India A Vs SouthAfrica A: ഏകദിനപരമ്പരക്ക് നാളെ കാര്യവട്ടത്ത് തുടക്കം

ഇന്ത്യ എ - ദക്ഷിണാഫ്രിക്ക എ, ഏകദിന ക്രിക്കറ്റ് പരമ്പരക്ക് വ്യാഴാഴ്ച കാര്യവട്ടത്ത് തുടക്കം. ഇരുടീമും സ്പോർട്സ് ഹബ് സ്റ്റേഡിയത്തിൽ പരിശീലനം നടത്തി. നിരവധി അന്താരാഷ്ട്ര താരങ്ങൾ ഇരു ടീമുകളിലും ഉള്ളതിനാൽ പോരാട്ടം ആവേശകരമാകുമെന്നുറപ്പ്. രാവിലെ 9 മണിക്ക് തുടങ്ങുന്ന മത്സരത്തിന് കാണികൾക്ക് പ്രവേശനം സൗജന്യമാണ്.

മനീഷ് പാണ്ഡെയാണ് ഇന്ത്യ എ ടീമിന്റെ ക്യാപ്റ്റൻ. തെംബ ബവുമയാണ് ദക്ഷിണാഫ്രിക്ക എ ക്യാപ്റ്റൻ

ഇന്ത്യ എ - ദക്ഷിണാഫ്രിക്ക എ ഏകദിന പരമ്പരയിലെ അഞ്ച് മത്സരങ്ങൾക്കും ഒരു ചതുർദിന മത്സരത്തിനും സ്പോർട് ഹബ്ബ് വേദിയാകും. മനീഷ് പാണ്ഡെ നയിക്കുന്ന ഇന്ത്യ എ ടീമിൽ യുസ്‍വേന്ദ്ര ചഹൽ, ശുഭ്മാൻ ഗിൽ, വിജയ് ശങ്കർ, ക്രുണാൽ പാണ്ഡ്യ, ഖലീൽ അഹമ്മദ്, ദീപക് ചഹർ തുടങ്ങിയ പ്രമുഖരുണ്ട്.

ആദ്യ മൂന്ന് ഏകദിനങ്ങളിൽ ഇഷാൻ കിഷനും അവസാന രണ്ട് മത്സരങ്ങളിൽ സഞ്ജു സാംസണുമാണ് വിക്കറ്റ് കീപ്പർ.

ഹെന്റിച്ച് ക്ലാസൻ, ബ്യൂറൻ ഹെൻഡ്രിക്സ്, ആനറിച്ച് നോർജെ തുടങ്ങിയവരാണ് തെംബ ബവുമ നയിക്കുന്ന ദക്ഷിണാഫ്രിക്കൻ എ ടീമിലെ പ്രമുഖർ.

മത്സരങ്ങളെല്ലാം തത്സമയ സംപ്രേഷണമുണ്ട്. മഴ വില്ലനാകില്ലെന്ന പ്രതീക്ഷയിലാണ് സംഘടകർ