാണ് സാനിയ മിർസ- കിച്ചനോക്ക് സഖ്യം ആദ്യ റൗണ്ടിൽ തന്നെ പരാജയപ്പെട്ടത്. ഉക്രേനിയൻ താരമായ കിച്ചനോക്കും സാനിയയും നേരിട്ടുള്ള സെറ്റുകൾക്കാണ് പരാജയപ്പെട്ടത്. സ്കോർ: 4-6, 6-7(5). മത്സരം തുടങ്ങി 37 ാം മിനുട്ടിൽ തന്നെ സഖ്യം അടിയറവ് പറഞ്ഞു.

അതേസമയം, പുരുഷ ഡബിൾസിൽ ഇന്ത്യയുടെ രോഹൻ ബൊപ്പണ്ണയും ഫ്രഞ്ച് താരം എഡ്വേർഡ് റോജർ വാസലിനും ആദ്യ റൗണ്ടിൽ പുറത്തായി. വൈൽഡ് കാർഡ് എൻട്രിയായ ക്രിസ്റ്റഫർ റങ്കട്ട്- ട്രീറ്റ് ഹൂയി എന്നിവരോടാണ് ബൊപ്പണ്ണ സഖ്യം പരാജയപ്പെട്ടത്. സ്കോർ: 6-3 6-7(2) 2-6.

ഡബിൾസിൽ നിരാശപ്പെടുത്തിയെങ്കിലും മിക്സഡ് ഡബിൾസിൽ രണ്ട് ഇന്ത്യൻ താരങ്ങളും പ്രതീക്ഷയ്ക്ക് വക നൽകുന്നുണ്ട്. ഈ വർഷത്തെ ആദ്യ ഗ്രാൻഡ് സ്ലാം മത്സരമായ ഓസ്ട്രേലിയൻ ഓപ്പണിൽ മിക്സഡ് ഡബിൾസിൽ ബൊപ്പണ്ണയും സാനിയയും മുന്നേറ്റം തുടരുകയാണ്.

ക്രൊയേഷ്യൻ പങ്കാളിയായ ഡാരിജയ്ക്കൊപ്പമാണ് ബൊപ്പണ്ണ മത്സരിക്കുന്നത്. അമേരിക്കൻ താരം രാജീവ് റാം ആണ് സാനിയയുടെ മിക്സഡ് ഡബിൾസ് പങ്കാളി.