In Pics| ഓസ്‌ട്രേലിയൻ പര്യടനത്തിനായി തിരിച്ച് ഇന്ത്യൻ വനിതാ ക്രിക്കറ്റ് ടീം; കാത്തിരിക്കുന്നത് കഠിനമായ ക്വാറന്റീൻ നാളുകൾ

ഒരു മാസത്തോളം നീണ്ടുനിൽക്കുന്ന ഓസ്‌ട്രേലിയൻ പര്യടനത്തിനായി ഇന്ത്യയുടെ വനിതാ ക്രിക്കറ്റ് ടീം ബ്രിസ്ബേനിലേക്ക് തിരിച്ചു. കോവിഡ് നിയന്ത്രണങ്ങൾ രാജ്യത്ത് വീണ്ടും കർശനമാക്കിയതിനാൽ ഓസ്‌ട്രേലിയയിൽ എത്തുന്ന ഇന്ത്യൻ താരങ്ങളെ കാത്തിരിക്കുന്നത് കഠിനമായ 14 ദിവസത്തെ ക്വാറന്റീനാണ്.

നിയന്ത്രണങ്ങൾ കർശനമാക്കിയതിനാൽ 14 ദിവസവും താരങ്ങൾക്ക് ഹോട്ടൽ മുറിയിൽ തന്നെ കഴിയേണ്ടി വരും. ക്വാറന്റീന് ശേഷം ഒരാഴ്ചയിൽ താഴെ മാത്രം സമയമേ ഇന്ത്യൻ താരങ്ങൾക്ക് പരിശീലനത്തിനായി ലഭിക്കുകയുള്ളൂ .

'നേരത്തെ ആദ്യത്തെ ഒരാഴ്ചത്തെ ക്വാറന്റീന് ശേഷം ഇന്ത്യക്ക് പരിശീലനത്തിന് അവസരം ലഭിക്കുമെന്നാണ് കരുതിയിരുന്നത്, പക്ഷെ ഇപ്പോഴത്തെ അവസ്ഥയിൽ അത് സാധ്യമല്ല. കാര്യങ്ങൾ എങ്ങനെയാണ് പോകുന്നത് എന്ന് നോക്കാം. 14 ദിവസ ക്വാറന്റീൻ താരങ്ങൾക്ക് വളരെ കഠിനമാകും, പക്ഷെ ഇപ്പോഴത്തെ അവസ്ഥയിൽ ഇതല്ലാതെ വേറെ വഴിയില്ല.' ബിസിസിഐയുടെ ഒരു ഒഫിഷ്യൽ വ്യക്തമാക്കി.

കഴിഞ്ഞ ഒരാഴ്ചയായി ഇന്ത്യയിൽ പരിശീലനം നടത്തിയിരുന്ന ഇന്ത്യൻ സംഘം സിഡ്‌നിയിലേക്ക് പോകുമെന്നാണ് ആദ്യം അറിയിച്ചിരുന്നതെങ്കിലും, സിഡ്നിയിലെയും മറ്റ് വേദികളായ പെർത്തിലെയും മെൽബണിലെയും കോവിഡ് കേസുകളുടെ എണ്ണം ഉയരാൻ തുടങ്ങിയതോടെ ഇവടങ്ങളിൽ നിന്നും വേദികൾ മാറ്റുകയായിരുന്നു.

മത്സരങ്ങൾ നടക്കുന്ന ക്വീൻസ്ലാന്റിലെ സർക്കാരിന്റെ അനുമതി വാങ്ങിയ ശേഷം ക്രിക്കറ്റ് ഓസ്‌ട്രേലിയ യാത്രാവിവരത്തിലുള്ള മാറ്റം അറിയിക്കുന്നതായിരിക്കും.

ഒരു ഡേ-നൈറ്റ് ടെസ്റ്റ്, മൂന്ന് വീതം ഏകദിനങ്ങളും ടി20യും അടങ്ങുന്ന പരമ്പര നേരത്തെ നിശ്ചയിച്ചതിൽ നിന്നും രണ്ട് ദിവസം വൈകിയാണ് തുടങ്ങുന്നത്. സെപ്റ്റംബർ 19ന് തുടങ്ങേണ്ടിയിരുന്ന പരമ്പര 21ലേക്ക് മാറ്റിയിട്ടുണ്ട്. പരമ്പരയ്ക്കുള്ള പുതിയ വേദികളിൽ മക്കെയും കാരാരയും ഉൾപ്പെട്ടിട്ടുണ്ട്.

22 പേരടങ്ങുന്ന സംഘം തിങ്കളാഴ്ചയാകും ബ്രിസ്ബേനിൽ എത്തുക. പരമ്പരയിലെ ഏറ്റവും വലിയ വെല്ലുവിളിയായി കണക്കാക്കുന്ന പിങ്ക് ബോൾ ടെസ്റ്റിനായി ടീം പൂർണമായി ഒരുങ്ങിയിട്ടുണ്ട്. ഇന്ത്യൻ വനിതാ ടീമിന്റെ ആദ്യ പിങ്ക് ബോൾ ടെസ്റ്റ് മത്സരമാകും ഇത്.

ഇന്ത്യയിലെ പരിശീലന സമയത്ത്, താരങ്ങൾ കൂടുതൽ നേരവും വൈറ്റ് ബോളിലാണ് പരിശീലിച്ചിരുന്നത് എന്നതിനാൽ ടെസ്റ്റ് മത്സരത്തിന് മുന്നോടിയായി ഒരു സന്നാഹ മത്സരം വനിതാ ടീമിനായി ഒരുക്കാൻ കഴിഞ്ഞാൽ അത് മത്സരത്തിൽ നിർണായകമാകും.