IND vs ENG| ഇംഗ്ലണ്ട് വെല്ലുവിളി നേരിടാൻ ഒരുങ്ങി ഇന്ത്യൻ താരങ്ങൾ; ആദ്യ ടെസ്റ്റ് ട്രെന്റ്ബ്രിഡ്ജിൽ

ഇന്ത്യയുടെ മൂന്നാം സ്പിന്നർ എന്ന നിലയിലാണ് അക്‌സർ പട്ടേലിനെ ടീമിലേക്ക് എടുത്തത്. പക്ഷെ ഇംഗ്ലണ്ടിലെ സാഹചര്യങ്ങളിൽ അക്സറിന് ടീമിലിടം കിട്ടുമോ എന്നത് സംശയമാണ്.

ഇന്ത്യയുടെ മുൻനിര ബൗളർമാരെല്ലാം പരുക്ക് പറ്റി പുറത്തിരുന്ന ഓസ്‌ട്രേലിയൻ പരമ്പരയിൽ ഇന്ത്യൻ ബൗളിംഗിനെ മുന്നിൽ നിന്ന് നയിച്ചത് സിറാജ് ആയിരുന്നു. ഓസ്‌ട്രേലിയൻ പരമ്പരയിൽ മികച്ച പ്രകടനം നടത്തിയ താരം ഇംഗ്ലണ്ടിലും അതാവർത്തിക്കാൻ കഴിയുമോ എന്നാണ് ടീം മാനേജ്‌മെന്റ് ഉറ്റുനോക്കുന്നത്.

ലോകത്തിലെ തന്നെ മികച്ച ഓൾ റൗണ്ടർമാരിൽ ഒരാളായ ജഡേജ മികച്ച ഫോമിലാണ്. ഇംഗ്ലണ്ടിൽ കളിച്ച പരിചയം താരത്തിന് ഉണ്ട് എന്നതിനാൽ ജഡേജയിലും ടീം മാനേജ്‌മെന്റ് അർപ്പിച്ചിരിക്കുന്ന പ്രതീക്ഷ വളരെ വലുതാണ്

മികച്ച ബൗളറാണ് ഉമേഷ് യാദവ് എന്നതിൽ യാതൊരു സംശയവുമില്ല. ബുംറ, ഷമി, ഇഷാന്ത് ശർമ എന്നിവരാണ് ഇന്ത്യയുടെ ആദ്യ മൂന്ന് പേസർമാർ എന്നതിനാൽ നാലാമതൊരു പേസറെ കളിപ്പിക്കാൻ ഇന്ത്യൻ ക്യാപ്റ്റൻ കോഹ്‌ലിയും മാനേജ്‌മെന്റും തീരുമാനിച്ചാൽ മാത്രമേ ഉമേഷിന് ടീമിലിടം ലഭിക്കുകയുള്ളൂ.

ഇന്ത്യൻ ബൗളിങ്ങിന്റെ കുന്തമുനയാണ് ജസ്പ്രീത് ബുംറ. ബുംറ ഇംഗ്ലണ്ടിൽ തിളങ്ങിയാൽ ഇന്ത്യക്ക് കാര്യങ്ങൾ എളുപ്പമാകും.

മുഹമ്മദ് ഷമിക്കും ഇംഗ്ലണ്ടിൽ ഇന്ത്യക്ക് വേണ്ടി ചെയ്യാൻ ഒരുപാട് കാര്യങ്ങളുണ്ട്. മികച്ച ലൈനും ലെങ്ങ്തിനൊപ്പം സ്വിങ്ങും കണ്ടെത്തുന്ന താരം ഫോമിലായാൽ ഏതൊരു ടീമും പേടിക്കുന്ന കരുതിയിരിക്കുന്ന ബൗളറാണ്

ഇന്ത്യൻ ബൗളിംഗ് നിരയിൽ ഏറ്റവും പരിചയസമ്പന്നനായ താരമാണ് ഇഷാന്ത് ശർമ. ഇംഗ്ലണ്ടിൽ മികച്ച റെക്കോർഡും താരത്തിന് സ്വന്തമായുണ്ട്.

