ഉറുഗ്വായ്ക്ക് ജയമൊരുക്കിയത് സുവാരസും കവാനിയും; പരാഗ്വേയ്ക്ക് ഷോക്ക് നൽകി ഖത്തർ

റിയോ ഡി ജനീറോ: സൂപ്പർ താരങ്ങളായ സുവാരസും കവാനിയും ലക്ഷ്യം കണ്ടതാണ് കോപ്പ അമേരിക്കയിൽ ഉറുഗ്വായ്ക്ക് സ്വപ്നസമാനമായ തുടക്കം നൽകിയത്. എതിരില്ലാത്ത നാലു ഗോളുകൾക്കാണ് ഉറുഗ്വായ് ഇക്വഡോറിനെ തോൽപ്പിച്ചത്. നിക്കോളാസ് ലോഡിറോ, എഡിൻസൻ കവാനി, ലൂയിസ് സുവാരസ് എന്നിവർ ഉറുഗ്വായ്ക്കുവേണ്ടി ലക്ഷ്യം കണ്ടു. ഇക്വഡോറിന്‍റെ ആർട്ട്യൂറോ മിനയുടെ സെൽഫ് ഗോളാണ് ഉറുഗ്വായുടെ പട്ടിക തികച്ചത്.

സുവാരസിന്‍റെ പാസിൽനിന്നാണ് ആറാം മിനിട്ടിൽ ലൊഡിറോ ഉറുഗ്വായെ മുന്നിലെത്തിച്ചത്. ഇരുപത്തിനാലാം മിനുട്ടിൽ ഹൊസെ ക്വിന്‍ററോസ് ചുവപ്പ് കാർഡ് കണ്ട് പുറത്തായത് ഇക്വഡോറിന് കനത്ത തിരിച്ചടിയായി.

33-ാം മിനിട്ടിൽ തകർപ്പനൊരു ബൈസിക്കിൾ കിക്കിലൂടെ കവാനിയും 44-ാം മിനിട്ടിൽ സുവാരസും ലക്ഷ്യം കണ്ടതോടെ ഉറുഗ്വായ് ജയമുറപ്പിക്കുകയായിരുന്നു. 78-ാം മിനിട്ടിലായിരുന്നു മിനയുടെ സെൽഫ് ഗോൾ.

അതേസമയം കോപ അമേരിക്കയിലെ അരങ്ങേറ്റ മത്സരത്തിൽ ഖത്തർ ജയത്തിന് തുല്യമായ സമനില നേടി. പരാഗ്വേയ്ക്കെതിരായ മത്സരത്തിലാണ് രണ്ട് ഗോളിന് പിന്നിൽ നിന്ന ശേഷം ഖത്തർ ആവേശോജ്വലമായ തിരിച്ചുവരവ് നടത്തിയത്. ഓസ്കർ കാർഡോസോയു ഡെഞലിസ് ഗോൺസാലസും പാരാഗ്വേയ്ക്കായി ഗോൾ നേടിയപ്പോൾ അൽമോയെസ് അലിയും ബോലേം ഖൗക്കിയും ഖത്തറിനായി ഗോൾ നേടി.