ചേതേശ്വർ പുജാരയെ മാറ്റി; ഇന്ത്യ- ഓസ്ട്രേലിയ ടെസ്റ്റ് പരമ്പരയ്ക്ക് പുതിയ വൈസ് ക്യാപ്റ്റൻ

ഓസ്ട്രേലിയക്കെതിരായ ശേഷിക്കുന്ന രണ്ട് മത്സരങ്ങൾക്കായി പുതിയ വൈസ് ക്യാപ്റ്റനെ പ്രഖ്യാപിച്ച് ബിസിസിഐ. ചേതേശ്വർ പുജാരയെ മാറ്റി പകരം ടീമിലേക്ക് മടങ്ങിയെത്തിയ രോഹിത് ശർമയെ വൈസ് ക്യാപ്റ്റനാക്കി. മെൽബണിൽ അജിങ്ക്യ രഹാനെ ക്യാപ്റ്റനായപ്പോൾ വൈസ് ക്യാപ്റ്റനായി നിലവിലെ ടീമിലെ ഏറ്റവും സീനിയർ ബാറ്റ്സ്മാനായ ചേതേശ്വർ പുജാരയെ നിയമിക്കുകയായിരുന്നു. ഒരു മത്സരത്തിന് ശേഷം പുജാരയെ മാറ്റി.

ടെസ്റ്റ് ടീമിൽ സ്ഥിരാംഗമല്ലാത്ത രോഹിത്തിനെ വൈസ് ക്യാപ്റ്റൻ പദവിയിൽ നിയോഗിച്ചത് അപ്രതീക്ഷിതമായാണ്. ഇതോടെ മൂന്നാം ടെസ്റ്റ് മത്സരത്തിൽ രോഹിത് ശർമ കളിക്കുമെന്നുറപ്പായി. രോഹിത ശർമ 2017 മുതൽ ഏകദിന- ടി 20 ടീമുകളുടെ വൈസ് ക്യാപ്റ്റനാണ്.

2013ലാണ് രോഹിത് ശർമ ടെസ്റ്റിൽ അരങ്ങേറ്റം കുറിച്ചത്. ഇതുവരെ 32 ടെസ്റ്റുകളിൽ ഇന്ത്യക്കായി കളിച്ചു. ആറ് സെഞ്ചുറികൾ ഉൾപ്പെടെ 2141 റൺസാണ് രോഹിത് നേടിയത്. ടെസ്റ്റ് മത്സരങ്ങളിൽ സ്ഥിരാംഗമാകാൻ ആറു വർഷത്തിനിടയിലും രോഹിത്തിന് കഴിഞ്ഞിരുന്നില്ല.

2019 ലോകകപ്പിലെ മികച്ച പ്രകടനത്തിന് ശേഷം വെസ്റ്റിൻഡീസ് പര്യടനത്തിനുള്ള ഇന്ത്യൻ ടെസ്റ്റിൽ രോഹിത്തിനെ ഉൾപ്പെടുത്തി. പേശിയിലെ പരിക്ക് കാരണം 2019 നവംബറിന് ശേഷം ഒരു മത്സരംപോലും താരത്തിന് കളിക്കാനായില്ല. മെൽബണിൽ വെച്ച് ടീമിനൊപ്പം ചേർന്ന രോഹിത് വൈകാതെ സിഡ്നിയിലേക്ക് തിരിക്കും.

രോഹിത് ഓപ്പണറായിട്ടാണ് ടീമിലെത്തുന്നതെങ്കിൽ മായങ്ക് അഗർവാളിന് പുറത്തിരിക്കേണ്ടിവരും. ഇനി മധ്യനിരയിലേക്കാണ് എത്തുന്നതെങ്കിൽ ഹനുമാ വിഹാരിക്കാകും പുറത്തേക്ക് വഴി തുറക്കുക. ജനുവരി ഏഴിന് സിഡ്നിയിലാണ് രണ്ടാം ടെസ്റ്റ് തുടങ്ങുക. നാല് മത്സരങ്ങളുള്ള പരമ്പരയിൽ ഇരു ടീമുകളും ഓരോ മത്സരം ജയിച്ചിട്ടുണ്ട്.