'എല്ലാ ക്യാപ്റ്റൻമാർക്കും ഇഷ്ടക്കാരുണ്ട്'; റെയ്നയെ ധോണി നന്നായി പിന്തുണച്ചിരുന്നു: യുവരാജ് സിങ്

ന്യൂഡൽഹി: ഇന്ത്യൻ ടീമിന്റെ ക്യാപ്റ്റനായിരുന്ന സമയത്ത് മഹേന്ദ്ര സിംഗ് ധോണി വളരെയധികം പിന്തുണച്ച കളിക്കാരനാണ് ബാറ്റ്സ്മാൻ സുരേഷ് റെയ്‌നയെന്ന് മുൻ ഇന്ത്യൻ ഓൾ‌റൌണ്ടർ യുവരാജ് സിംഗ്. 2011 ലോകകപ്പ് കിരീടത്തിലേക്ക് ധോണി നയിച്ച ടീമിന്റെ ഭാഗമായിരുന്നു റെയ്‌നയും യുവരാജും.

ശ്രീലങ്കയ്‌ക്കെതിരായ ഫൈനലിന് മുമ്പ് റെയ്‌ന, യൂസഫ് പത്താൻ എന്നിവരിൽ ടീമിലേക്ക് ആരെ തെരഞ്ഞെടുക്കണമെന്ന കാര്യത്തിൽ പ്രതിസന്ധിയുണ്ടായിരുന്നുവെന്ന് യുവരാജ് പറഞ്ഞു.

 സുരേഷ് റെയ്‌നയ്ക്ക് അന്ന് വലിയ പിന്തുണയുണ്ടായിരുന്നു, കാരണം ധോണി അദ്ദേഹത്തെ പിന്തുണച്ചിരുന്നു. എല്ലാക്കാലത്തും ഇന്ത്യൻ ടീമിലെ ക്യാപ്റ്റൻമാർക്ക് പ്രിയപ്പെട്ട കളിക്കാരുണ്ടായിരുന്നുവെന്നും മഹി അക്കാലത്ത് റെയ്‌നയെ പിന്തുണച്ചിരുന്നുവെന്നും യുവരാജ് ഒരു അഭിമുഖത്തിൽ പറഞ്ഞു.

"യൂസഫ് പത്താനും അക്കാലത്ത് മികച്ച പ്രകടനം കാഴ്ചവച്ചിരുന്നു, ഞാനും മികച്ച ഫോമിലായിരുന്നു, കൂടാതെ വിക്കറ്റുകളും എടുക്കുമായിരുന്നു. എന്നാൽ റെയ്‌ന അന്ന് അത്ര നല്ല ഫോമിലായിരുന്നില്ല. അക്കാലത്ത് മറ്റൊരു ഇടംകൈയൻ സ്പിന്നറെ കണ്ടെത്താൻ ധോണിക്കു കഴിഞ്ഞില്ല. ഞാൻ വിക്കറ്റ് എടുക്കുന്ന ബൌളറായിരുന്നു. അതിനാൽ എന്നെ ഒഴിവാക്കാൻ ടീം മാനേജ്മെന്‍റിന് മുന്നിൽ മറ്റൊരു മാർഗവുമില്ലായിരുന്നു"- യുവരാജ് സിങ് പറഞ്ഞു.

ധോണി ക്യാപ്റ്റനായിരുന്ന കാലയളവിൽ ഇന്ത്യൻ ടീമിലെ സ്ഥിരം കളിക്കാരിൽ ഒരാളായിരുന്നു റെയ്‌ന. എന്നാൽ 2017 ജനുവരിയിൽ ധോണിക്ക് പകരക്കാരനായി വിരാട് കോഹ്‌ലി ക്യാപ്റ്റനായതോടെ റെയ്ന ടീമിൽനിന്ന് പുറത്തായി. പിന്നീട് അന്താരാഷ്ട്ര ക്രിക്കറ്റിൽ റെയ്നയെ അധികം കാണാൻ കഴിഞ്ഞിട്ടില്ല.

2018 ജൂലൈയിൽ ഇംഗ്ലണ്ടിനെതിരായ ഏകദിനത്തിലാണ് റെയ്‌ന അവസാനമായി കളിച്ചത്. ആ വർഷം അദ്ദേഹം പങ്കെടുത്ത ഏക ഏകദിന പരമ്പരയും ഇതായിരുന്നു.

അദ്ദേഹത്തിന്റെ അവസാന ടെസ്റ്റ് മത്സരം 2014/15 സീസണിൽ ഓസ്ട്രേലിയയ്ക്കെതിരെയായിരുന്നു. ഈ പരമ്പരയോടെയാണ് ധോണി ടെസ്റ്റിൽനിന്ന് വിരമിച്ചതും.