Cristiano Ronaldo| ക്രിസ്റ്റ്യാനോ റൊണാൾഡോ തന്നെക്കാൾ വേഗതയുള്ള താരം: ഉസൈൻ ബോൾട്ട്

ഉസൈൻ ബോൾട്ടിനേക്കാൾ വലിയ ഓട്ടക്കാരൻ ലോകത്തിലുണ്ടോ? ഉണ്ടെന്ന് ബോൾട്ട് തന്നെ പറയുന്നു. മറ്റാരുമല്ല യുവന്റസ് താരം ക്രിസ്റ്റ്യാനോ റൊണാൾഡോ.

സ്പാനിഷ് മാധ്യമമായ മാർക്കയ്ക്ക് നൽകിയ അഭിമുഖത്തിലാണ് തന്നെക്കാൾ വലിയ ഓട്ടക്കാരനാണ് റൊണാൾഡോയെന്ന് ബോൾട്ട് സമ്മതിച്ചത്. വെറും 9.58 സെക്കന്റിൽ നൂറ് മീറ്റർ ഓടി ലോക റെക്കോർഡ് സ്ഥാപിച്ച ജമൈക്കൻ താരമാണ് ഉസൈൻ ബോൾട്ട്. 2009 ലെ ഈ റെക്കോർഡ് ഇതുവരെ ആരും മറികടന്നിട്ടില്ല.

റൊണാൾഡോയ്ക്കൊപ്പം ഓടിയാൽ ആദ്യം ഫിനിഷിങ് ലൈനിൽ എത്തുക അദ്ദേഹമായിരിക്കുമെന്ന് ബോൾട്ട് പറയുന്നു. 2017 ലാണ് ബോൾട്ട് വിരമിക്കൽ പ്രഖ്യാപിച്ചത്.

എല്ലാ ദിവസവും പരിശിലനം നടത്തുന്നയാളാണ് റൊണാൾഡോ. താൻ ബോഡി ഫിറ്റ്നസ് നിലനിർത്താൻ വേണ്ടി മാത്രമാണ് ഇപ്പോൾ ട്രെയിനിങ് നടത്തുന്നത്. എങ്കിലും ദിവസവും ട്രെയിനിങ് തുടരാറുണ്ടെന്ന് ബോൾട്ട്.

അതിനാൽ തന്നെ റൊണാൾഡോയുമായി ഒരു ഓട്ടമത്സരം വെച്ചാൽ താൻ തോൽക്കുമെന്ന് ബോൾട്ട് പറയുന്നു. മികച്ച അത്ലറ്റാണ് റൊണാൾഡോയെന്നും ബോൾട്ട്.

സ്വന്തം കളിയിൽ അദ്ദേഹം എന്നും മുന്നിലാണ്. കൃത്യമായ ലക്ഷ്യബോധവും അതിനുവേണ്ടി കഠിന പരിശീലനവും ചെയ്യുന്നയാളാണ് അദ്ദേഹം. അതിനാൽ തന്നെ ഇപ്പോൾ തന്നേക്കാൾ വേഗത അദ്ദേഹത്തിന് ഉണ്ടാകുമെന്ന് ഞാൻ കരുതുന്നു.

12 സെക്കന്റിൽ കുറഞ്ഞ സമയത്തിനുള്ളിൽ റൊണാൾഡോ നൂറ് മീറ്റർ പൂർത്തിയാക്കുമെന്നാണ് പ്രൊഫഷണൽ സ്പ്രിന്റ് താരമായ ആഞ്ചൽ ഡേവിഡ് പറയുന്നത്.

റൊണാൾഡോയ്ക്ക് ഇതേ കരുത്തിൽ 41 വയസ്സുവരെ കളിക്കാനാകുമെന്നാണ് മുൻ മാഞ്ചസ്റ്റർ യുണൈറ്റഡ് പരിശീലകൻ മൈക്ക് ക്ലെഗ് പറയുന്നത്. ഇപ്പോൾ 35 വയസ്സാണ് റൊണാൾഡോയ്ക്ക്.

ഫുട്ബോൾ താരങ്ങൾ വിരമിക്കലിനെ കുറിച്ച് ആലോചിക്കുന്ന പ്രായത്തിലും മിന്നൽ വേഗത്തിൽ ഫുട്ബോൾ മൈതാനത്തു കൂടി ഓടി ഗോൾ അടിച്ചു കൂട്ടുകയാണ് റൊണാൾഡോ.

റൊണാൾഡോയേക്കാൾ മികച്ച കളിക്കാരൻ ആരെന്ന ചോദ്യത്തിനും ക്ലെഗ്ഗിന് മറുപടിയുണ്ട്. റയാൻ ഗിഗ്സ് ആണത്. ഗിഗ്സിന് 40 വയസ്സുവരെ കളിക്കാനായെങ്കിൽ റൊണാൾഡോയ്ക്ക് ഉറപ്പായും 41 ാം വയസ്സിലും ഫുട്ബോളിൽ വിജയങ്ങൾ നേടാനാകുമെന്ന് ക്ലെഗ് ഉറപ്പിച്ചു പറയുന്നു.