കാര്യവട്ടത്ത് പരമ്പര ലക്ഷ്യമിട്ട് ഇന്ത്യ; തിരിച്ചുവരാൻ വിൻഡീസ്

തിരുവനന്തപുരം: ഇന്ത്യ-വിൻഡീസ് രണ്ടാം ടി20 മത്സരത്തിന് കളിത്തട്ടുണരാൻ മിനിട്ടുകൾ മാത്രം ബാക്കി. കാര്യവട്ടം ഗ്രീൻഫീൽഡിൽ ജയത്തോടെ പരമ്പര ഉറപ്പിക്കാൻ ഇന്ത്യ ഇറങ്ങുമ്പോൾ വിൻഡീസ് ലക്ഷ്യമിടുന്നത് ജയത്തോടെ ഒരു തിരിച്ചുവരവാണ്.

ഹൈദരാബാദിൽ ക്യാപ്റ്റൻ വിരാട് കോഹ്ലിയുടെ ഹൈ വോൾട്ടേജ് പ്രകടനമാണ് വിൻഡീസിനെ നിഷ്പ്രഭമാക്കിക്കളഞ്ഞത്. കോഹ്ലിയെക്കൂടാതെ കെ.എൽ രാഹുലും ബാറ്റിങ്ങിൽ തിളങ്ങിയിരുന്നു. ഫീൽഡർമാരുടെയും ബൌളർമാരുടെയും പിഴവുകൾ ബാറ്റിങ് വെടിക്കെട്ട് കൊണ്ടാണ് ഇന്ത്യ മറികടന്നത്. തിരുവനന്തപുരത്തും കോഹ്ലിയും കൂട്ടരും ബാറ്റിങ് വെടിക്കെട്ട് പുറത്തെടുക്കുമെന്നാണ് ആരാധകർ പ്രതീക്ഷിക്കുന്നത്.

മറുവശത്ത് വിൻഡീസിന്‍റെ നില അത്ര ശുഭകരമല്ല. ബാറ്റിങ്ങിൽ മികവുണ്ടെങ്കിലും ബൌളിങിലെ പോരായ്മയാണ് കരീബിയൻ പടയുടെ തലവേദന. ഫീൽഡിലെ സമീപനം മാറ്റാൻ തയ്യാറായാൽ തന്നെ വിൻഡീസിന് ജയം അകലയല്ല എന്നാണ് ക്യാപ്റ്റൻ പൊള്ളാർഡിന്‍റെ കണക്കുകൂട്ടൽ.