ICC World cup 2019: കീവികളെ ഇന്ത്യ വീഴ്ത്തുമോ? മഴകൊണ്ടുപോയ പോരാട്ടം സെമിയിൽ പുനരവതരിക്കുന്നു

മാഞ്ചസ്റ്റർ: ഇംഗ്ലീഷ് ലോകകപ്പിലെ ആദ്യ സെമി ഫൈനൽ നാളെ. ഇന്ത്യക്ക് ന്യൂസിലൻഡാണ് എതിരാളികൾ. മാഞ്ചസ്റ്ററിലെ ഓൾഡ് ട്രാഫോഡ് സ്റ്റേഡിയത്തിൽ ഉച്ചയ്ക്ക് 3 മണിക്ക് മൽസരം തുടങ്ങും. രണ്ടാം സെമിയിൽ ഇംഗ്ളണ്ട് ഓസ്ട്രേലിയയെ നേരിടും.

മഴ മൂലം പ്രാഥമിക ഘട്ടത്തിൽ നഷ്ടമായ മൽസരം സെമിയിൽ അവതരിക്കുന്നു. പട്ടികയിൽ മുന്നിലുള്ള ഇന്ത്യയും നാലാമതുള്ള ന്യൂസിലൻഡും തമ്മിലാണ് ആ ക്ലാസിക് പോരാട്ടം. പരിശീലന മൽസരത്തിൽ ഇന്ത്യയെ തോൽപിച്ചതിന്റെ ഖ്യാതി കീവീസിനുണ്ടെങ്കിലും കളി കാര്യമായപ്പോൾ സ്ഥിതിയാകെ മാറിയിട്ടുണ്ട്. ട്രെന്റ് ബൗള്‍ട്ടിന്റെ സ്വിങ് ബൗളുകള്‍ക്കു മുന്നില്‍ അന്ന് ഇന്ത്യൻ ബാറ്റ്സ്മാൻമാർ നിഷ്പ്രഭരായിരുന്നു. എന്നാൽ അന്നത്തെ അവസ്ഥയല്ല ഇന്ത്യയുടേത്. നല്ല കളികളിലൂടെ പോയിന്റ് പട്ടികയിൽ ഇന്ത്യ മുന്നിലെത്തിയപ്പോൾ തപ്പിത്തടഞ്ഞായിരുന്നു കീവീസിന്റെ വരവ്.

അഞ്ചു സെഞ്ചുറികള്‍ നേടിക്കഴിഞ്ഞ രോഹിതും അഞ്ച് അര്‍ധ സെഞ്ചുറിയുമായി ക്യാപ്റ്റന്‍ കോഹ്‌ലിയും അടക്കമുള്ള ബാറ്റിങ് നിര. വട്ടം കറക്കുന്ന പന്തുമായി ബുംറയുടെ ഷമിയും അടക്കമുള്ള ബൗളർമാർ. ജഡേജയപോലെ ചോരാത്ത കൈകളുള്ള ഫീൽഡമാർ ഇങ്ങനെയുള്ളപ്പോൾ മാനസിക മുൻതൂക്കം ഇന്ത്യക്കാണ്.

ഈ ലോകകപ്പിൽ മാഞ്ചസ്റ്ററിൽ കളിച്ച രണ്ടുകളികളും ഇന്ത്യ ജയിച്ചു എന്നതും ആത്മവിശ്വാസം കൂട്ടും. എന്നാൽ കെയ്ൻവില്യംസന്റ എന്ന ചിറകിലേന്തിയാണ് കിവികൾ പറക്കാനൊരുങ്ങുന്നത്. ഇക്കൂട്ടത്തിൽ ലോക്കി ഫെർഗുസനും ട്രെൻഡ് ബോൾട്ടും അടക്കമുള്ളവർ കരുത്തായി ഉണ്ട് എന്നതാണ് അവരുടെ ആശ്വാസം.

ഏഴു തവണ ന്യൂസിലൻഡ് സെമി ഫൈനലിൽ എത്തിയിട്ടുണ്ടെങ്കിലും ആദ്യമായാണ് ഇന്ത്യയെ നേരിടുന്നത്. 8 ല്‍ 7 തവണയും സെമിഫൈനലില്‍ തോല്‍വി നേരിടേണ്ടി വന്നു എന്ന ദുരന്തം കീവീസിന് മുന്നിലുണ്ട്. കഴിഞ്ഞ തവണ ഫൈനലിൽ എത്തിയെങ്കിലും ഓസീസിനോട് തോറ്റു. ഇന്ത്യയും ന്യൂസിലൻഡും ലോകകപ്പ് വേദിയിൽ ഏറ്റുമുട്ടിയിട്ടുള്ളത് 8 തവണയാണ് ഇതിൽ 4 ജയം ന്യൂസിലൻഡിനും 3 എണ്ണത്തിൽ ഇന്ത്യയും ജയിച്ചു. ഒരെണ്ണത്തിൽ ഫലമുണ്ടായില്ല.