അടിച്ചുകസറി ഡിവില്ലിയേഴ്സ്; ഓസീസ് ലീഗിൽ ബ്രിസ്ബേൻ ഹീറ്റിന് ഏഴ് വിക്കറ്റ് ജയം

ബ്രിസ്ബെയ്ൻ: ദക്ഷിണാഫ്രിക്കൻ മുൻനായകൻ എബി ഡിവില്ലിയേഴ്സ് അന്താരാഷ്ട്ര ക്രിക്കറ്റിലേക്ക് മടങ്ങിയെത്തുന്നുവെന്ന അഭ്യൂഹം ശക്തമാകുന്നതിനിടെ വീണ്ടും വിസ്മയമായി ആ ബാറ്റിങ്ങ്. ഏറെക്കാലം കളിക്കളത്തിൽനിന്ന് വിട്ടുനിന്ന ഡിവില്ലിയേഴ്സിന്‍റെ 40 റൺസിന്‍റെ മികവിൽ ഓസ്ട്രേലിയൻ ബിഗ് ബാഷ് ലീഗിൽ അഡ്‌ലെയ്‌ഡ് സ്ട്രൈക്കേഴ്സിനെതിരെ ബ്രിസ്ബേൻ ഹീറ്റിന് ഏഴു വിക്കറ്റ് ജയം. 111 റൺസിന്‍റെ വിജയലക്ഷ്യം 28 പന്തും ഏഴു വിക്കറ്റും ശേഷിക്കെ ബ്രിസ്ബേൻ ഹീറ്റ് മറികടക്കുകയായിരുന്നു.

ടോസ് നേടി ആദ്യം ബാറ്റുചെയ്ത അഡ്‌ലെയ്‌ഡ് സ്ട്രൈക്കേഴ്സ് 19 ഓവറിൽ 110 റൺസിന് പുറത്താകുകയായിരുന്നു. അഞ്ചു വിക്കറ്റെടുത്ത ജെയിംസ് പാറ്റിൻസണാണ് അഡ്‌ലെയ്‌ഡ് സ്ട്രൈക്കേഴ്സിനെ തകർത്തത്. 28 റൺസെടുത്ത റാഷിദ് ഖാനാണ് ടോപ് സ്കോറർ.

മറുപടി ബാറ്റിങ്ങിൽ മാറ്റ് റെൻഷാ 45 പന്തിൽ 52 റൺസെടുത്ത് പുറത്താകാതെ നിന്നപ്പോൾ 32 പന്തിൽ 40 റൺസുമായാണ് ഡിവില്ലിയേഴ്സ് തിളങ്ങിയത്. അഞ്ച് ബൌണ്ടറികൾ ഉൾപ്പെടുന്നതായിരുന്നു ഡിവില്ലിയേഴ്സിന്‍റെ ഇന്നിംഗ്സ്.

2018 മെയിൽ അന്താരാഷ്ട്ര ക്രിക്കറ്റിൽനിന്ന് വിരമിച്ച എ ബി ഡിവില്ലിയേഴ്സ് മടങ്ങിവരാനുള്ള ആഗ്രഹം അടുത്തിടെ പ്രകടിപ്പിച്ചിരുന്നു. ഈ വർഷം ഓസ്ട്രേലിയയിൽ നടക്കുന്ന ടി20യിൽ കളിക്കാനാണ് താൽപര്യമെന്ന് അദ്ദേഹം വ്യക്തമാക്കിയിരുന്നു. അതിന് മുന്നോടിയായാണ് ഓസ്ട്രേലിയയിലെ ബിഗ് ബാഷ് ലീഗിൽ കളിക്കുന്നത്.