ഇന്ത്യൻ ടീമിന്റെ സ്പിൻ വിഭാഗം നയിക്കുന്നത് അശ്വിനായിരിക്കും. മികച്ച തന്ത്രങ്ങൾ കൈവശമുള്ള താരം ഏത് പിച്ചിലും വിക്കറ്റ് നേടാൻ കഴിവുള്ള ബൗളറാണ്. ബൗളിങിനൊപ്പം ബാറ്റിങ്ങിലും ടീമിന് സംഭാവന നൽകാൻ അശ്വിന് കഴിയും.

ഇംഗ്ലണ്ടിൽ ഇന്ത്യൻ ബാറ്റിങ്ങിന്റെ നെടുംതൂൺ ചേതേശ്വർ പൂജാര തന്നെയായിരിക്കും. താരത്തെ ഒരുപാട് നേരം ക്രീസിൽ നിർത്തിയാൽ അപകടമാണെന് അറിയാവുന്ന ഇംഗ്ലണ്ട് താരങ്ങൾ പൂജാരയെ കുരുക്കാനുള്ള തന്ത്രങ്ങളുമായാകും ടെസ്റ്റ് പരമ്പരയ്ക്ക് ഇറങ്ങുക.

ഇന്ത്യൻ ടീമിൽ തന്റെ സ്ഥാനമുറപ്പിക്കാൻ രാഹുലിന് ഇതിലും നല്ല അവസരം ലഭിച്ചേക്കില്ല. ഈയിടെ നടന്ന പരിശീലന മത്സരത്തിൽ താരം സെഞ്ചുറി നേടിയിരുന്നു. റൺസ് നേടാൻ തുടങ്ങിയാൽ പിന്നെ താരത്തെ പിടിച്ചാൽ കിട്ടില്ല

ടെസ്റ്റ് പരമ്പരയുടെ ശ്രദ്ധാകേന്ദ്രം ഇന്ത്യൻ താരം വിരാട് കോഹ്ലി തന്നെയാണ്. ഇംഗ്ലണ്ടിൽ മികച്ച പ്രകടനം ലക്ഷ്യമിടുന്ന താരം കഠിന പരിശീലനം തന്നെയാണ് നടത്തുന്നത്.

അജിങ്ക്യ രഹാനെക്കും ടീമിലെ സ്ഥാനം നിലനിർത്തണമെങ്കിൽ മികച്ച പ്രകടനം നടത്തിയേ തീരൂ. ഇന്ത്യയുടെ മധ്യനിരയിൽ താരം നടത്തുന്ന പ്രകടനം പരമ്പരയിൽ ഇന്ത്യക്ക് നിർണായകമാകും.

ഇന്ത്യൻ ടീമിലെ എക്സ് - ഫാക്ടർ ആവാൻ കഴിയുന്ന താരമാണ് ഋഷഭ് പന്ത്. ഓസ്‌ട്രേലിയയിൽ നടന്ന ടെസ്റ്റ് പരമ്പരയിലും ഇന്ത്യയിൽ ഇംഗ്ലണ്ടിനെതിരായ ടെസ്റ്റ് പരമ്പരയിലും മികച്ച പ്രകടനങ്ങൾ നടത്തി താരം തന്റെ കഴിവ് തെളിയിച്ചിരുന്നു.

ഇംഗ്ലണ്ടിൽ ഇംഗ്ലണ്ടിനെ നേരിടുക എന്നത് ഇന്ത്യക്ക് കനത്ത വെല്ലുവിളി തന്നെയാണ്.

അവസാനം ഇന്ത്യ ഇംഗ്ലണ്ടിൽ പര്യടനം നടത്തിയപ്പോൾ 1-4 എന്ന നിലയിലായിരുന്നു ടെസ്റ്റ് പരമ്പര അടിയറവ് വച്ചത്.