IND vs AUS | ഓസ്ട്രേലിയയെ വിറപ്പിച്ച രവീന്ദ്ര ജഡേജയ്ക്ക് പിഴ വിധിച്ച് ഐസിസി; മാച്ച് ഫീയുടെ 25 % നല്‍കണം

സ്പിൻ കരുത്തിൽ ഓസ്ട്രേലിയയ്ക്കെതിരായ ആദ്യ ടെസ്റ്റിൽ ഉജ്വലം വിജയം നേടിയ ഇന്ത്യന്‍ ക്രിക്കറ്റ് ടീമിനെ തേടി അത്ര സുഖകരമല്ലാത്ത വാര്‍ത്തയാണ് മത്സരത്തിന് പിന്നാലെയെത്തിയത്. മത്സരത്തിലുടനീളം ബാറ്റിങ്ങിലും ബോളിങ്ങിലും തിളങ്ങി മാൻ ഓഫ് ദ മാച്ചായി മാറിയ രവീന്ദ്ര ജഡേജയ്ക്ക് ഐസിസി പിഴ വിധിച്ചു എന്ന വാര്‍ത്തയാണ് ഇന്ത്യന്‍ ക്യാമ്പിനെ ഞെട്ടിച്ചത്.

മത്സരത്തിനിടെ ഫീല്‍ഡ് അമ്പയര്‍മാരെ അറിയിക്കാതെ കൈവിരലില്‍ ക്രീം പുരട്ടിയതിനെ തുടര്‍ന്നാണ് ജഡേജയ്ക്കെതിരെ ഐസിസി നടപടിയെടുത്തത്. 

ഐസിസി പെരുമാറ്റച്ചട്ടത്തിന്റെ ലംഘനമായതിനാല്‍ താരത്തിന് മാച്ച് ഫീയുടെ 25 ശതമാനം പിഴ വിധിക്കുകയും ഒരു ഡീമെറിറ്റ് പോയന്റ് ചുമത്തുകയും ചെയ്തു.

മത്സരത്തിന്‍റെ ആദ്യ ദിനത്തിലായിരുന്നു സംഭവം. മുഹമ്മദ് സിറാജിന്റെ കൈയില്‍ ഉണ്ടായിരുന്ന ഒരു ക്രീം ജഡേജ തന്റെ ഇടത് ചൂണ്ടുവിരലില്‍ പുരട്ടുന്നതിന്റെ ദൃശ്യങ്ങളാണ് സ്റ്റേഡിയത്തിലെ ക്യാമറകള്‍  ഒപ്പിയെടുത്തത്. ഇത് നിമിഷങ്ങള്‍ക്കകം സോഷ്യല്‍ മീഡിയയില്‍ വൈറലാകുകയും ചെയ്തു. 

ജഡേജ പന്തില്‍ കൃത്രിമം കാണിച്ചു എന്നുവരെ ആരോപണങ്ങള്‍ ഉയര്‍ന്നു. എന്നാല്‍ ഇതിനുപിന്നാലെ ബിസിസിഐ തന്നെ വിശദീകരണവുമായി രംഗത്തെത്തി. വിരലിലെ വേദന കുറയ്ക്കുന്നതിനുള്ള ക്രീമാണ് ജഡേജ പുരട്ടിയതെന്ന് ടീം മാനേജ്‌മെന്റ് ഐസിസി മാച്ച് റഫറി ആന്‍ഡി പിക്രോഫ്റ്റിനെ അറിയിച്ചു.

എന്നിരുന്നാലും  ക്രീം പുരട്ടിയ വിവരം ഫീല്‍ഡ് അമ്പയര്‍മാരെ അറിയിക്കാതിരുന്നത് ഐസിസി പെരുമാറ്റച്ചട്ടത്തിലെ 2.20 വകുപ്പിന്റെ ലംഘനമായതിനാല്‍ ഒടുവില്‍ നടപടിയെടുക്കുകയായിരുന്നു. മത്സരത്തിനിടെ കൈയില്‍ എന്ത് വസ്തു ഉപയോഗിക്കുന്നതിന് മുമ്പ് ഫീല്‍ഡ് അമ്പയറില്‍ നിന്ന് അനുമതി വാങ്ങണമെന്നാണ് ചട്ടം.

ബോര്‍ഡര്‍-ഗവാസ്കര്‍ ട്രോഫിക്ക് വേണ്ടിയുള്ള ആദ്യ മത്സരത്തില്‍ഇന്നിങ്‌സിനും 132 റണ്‍സിനുമാണ് ഇന്ത്യ ജയിച്ചത്. മത്സരത്തില്‍ ജഡേജ രണ്ട് ഇന്നിങ്‌സിലുമായി ഏഴ് വിക്കറ്റുകളും 70 റണ്‍സും നേടിയിരുന്നു.