ഒന്നാമൻ ടീം ഇന്ത്യ; ക്രിക്കറ്റിന്റെ മൂന്ന് ഫോർമാറ്റുകളിലും ഒന്നാം റാങ്ക്

ക്രിക്കറ്റിലെ മൂന്ന് ഫോർമാറ്റുകളിലും ഒന്നാം റാങ്കുമായി ടീം ഇന്ത്യ. നാഗ്പൂരിൽ ഓസ്ട്രേലിയക്കെതിരായ ആദ്യ ടെസ്റ്റിലെ വിജയത്തോടെയാണ് ഇന്ത്യ ഈ നേട്ടം സ്വന്തമാക്കിയത്. നേരത്തെ ടി20യിൽ ഒന്നാം സ്ഥാനത്തായിരുന്ന ഇന്ത്യ അടുത്തിടെ ന്യൂസിലൻഡിനെതിരായ ഏകദിന പരമ്പര 3-0ന്  സ്വന്തമാക്കിയതോടെ ഐസിസി ഏകദിന റാങ്കിംഗിലും ഒന്നാമതെത്തിയത്.

ഒന്നാം സ്ഥാനം നിലനിർത്തുന്നതിന് ഫെബ്രുവരി 17ന് ഡൽഹിയിൽ ആരംഭിക്കുന്ന രണ്ടാം ടെസ്റ്റിലും ഇന്ത്യക്ക് വിജയിക്കേണ്ടതുണ്ട്. ജൂണില്‍ നടക്കുന്ന ലോക ടെസ്റ്റ് ചാംപ്യൻഷിപ്പ് ഫൈനൽ യോഗ്യതയിലേക്ക് ഒരു പടികൂടി കടക്കാനും വിജയം അനിവാര്യം. ഫൈനലിലെത്താൻ ബോർഡർ- ഗവാസ്കർ ട്രോഫി 3-1നോ 3-0നോ ഇന്ത്യക്ക് ജയിക്കണം.

നാഗ്പൂരിൽ ഒരു ഇന്നിങ്സിനും 132 റൺസിനുമാണ് ഓസ്ട്രേലിയയെ പരാജയപ്പെടുത്തിയത്. ഈ വിജയത്തില്‍ നിർണായക പങ്കുവഹിച്ച ആർ അശ്വിൻ, രവീന്ദ്ര ജഡേജ, രോഹിത് ശർമ എന്നിവരും റാങ്കിങ്ങിൽ നേട്ടമുണ്ടാക്കി.

മത്സരത്തിൽ എട്ട് വിക്കറ്റ് നേടിയ അശ്വിൻ ടെസ്റ്റ് ബൗളിംഗ് റാങ്കിങ്ങിൽ രണ്ടാം സ്ഥാനത്തെത്തി. ഒന്നാം സ്ഥാനത്തുള്ള പാറ്റ് കുമ്മിൻസിനെക്കാൾ 21 പോയിന്റ് മാത്രം പിന്നിലാണ് അശ്വിൻ.

ഏഴുവിക്കറ്റും 70 റൺസും നേടിയ ജഡേജ ഓൾറൗണ്ടർമാരുടെ റാങ്കിങ്ങിൽ ഒന്നാം സ്ഥാനം നിലനിർത്തി. ബൗളിംഗിൽ നാലു സ്ഥാനം മെച്ചപ്പെടുത്തി 16ാം സ്ഥാനത്തെത്തി.

മത്സരത്തിൽ ഒരു വിക്കറ്റ് മാത്രമേ നേടിയുള്ളൂവെങ്കിലും 84 റൺസ് നേടിയ ബാറ്റിങ് പ്രകടനത്തിലൂടെ അക്സർ പട്ടേൽ  ഓൾറൗണ്ടർമാരുടെ പട്ടികയിൽ ആറു സ്ഥാനം മെച്ചപ്പെടുത്തി ഏഴാം റാങ്കിലെത്തി.

ടെസ്റ്റ് ബാറ്റർമാരുടെ റാങ്കിങ്ങിൽ രോഹിത് ശർമ രണ്ട് സ്ഥാനം മെച്ചപ്പെടുത്തി എട്ടാം റാങ്കിലെത്തി. ഇന്ത്യൻ ക്യാപ്റ്റന്റെ 120 റണ്‍സാണ് ബാറ്റിങ് ദുഷ്കരമായ പിച്ചിൽ 400 റൺസെന്ന സ്കോറിൽ ടീമിനെ എത്തിച്ചത്.

ഇന്ത്യക്കെതിരായ ആദ്യമത്സരത്തിൽ മോശം പ്രകടനമായിരുന്നെങ്കിലും മാര്‍നസ് ലെബുഷെയ്നും സ്റ്റീവ് സ്മിത്തും ഒന്നും രണ്ടും സ്ഥാനം നിലനിർത്തി. 

എന്നാൽ ഓപ്പണർമാരായ ഉസ്മാൻ ഖവാജയും ഡേവിഡ് വാർണറും റാങ്കിങ്ങിൽ പിന്നോട്ട് പോയി. ഖവാജ എട്ടിൽ നിന്നും പത്തിലേക്കും വാര്‍ണർ 14ല്‍ നിന്നും 20ലേക്കും എത്തി