ICC World cup 2019: ഇന്ത്യ കീവിസിനെ വീഴ്ത്തുമോ? ഉറപ്പിക്കാൻ അഞ്ച് കാരണങ്ങൾ

മാഞ്ചസ്റ്ററിൽ: ലോകകപ്പിലെ ആദ്യ സെമിഫൈനലിൽ ഇന്ത്യ ഇന്ന് ന്യൂസിലാൻഡിനെതിരെ. പോരാട്ടം തീപാറുമെങ്കിലും ഇന്ത്യ ജയിക്കാനുള്ള സാധ്യതയേറെയാണ്. സെമിയിൽ ന്യൂസിലൻഡിനെക്കാൾ സാധ്യത ഇന്ത്യക്കാണെന്ന് ഉറപ്പിച്ചുപറയാൻ കാരണങ്ങൾ ഇവയാണ്.

1. ഇന്ത്യ-ന്യൂസിലൻഡ് ഏകദിനപരമ്പര 4-1ന് ഇന്ത്യ ജയിച്ചിരുന്നു. ന്യൂസിലാൻഡിലാണ് ഈ മത്സരങ്ങൾ നടന്നത് എന്നത് ഇന്ത്യയുടെ മേൽക്കൈ വിളിച്ചോതുന്നതാണ്. 

2. ന്യൂസിലാൻഡിൽ ഏകദിന പരമ്പരയ്ക്ക് ബുമ്രയില്ലാതെയാണ് ഇന്ത്യ കളിച്ചത്. ആദ്യ രണ്ട് ഏകദിനങ്ങളിലും നാലുവിക്കറ്റ് വീതം വീഴ്ത്തിയ കുൽദീപ് യാദവിനെക്കൂടാതെ ഭുവിയും ഷമിയും ചഹലും കിവികളെ വരിഞ്ഞുകെട്ടി. അതേ ബൗളിങ് നിരയാണ് ഇപ്പോഴും ഇന്ത്യയ്ക്കുള്ളത്. അതിനൊപ്പം ബൂമ്ര കൂടി ചേരുന്നതോടെ ഇന്ത്യൻ പന്തേറിന് വീര്യമേറുമെന്ന് ഉറപ്പ്.

3. കിവികൾക്ക് ലോകകപ്പിലും ടീമെന്ന നിലയിൽ മോശംകാലമാണ്. ഒൻപതിൽ ജയിച്ചത് അഞ്ച് കളികളിൽ മാത്രം. ആദ്യ കളികളിലൊക്കെ ജയിച്ച് മുന്നേറിയെങ്കിലും അവസാന മൂന്നു കളിയിലും തോൽവിയായിരുന്നു ഫലം. ഓസീസിനോടും ഇംഗ്ലണ്ടിനോടും പാകിസ്ഥാനോടും തോറ്റു. വിൻഡീസിനോട് രക്ഷപ്പെട്ടത് ഭാഗ്യവശാലാണ്. ഒടുവിൽ പോയിന്‍റ് നിലയിൽ പാകിസ്ഥാനൊപ്പമെത്തിയെങ്കിലും സെമിയിലെത്തിയത് നെറ്റ് റൺറേറ്റ് മികവിൽ മാത്രമാണ്.

4. ബാറ്റിംഗിൽ ഇന്ത്യൻ മുൻനിര അപാരമികവിലാണ്. അഞ്ച് സെഞ്ച്വറിയടിച്ച രോഹിത് ശർമയും അഞ്ച് അർധസെഞ്ച്വറി തുടരെയടിച്ച വിരാട് കൊലിയും അവസാനകളിയിൽ സെഞ്ച്വറിയടിച്ച രാഹുലും മിന്നുന്നഫോമിലാണ്. കോലിയും രോഹിതും ഇതുവരെയടിച്ച റൺസ് കൂട്ടിയാൽ 1089.

5. താളം കണ്ടെത്താനാകാത്ത അവസ്ഥയിലാണ് കിവി ബാറ്റിങ് നിര. കിവീസ് ഓപ്പണർമാരാകട്ടെ തിളങ്ങിയത് ‌ആദ്യമത്സരത്തിൽ ലങ്കക്കെതിരെ മാത്രം. പിന്നെ ഒരു അർധസെഞ്ച്വറി പോലും അടിച്ചിട്ടില്ല. പരാജയപ്പെട്ട കോളിൻ മൺറോക്ക് പകരം ഹെൻട്രി നിക്കോൾസിനെ കൊണ്ടുവന്നിട്ടും രക്ഷയില്ല. വാലറ്റത്തുവരുന്ന മാറ്റ് ഹെൻട്രിയെക്കാൾ മോശം ശരാശരിയാണ് നിക്കോൾസിനെന്ന കൗതുകം വേറെ. അൽപ്പമെങ്കിലും ഫോമിലുള്ളത് കെയ്ൻ വില്യംസൺ മാത്രമാണ്.