IRE vs IND | അവസരം മുതലാക്കി സഞ്ജു; മിന്നും പ്രകടനവുമായി ദീപക് ഹൂഡ; പരമ്പര സ്വന്തമാക്കി ഇന്ത്യ

അയര്‍ലന്‍ഡിനെതിരായ രണ്ടാം ട്വന്റി 20 മത്സരത്തില്‍ ഇന്ത്യയ്ക്ക് നാല് റണ്‍സ് വിജയം. ഇന്ത്യ ഉയര്‍ത്തിയ 226 റണ്‍സ് വിജയലക്ഷ്യത്തിലേക്ക് ബാറ്റേന്തിയ അയര്‍ലന്‍ഡിന് 221 റണ്‍സെടുക്കാനേ സാധിച്ചുള്ളൂ. ഈ വിജയത്തോടെ ഇന്ത്യ രണ്ട് മത്സരങ്ങളടങ്ങിയ പരമ്പര സ്വന്തമാക്കി.

ദീപക് ഹൂഡയുടെയും സഞ്ജുവിന്റെയും മിന്നും പ്രകടനത്തിലാണ് ഇന്ത്യയ്ക്ക് മികച്ച സ്‌കോര്‍ കണ്ടെത്താനായത്. ഹൂഡ സെഞ്ചുറിയുമായി കളിയിലെ താരമായപ്പോള്‍ മിന്നല്‍ ബാറ്റിംഗും റെക്കോര്‍ഡുമായി സഞ്ജുവും ചരിത്രത്തില്‍ ഇടംപിടിച്ചു.

ദീപക് ഹൂഡയ്‌ക്കൊപ്പം രണ്ടാം വിക്കറ്റില്‍ തകര്‍ത്താടുകയായിരുന്നു സഞ്ജു സാംസണ്‍. 12-ാം ഓവറില്‍ ഇരുവരും ടീമിനെ 100 കടത്തി. 13-ാം ഓവറിലെ നാലാം പന്തില്‍ ബൗണ്ടറിയുമായി സഞ്ജു രാജ്യാന്തര ടി20 കരിയറില്‍ തന്റെ കന്നി അര്‍ധ സെഞ്ചുറി തികച്ചു. 31 പന്തിലായിരുന്നു സഞ്ജുവിന്റെ ഫിഫ്റ്റി. ഫിഫ്റ്റിക്ക് പിന്നാലെ ആഞ്ഞടിച്ച സഞ്ജു 42 പന്തില്‍ 77 റണ്‍സെടുത്താണ് മടങ്ങിയത്. ഒന്‍പത് ഫോറും നാല് സിക്‌സും അടങ്ങുന്നതായിരുന്നു സഞ്ജുവിന്റെ ഇന്നിംഗ്‌സ്.

226 റണ്‍സ് വിജയലക്ഷ്യത്തിലേക്ക് അത്ഭുതകരമായി ബാറ്റ് വീശിയ അയര്‍ലന്‍ഡ് വിജയപ്രതീക്ഷ അവസാന പന്തില്‍ വരെ നിലനിര്‍ത്തിയാണ് പൊരുതിവീഴുകയായിരുന്നു. 37 പന്തുകളില്‍ നിന്ന് 60 റണ്‍സെടുത്ത നായകന്‍ ആന്‍ഡ്രൂ ബാല്‍ബിര്‍നിയും 18 പന്തുകളില്‍ നിന്ന് 40 റണ്‍സെടുത്ത ഓപ്പണര്‍ സ്റ്റിര്‍ലിങ്ങും അയര്‍ലന്‍ഡിനുവേണ്ടി തിളങ്ങി.

രാജ്യാന്തര ടി20യില്‍ ഇന്ത്യയുടെ ഉയര്‍ന്ന കൂട്ടുകെട്ടാണ് സഞ്ജു-ഹൂഡ സഖ്യം പടുത്തുയര്‍ത്തിയ 176 റണ്‍സ്. ട്വന്റി 20-യില്‍ ഇന്ത്യയ്ക്കായി സെഞ്ചുറി നേടുന്ന നാലാമത്തെ താരമെന്ന നേട്ടം സ്വന്തമാക്കിയ ഹൂഡ 57 പന്തില്‍ നിന്ന് ആറ് സിക്സും ഒമ്പത് ഫോറുമടക്കം 104 റണ്‍സെടുത്തു.

സഞ്ജു-ഹൂഡ വെടിക്കെട്ട് കണ്ട മത്സരത്തില്‍ 20 ഓവറില്‍ 225/7 എന്ന സ്‌കോര്‍ കെട്ടിപ്പടുത്തപ്പോള്‍ മത്സരം നാല് റണ്‍സിന് ഇന്ത്യ വിജയിക്കുകയും പരമ്പര 2-0ന് തൂത്തുവാരുകയും ചെയ്തു. അയര്‍ലന്‍ഡിന് 20 ഓവറില്‍ 221-5 എന്ന സ്‌കോറിലെത്താനെ കഴിഞ്ഞുള്ളൂ.