Diego Maradona Passes Away | സർവ്വം തികഞ്ഞ ധൂർത്തപുത്രൻ; ഫുട്‌ബോളിന്റേയും ജീവിതത്തിന്റേയും എല്ലാ ഋതുക്കളും പകർന്നാടിയയാൾ

ഫുട്‌ബോൾ എന്ന് ഒരിക്കലെങ്കിലും കേട്ടിട്ടുള്ളവരിൽ ഇന്നൊന്നു കരയാത്തവർ ആരുണ്ട്. ലോകം ഒരു കാൽപ്പന്തിനു പുറകെ ആയിരുന്നില്ല കഴിഞ്ഞ പതിറ്റാണ്ടുകളിൽ, എല്ലാ കണ്ണുകളും കാലുകളും ഡീഗോ മറഡോണയ്ക്കു പിന്നാലെ ആയിരുന്നു.

പെലെ എന്ന മഹാരഥനും മെസിയും റോണാൾഡോയും വരെയുള്ള മഹാപ്രതിഭകൾക്കും ഇടയിൽ സർവ്വം തികഞ്ഞ ധൂർത്തപുത്രൻ. അതായിരുന്നു മറഡോണ. ഫുട്‌ബോളിന്റേയും ജീവിതത്തിന്റേയും എല്ലാ ഋതുക്കളും പകർന്നാടിയയാൾ.

ഡീഗോ മറഡോണ അന്നു പറഞ്ഞതു പോലെ ആയിരുന്നില്ല കാര്യങ്ങൾ. ഫുട്‌ബോളിന് ഒരു ദൈവമുണ്ടെങ്കിൽ ആ ദൈവം കൈ തൊട്ടത് ഈ പന്തിൽ ആയിരുന്നില്ല. ആ പന്തിനെ അടിച്ച മറഡോണയുടെ നെറുകയിൽ ആയിരുന്നു. പ്രതിഭയുടെ ഈ ധാരാളിത്തം എത്ര ഫുട്‌ബോൾ ദൈവങ്ങൾ കനിഞ്ഞു നൽകിയതായിരിക്കണം.

എന്നും ഒറ്റയ്ക്കായിരുന്നു മാറഡോണ. എതിരാളികൾ മുഴുവൻ വളഞ്ഞിട്ട് പിടിക്കുന്നയാൾ. ഒപ്പമുള്ളവരെ പേടിപ്പിച്ച് അകറ്റി നിർത്തുന്നയാൾ. മധ്യനിരയിൽ നിന്നിങ്ങനെ ഒറ്റയ്ക്കു കയറിപ്പോയി മറഡോണ സ്ഥാപിച്ചതാണ് ആ ആഗോള സിംഹാസനം.

ആ സിംഹാസനം ആസ്ഥാനമായത് ഫുട്‌ബോൾ എന്ന ആഗോളമതത്തിനായിരുന്നു. അതിന്റെ തിരുക്കുറലുകൾ പച്ചപ്പുൽമൈതാനങ്ങളിലാണ് കാൽപ്പന്തുകൊണ്ട് ഈ വിശുദ്ധൻ എഴുതിയിട്ടത്. ലോകമെങ്ങുമുള്ളവർക്ക് ഒരുപോലെ മനസ്സിലായ ഒരേയൊരു ഭാഷയായിരുന്നു അത്.

ഈ പിരിപിരുപ്പിനെ ലോകം ഭ്രാന്തെന്നു വിളിച്ചു. ആ ഭ്രാന്തിനെ ഒരലങ്കാരമായി മറഡോണ കൊണ്ടു നടന്നു. ഒരു ഭ്രാന്തനു മാത്രമേ ഇങ്ങനെ പത്തുപേരേ ഓടിത്തോൽപ്പിച്ച് ഒഴിഞ്ഞ പോസ്റ്റിൽ ഗോളടിക്കാൻ കഴിയുമായിരുന്നുള്ളു.

ലോകം ഡ്രിബ്‌ളിങ് എന്താണെന്നു പഠിച്ചത് ഈ ഭ്രാന്തനിൽ നിന്നായിരുന്നു. മെക്‌സിക്കൻ തിരമാലകൾ എന്തെന്നു ലോകമറിഞ്ഞ 1986ലെ ലോക കപ്പ്. ടീമിനെ നയിച്ച് ഒറ്റയ്ക്കു ഫൈനൽ വരെ എത്തിച്ച് പിന്നെയാ ഫൈനലിൽ... ഓ അന്ന് ഫുട്‌ബോളിൽ നിന്നു തന്നെ ഇല്ലാതായിപ്പോവുകയായിരുന്നു പശ്ചിമജർമനി. ആഗോള ഫുട്ബാളിന് ഒരു കപ്പുണ്ടെങ്കിൽ അത് ഈ കയ്യിൽ അല്ലാതെ വേറെ എവിടെയാണ് ഇരിക്കേണ്ടത്.