R Madhavan| 'അച്ഛന്റെ നിഴലിൽ ജീവിക്കേണ്ട'; നീന്തൽ താരമായി അറിയപ്പെടണം: മാധവന്റെ മകൻ വേദാന്ത്

താര കുടുംബങ്ങളും താരങ്ങളും അടക്കിവാഴുന്ന സിനിമാലോകത്ത് വ്യത്യസ്തരാകുകയാണ് നടൻ മാധവനും (R Madhavan)അദ്ദേഹത്തിന്റെ മകൻ വേദാന്തും(Vedaant). തങ്ങളുടെ വഴിയേ മക്കളേയും സിനിമയിലേക്ക് എത്തിക്കാൻ താരങ്ങൾ ശ്രമിക്കുന്നതിനിടയിലാണ് മകന്റെ വേറിട്ട യാത്രയ്ക്ക് ആർ മാധവനും ഭാര്യയും പൂർണ പിന്തുണയും വഴിയുമൊരുക്കുന്നത്.

അന്താരാഷ്ട്ര നീന്തൽ താരമായ വേദാന്ത് ഇതിനകം നിരവധി മത്സരങ്ങളിൽ സ്വർണമെഡൽ അടക്കം സ്വന്തമാക്കിയിട്ടുണ്ട്. കോപ്പൻഹേഗനിൽ അടുത്തിടെ നടന്ന ഡാനിഷ് ഓപ്പൺ 2022 ൽ നീന്തൽ മത്സരത്തിൽ വേദാന്ത് സ്വർണം, വെള്ളി മെഡലുകൾ നേടിയിരുന്നു.

തന്നെ നടൻ ആർ മാധവന്റെ മകനായി മാത്രം കാണാൻ ആഗ്രഹിക്കുന്നില്ലെന്ന് തുറന്നു പറയുകയാണ് വേദാന്ത്. ഡിഡി ഇന്ത്യയ്ക്ക് നൽകിയ അഭിമുഖത്തിലാണ് വേദാന്ത് കരിയറിനെ കുറിച്ചും സ്വപ്നങ്ങളെ കുറിച്ചും തുറന്നു പറഞ്ഞത്.

അച്ഛന്റെ നിഴലിൽ ജീവിക്കാൻ തനിക്ക് ആഗ്രഹമില്ല. സ്വയം പേരെടുക്കാനാണ് തന്റെ ആഗ്രഹം. മാധവന്റെ മകൻ എന്ന നിലയിൽ മാത്രം തനിക്ക് അറിയപ്പെടേണ്ടെന്നും വേദാന്ത് പറയുന്നു.

‌തന്റെ സ്വപ്നങ്ങൾക്ക് വേണ്ടി മാതാപിതാക്കളുടെ പിന്തുണയും അവരുടെ ത്യാഗവും എത്രത്തോളമുണ്ടെന്നും വേദാന്ത് പറയുന്നു. എന്നും തനിക്കൊപ്പം നിന്നവരാണ് അച്ഛനും അമ്മയും. ഒരുപാട് ത്യാഗങ്ങൾ അവർ ചെയ്തിട്ടുണ്ട്. അതിൽ ഏറ്റവും പ്രധാനപ്പെട്ടതാണ് ദുബായിലേക്ക് താമസം മാറാനുള്ള അവരുടെ തീരുമാനം.

വേദാന്തിന് ഒളിമ്പിക്സിന് വേണ്ടി തയ്യാറെടുക്കാനായാണ് മാധവനും ഭാര്യയും മകനൊപ്പം കഴിഞ്ഞ വർഷം ദുബായിലേക്ക് താമസം മാറിയത്. കോവിഡ് പ്രതിസന്ധിയെ തുടർന്ന് ഇന്ത്യയിലെ പ്രധാന നീന്തൽ പരിശീലന കേന്ദ്രങ്ങളെല്ലാം അടച്ചതോടെയാണ് കുടുംബത്തോടൊപ്പം ദുബായിലേക്ക് മാറാൻ മാധവൻ തീരുമാനിച്ചത്.

ഡാനിഷ് ഓപ്പണിൽ 800 മീറ്റർ നീന്തലിലാണ് വേദാന്ത് സ്വർണമെഡൽ സ്വന്തമാക്കിയത്. ഇന്ത്യയ്ക്കു വേണ്ടി മറ്റൊരു മത്സരത്തിൽ വെള്ളി മെഡലും വേദാന്ത് സ്വന്തമാക്കിയിരുന്നു.

2026 ഒളിമ്പിക്സിലേക്കാണ് വേദാന്ത് തയ്യാറെടുക്കുന്നത്.  മകൻ തന്നെ പോലെ സിനിമാ രംഗത്ത് എത്തണമെന്ന് ആഗ്രഹിക്കുന്നില്ലെന്നും മാധവൻ തുറന്നു പറഞ്ഞിരുന്നു. തനിക്കോ ഭാര്യയ്ക്കോ അങ്ങനെയൊരു ആഗ്രഹമില്ല. മകന് അവന്റെതായ സ്വപ്നങ്ങളുണ്ടെന്നും അതിന് പൂർണ പിന്തുണ നൽകുകയാണ് തങ്ങൾ ചെയ്യുന്നതെന്നും മാധവൻ നേരത്തേ പറഞ്ഞിരുന്നു. 

ബാംഗ്ലൂരിൽ നടന്ന നീന്തൽ ചാമ്പ്യൻഷിപ്പിൽ നാല് വെള്ളി മെഡലും മൂന്ന് വെങ്കലമെഡലും വേദാന്ത് സ്വന്തമാക്കിയിരുന്നു.  800 മീറ്റർ ഫ്രീസ്റ്റൈൽ, 1500 ഫ്രീസ്റ്റൈൽ, 4X100 ഫ്രീസ്റ്റൈൽ റിലേ, 4X200 ഫ്രീ സ്റ്റൈൽ എന്നിവയിലാണ് വെള്ളി മെഡൽ സ്വന്തമാക്കിയത്. 100 മീറ്റർ ഫ്രീസ്റ്റൈൽ, 200 മീറ്റർ ഫ്രീസ്റ്റൈൽ, 400 മീറ്റർ ഫ്രീസ്റ്റൈൽ എന്നിവയിൽ വെങ്കല മെഡലും നേടി.