BAN vs NZ| ബംഗ്ലാദേശ് ജൈത്രയാത്ര തുടരുന്നു; രണ്ടാം ടി20യിലും ന്യുസിലൻഡിനെതിരെ ജയം

ബംഗ്ലദേശും ന്യുസിലൻഡും തമ്മിൽ നടക്കുന്ന ടി20 പരമ്പരയിലെ രണ്ടാം മത്സരത്തിലും ബംഗ്ലാദേശിന്. ധാക്കയിൽ നടന്ന ആവേശപ്പോരാട്ടത്തിൽ നാല് റൺസിനാണ് ബംഗ്ലാദേശ് കിവീസ് ടീമിനെ വീഴ്ത്തിയത്. ജയം നേടിയതോടെ അവർ പരമ്പരയില്‍ 2-0ന് മുന്നിലെത്തി.

ഓപ്പണര്‍ മൊഹമ്മദ് നയീം(39), ലിറ്റണ്‍ ദാസ്(33) എന്നിവര്‍ ഓപ്പണിംഗ് വിക്കറ്റില്‍ പത്തോവറില്‍ 59 റൺസ് നേടി നൽകിയ തുടക്കം മധ്യനിരയില്‍ ക്യാപ്റ്റന്‍ മഹ്മൂദുല്ല (32 പന്തില്‍ 37 നോട്ടൗട്ട്) നൂറുള്‍ ഹസന്‍(13) എന്നിവര്‍ ഏറ്റെടുത്ത് ബംഗ്ലാദേശിനെ 141 റണ്‍സിലെത്തിച്ചു.

49 പന്തിൽ 65 റൺസോടെ കിവീസിനായി ടോം ലാതം പൊരുതിയെങ്കിലും അവരെ വിജയത്തിലേക്ക് എത്തിക്കാൻ താരത്തിന് കഴിഞ്ഞില്ല.

ആദ്യം ബാറ്റ് ചെയ്ത ബംഗ്ലാദേശ് 20 ഓവറില്‍ ആറ് വിക്കറ്റ് നഷ്ടത്തില്‍ 141 റണ്‍സെടുത്തപ്പോള്‍ ന്യൂസിലന്‍ഡിന് 20 ഓവറില്‍ അഞ്ച് വിക്കറ്റ് നഷ്ടത്തില്‍ 137 റണ്‍സെടുക്കാനെ കഴിഞ്ഞുള്ളു.

അഞ്ച് വിക്കറ്റ് കൈയിലിരിക്കെ അവസാന രണ്ടോവറില്‍ ന്യൂസിലന്‍ഡിന് ജയത്തിലേക്ക് 28 റണ്‍സായിരുന്നു  വേണ്ടിയിരുന്നത്. മുഹമ്മദ് സൈഫുദ്ദീന്‍ എറിഞ്ഞ പത്തൊമ്പതാം ഓവറില്‍ കിവീസിന് എട്ട് റണ്‍സെ നേടാനായുള്ളു. മുസ്തഫിസുര്‍ റഹ്മാന്‍ എറിഞ്ഞ അവസാന ഓവറില്‍ 20 റണ്‍സ് വേണ്ടിയിരുന്ന ന്യൂസിലന്‍ഡിന് 15 റണ്‍സെടുക്കാനെ കഴിഞ്ഞുള്ളു.

ഓസ്ട്രേലിയക്കും ന്യൂസിലന്‍ഡിനുമെതിരായ കഴിഞ്ഞ ഏഴ് ടി20 മത്സരങ്ങളില്‍ ബംഗ്ലാദേശിന്‍റെ ആറാം ജയമാണിത്..

ബംഗ്ലാദേശിനായി മെഹ്ദി ഹസനും ഷാക്കിബ് അല്‍ ഹസനും രണ്ട് വിക്കറ്റ് വീതം വീഴ്ത്തി.

പരമ്പരയിലെ മൂന്നാം മത്സരം ഞായറാഴ്ച നടക്കും.