Cristiano Ronaldo| ഇരട്ടകുട്ടികളുടെ അച്ഛന് 3 കോടിയിലധികം ലൈക്ക്; ഇൻസ്റ്റഗ്രാമിൽ മെസ്സിയെ പിന്നിലാക്കി ക്രിസ്റ്റ്യാനോ റൊണാൾഡോ

ഇൻസ്റ്റഗ്രാമിൽ (Instagram)ഒരു പോസ്റ്റിന് 3 കോടിയിലധികം ലൈക്കുകൾ(Most Liked IG Post). സോഷ്യൽമീഡിയയിൽ പുതിയ ചരിത്രം സൃഷ്ടിച്ചിരിക്കുകയാണ് ഫുട്ബോൾ ഇതിഹാസം ക്രിസ്റ്റ്യാനോ റൊണാൾഡോ(Cristiano Ronaldo).

ഇരട്ടക്കുട്ടികളുടെ അച്ഛനാകാൻ പോകുന്നു എന്ന സന്തോഷ വാർത്ത പങ്കുവെച്ചുള്ള റൊണാൾഡോയുടെ പോസ്റ്റിനാണ് ഇത്രയധികം ലൈക്കുകൾ കുമിഞ്ഞു കൂടിയത്. ഒരു പോസ്റ്റിന് ഇത്രയധികം ലൈക്കുകൾ ലഭിക്കുന്ന ആദ്യ കായികതാരമാണ് റൊണാൾഡോ.

നേരത്തേ ലയണൽ മെസ്സിയുടെ പേരിലായിരുന്ന റെക്കോർഡാണ് ക്രിസ്റ്റ്യാനോ മറികടന്നത്. ഭാര്യയ്ക്കും മൂന്ന് മക്കൾക്കുമൊപ്പമുള്ള ലയണൽ മെസ്സിയുടെ ഫോട്ടോയ്ക്ക് ലഭിച്ചിരുന്ന ലൈക്കുകൾ 22 മില്യൺ ആയിരുന്നു.

ഭാര്യ ജോർജീന റോഡ്രിഗ്രസിനൊപ്പം സ്കാൻ റിപ്പോർട്ടുമായി കിടക്കുന്ന ചിത്രമാണ് ക്രിസ്റ്റ്യാനോ ഇൻസ്റ്റഗ്രാമിൽ പോസ്റ്റ് ചെയ്തത്. നിലവിൽ മൂന്ന് കോടിയിലധികമാണ് ഈ പോസ്റ്റിന് ലൈക്ക് ലഭിച്ചിരിക്കുന്നത്. ഓരോ മിനുട്ടുകളിലും ലൈക്കുകളുടെ എണ്ണം കൂടിക്കൊണ്ടിരിക്കുകയാണ്.

നാല് കുട്ടികളാണ് ക്രിസ്റ്റ്യാനോ റൊണാൾഡോയ്ക്ക് ഉള്ളത്. 2017 ലും ക്രിസ്റ്റ്യാനോയുടെ ഭാര്യ ജോർജീന ഇരട്ടകുട്ടികൾക്ക് ജന്മം നൽകിയിരുന്നു. മൂന്ന് കുട്ടികളാണ് ജോർജീനയിൽ ക്രിസ്റ്റ്യാനോയ്ക്ക് ഉള്ളത്.

ക്രിസ്റ്റ്യാനോയെ ആദ്യമായി കണ്ടതിനെ കുറിച്ച് ജോർജീന മുമ്പ് ഒരു അഭിമുഖത്തിൽ വെളിപ്പെടുത്തിയിരുന്നു. സ്പെയിനിലെ മാഡ്രിഡിലുള്ള ഗുച്ചി ഷോപ്പിൽ ഷോപ് അസിസ്റ്റന്റായി ജോലി ചെയ്യുകയായിരുന്നു ജോർജീന.

ഇവിടെ ഷോപ്പിങ്ങിന് എത്തിയപ്പോഴാണ് ക്രിസ്റ്റ്യാനോയും ജോർജീനയും ആദ്യമായി കണ്ടുമുട്ടുന്നത്. അദ്ദേഹത്തിന്റെ ഉയരവും ശരീരവും ആകർഷണീയമായ മുഖവുമെല്ലാം കണ്ട് അത്ഭുതപ്പെട്ടുപോയെന്നാണ് ജോർജീന പറഞ്ഞത്.

ആദ്യ കാഴ്ച്ചയിൽ തന്നെ ക്രിസ്റ്റ്യാനോയോട് പ്രണയം തോന്നിയെന്ന് ജോർജീന പറയുന്നു. പിന്നീട് അദ്ദേഹത്തിന്റെ പെരുമാറ്റം കൂടുതൽ മതിപ്പുണ്ടാക്കിയെന്നും ജോർജീന.