അനില്‍ കുംബ്ലെ മുതല്‍ അശ്വിന്‍ വരെ; ഇന്ത്യന്‍ ക്രിക്കറ്റിലെ 'എഞ്ചിനീയര്‍'മാരെ പരിചയപ്പെടാം

ക്രിക്കറ്റിലേക്ക് കടന്ന് വരുന്നതിന് മുമ്പ് എഞ്ചിനീയറിങ് ബിരുദം സ്വന്തമാക്കിയിട്ടുള്ള ചില ഇന്ത്യന്‍ ക്രിക്കറ്റര്‍മാരുണ്ട്. അവരെ പരിചയപ്പെടാം.

രവിചന്ദ്രന്‍ അശ്വിന്‍. ലോക ക്രിക്കറ്റിലെ തന്നെ മികച്ച സ്പിന്നര്‍മാരില്‍ ഒരാളായി കണക്കാക്കുന്ന താരമാണ് ആര്‍ അശ്വിന്‍. അദ്ദേഹം ചെന്നൈ എസ്എസ്എന്‍ കോളേജില്‍ നിന്നും ഇന്‍ഫര്‍മേഷന്‍ ടെക്‌നോളജിയില്‍ ബി ടെക് ബിരുദം പൂര്‍ത്തിയാക്കിയിട്ടുണ്ട്. പോസ്റ്റ് ഗ്രാജുവേഷന് ശേഷം ഒരു സോഫ്റ്റ്വെയര്‍ കമ്പനിയിലും ജോലി ചെയ്തിരുന്നു.

ജവഗല്‍ ശ്രീനാഥ്. 1991-2003 കാലഘട്ടത്തില്‍ ഇന്ത്യന്‍ ബൗളിംഗ് യൂണിറ്റിലെ അവിഭാജ്യഘടകമായിരുന്നു ഇദ്ദേഹം. ശ്രീനാഥ്, മൈസൂര്‍ ജയചമരാജേന്ദ്ര കോളേജില്‍ നിന്നും ഇന്‍സ്ട്രുമെന്റേഷന്‍ ടെക്‌നോളജിയില്‍ (BE) ബിരുദം നേടിയിട്ടുണ്ട്.

അനില്‍ കുംബ്ലെ. 1990- 2008 കാലഘട്ടത്തില്‍ ഇന്ത്യന്‍ ടീമിലെ സജീവ സാന്നിധ്യമായിരുന്നു. ബാംഗ്ലൂര്‍ നാഷണല്‍ സ്‌കൂള്‍ കോളേജ് ഓഫ് എഞ്ചിനീയറിങ്ങില്‍ നിന്നും മെക്കാനിക്കല്‍ എഞ്ചിനീയറിങ്ങില്‍ ബിരുദം നേടിയിട്ടുണ്ട്.

എ എസ് പ്രസന്ന എറപ്പള്ളി. മുന്‍ ഇന്ത്യന്‍ ഓഫ് സ്പിന്നര്‍ ആയിരുന്ന ഇദ്ദേഹം 1962 മുതല്‍ 1978 വരെ ഇന്ത്യന്‍ ജേഴ്‌സിയില്‍ കളിച്ചിട്ടുണ്ട്. നാഷണല്‍ ഇന്‍സ്റ്റിറ്റ്യൂട്ട് ഓഫ് എഞ്ചിനീയറിങ്ങില്‍ നിന്നാണ് ഇദ്ദേഹം ബിരുദം കരസ്ഥമാക്കിയത്.

കൃഷ്ണമാചാരി ശ്രീകാന്ത്. തകര്‍പ്പന്‍ ബാറ്റ്‌സ്മാന്‍ ആയിരുന്ന ഇദ്ദേഹം ക്രിക്കറ്റിലേക്ക് വരുന്നതിന് മുമ്പ് ഇലക്ട്രിക്കല്‍ എഞ്ചിനീയറിങ്ങില്‍ ബിരുദം നേടിയിട്ടുണ്ട്.